古物仔_薰吹kap水薰吹：

古物仔_薰吹kap水薰吹：
※講著pok薰火tio̍h to̍h，pok薰傷身kài厲害，有pok 著愛改，無pok m̄-thang學。
▲紹介兩種古早pok薰ê薰吹：(鳳凰古城翕相)
△Tsit種薰吹華語講『旱煙杆』，薰吹頭kap薰吹喙仔是金屬銅抑是アルミ/arumi /輕銀、鋁，薰吹柄(薰吹管)是柴抑是竹，另外有1-kâi貯薰絲ê袋仔kap用粗紙捲ê紙tshú。
1、薰吹頭貯薰絲，需要先kō͘指頭仔lia̍p-lia̍p規丸，tsiah囥--入去，捏薰絲是功夫，siuⁿ phōng-song、siuⁿ tiâm-tsa̍t攏點bē to̍h火。
2、紙tshú點to̍h了後kā pûn-hua，iáu-ē繼續保持火種，等欲閣pok薰，用喙脆力歕風「phu̍h」1聲2聲to̍h-ē to̍h火。所以捲紙tshú mā是功夫，siuⁿ-tsa̍t siuⁿ-phàⁿ攏bē使得。
3、是按怎講做pok薰？因為bē使得kō͘ suh--è，當然m̄是kō͘食--è。薰絲用喙哺是食薰，捲薰ē使得pok，mā ē使得suh。
4、薰吹頭細粒薰絲少，入一擺薰絲pok無幾喙，pok一擺薰叫做pok 1-puah(缽)。
5、薰吹管需要kō͘鉛線tshng-tshng long-long--leh，tsiah-bē塞牢--leh。


△Tsit種薰吹叫做水薰吹(tsúi-hun-tshue)，銅質，薰吹管內面貯水，薰吹頭囥薰絲抑是捲薰，倒手phâng薰吹，正手點薰，喙pok--leh pok--leh，薰煙過水入喙內，khah-bē厚，加真薄，加真好入喉。
pok薰 pok薰，重點猶是tī pok，pok ê動作是，bueh suh m̄-tsiâⁿ suh，小可suh氣tō ài放掉，若suh ê動作節無拄好，恐驚連管仔內ê臭薰水tō-ē lim落腹內。

Tsit兩種薰吹細漢時攏bat pok--過，阮阿爸較早pok薰絲ê薰吹，後--來tsiah pok捲薰ê薰吹，猶有一支鹿角薰吹。
水薰吹是tī叔伯兄in-tau，看人pok，to̍h好玄pok一下，結果lim-tio̍h臭薰水。

老歲仔團湘西張家界9日遊----第三工：

老歲仔團湘西張家界9日遊----第三工：
▲進入第三工，猶tī半路，離目的地張家界猶真遙遠，今仔日ùi長沙出發，經由常德bueh到鳳凰古城歇暗，途中安排兩个景點，欣賞千年詩牆kap柳葉湖坐船。
阮tsit-tīn彰化鄉親，實在真ē可取--得，講7點出發to̍h準時上車，tī司機、導遊面前一點仔都無làu-khùi，心內mā tsiâⁿ欣羡in ê適應能力，m̄免為tse為he leh煩惱鬱卒。
好佳哉tsang-tsái順序出門耍到àm-hng(暗昏)，tsái-khí仝款赴ē著陣，輕輕鬆鬆起程。
上車了後，導遊一再交代，此去路途真遠，沿途無啥停睏路站，膀胱無力ê阿伯阿姆，抑是茶湯lim了siuⁿ濟，恐驚放尿無方便，若是喙乾，to̍h m̄-thang lim siuⁿ濟水--ō͘。
司機先生技術bē-bái 閣有定性，一路平順，經過山邊、經過田園來到常德千年詩牆，已經是9點gua̋外，詩牆真長，將近3公里遠，歇睏半點鐘kan-nā ē-tàng看一下大概，自從ē-hiáu電腦以後to̍h罕得攑筆寫字，毛筆早to̍h m̄知tàn去tó位，he中國詩詞咱也無研究，kan-ta ē-tàng o-ló講「真gâu做詩、真gâu寫字」。
紲落去來到柳葉湖，因為湖像長尖形柳葉，岸邊mā種一埒(lua̍h)長長ê水柳仔，tőng大欉，tsiâⁿ-súi。行程有安排坐船遊湖半點鐘，41个鄉親tsit-tsūn tsiah有時間互相phò-tāu開講，逐家to̍h加真靠俗，有講有笑。
離開柳葉湖繼續趕路，高速路邊景色kap咱台灣無相仝，in-taia土地闊，田園種作kap人家厝無像台灣tsa̍t-thóng-thóng，山勢無懸，厝宅大部份起tī山腳田邊，樓仔厝比傳統瓦厝較濟，罕罕ē看著捋仔田(lua̍h-á-tshân)。

來到保靖歇睏站，保靖到底tī tó位，已經分bē清bē記得，半路tī tsia小歇睏，看he歇睏站ê建築真現代化，路邊起tī田園ê庄腳厝koh真食相，翕兩張做記念。

中晝安排半路飯店治iau，導遊一再叫阮to̍h-ài便所消敨，下晡tsit-tsuā不止仔遠，需要4-5點鐘，食飽坐車koh走，雖罔路草愈來愈狹，卻是平坦平穩，經過大約3點鐘久看著路牌寫「張家界市」，kioh是目的地已經到位，siáⁿ知點外鐘後tsiah踏入鳳凰縣遊客中心，ing暗tuà鳳凰政府賓館，看he壁堵相片，to̍h知已經進入湘西苗族地界，有一種無仝ê感覺，小可神祕。
暗頓食飽，導遊tshuā隊se̍h鳳凰古城酒吧一條街夜景，夜色光iāⁿ-iāⁿ，在地人leh唱歌lā曲、運動跳舞，遊客kā-kā-kún，店家生理ka-ia̍h，食--è、穿--ē、囡仔tshit-thô物、看媠--è，銀器特別濟，夜遊時間有限，阮像趕鴨陣一直tuè導遊行，來到沱江邊，ua̋！燈光gia̍p-gia̍p-si̍h，遊客來來去去，手機仔閃光tsia熾hia熾，行路著細膩，縖包(hâ-pau)顧好，導遊人影mā-tio̍h看清楚，無張持一下斡角to̍h-ē phah-ka-la̍uh，加添費氣。
看無夠氣無要緊，明仔早起ē閣來參觀較歡喜，koh-ē沱江坐船hō͘你笑bī-bī。
△常德千年詩牆。

△常德千年詩牆，將近3公里長。

△詩牆對面是沅江。

△柳葉湖湖邊景色：岸邊水柳tőng大欉。

△坐船se̍h半點鐘，鄉親ná看風景ná開講，有講有笑。

△高速路邊景色，山勢無懸，厝宅大部份起tī山腳田邊，樓仔厝比傳統瓦厝較濟。

△罕罕ē看著捋仔田(lua̍h-á-tshân)。

△保靖歇睏站：現代化建築，路邊起tī田園ê庄腳厝koh真食相，翕兩張做記念。

△長沙、張家界來去ê遊覽車「運興旅運」。

△路邊起tī田園ê庄腳厝koh真食相，翕兩張做記念。

△踏入鳳凰縣遊客中心。

△政府賓館。

△中晝頓、暗頓tsia̍h食，普通羹頓，食飽無食巧。

△旅社內面ê像框。

△夜遊沱江。

△古城夜景。

△phah糖蔥。

19550000_番仔油燈：

19550000_番仔油燈：      Lah-jih_20151119

番仔油to̍h是『煤油』，mā號做臭油，氣味臭臭，bē油油，用來清洗時鐘家器(機器)，mā用來點火(點燈火)，煙濟閣烏，薰著烏sô-sô。
點番仔油ê燈具阮叫做番仔油燈，因為番仔油燈ē使得攑來攑去，tǹg-tiàm桌頂抑是掛tiàm壁堵攏真方便，有人叫做臭油攑(tshàu-iû-gia̍h)，he是古早散赤庄腳人暗時ê燈光，微微仔光，比一般蠟燭火加真暗，總是ē-tàng tshiō路看房間通路，方便暗時行踏，若是bueh看較清楚物件痕跡，to̍h需要kā番仔油燈攑倚近看，若無，雞膏li ē看做lak--落去 ê物配，àⁿ落去khioh tsiah知 khioh 著屎。
Tsit種番仔油燈陪伴我tsiâⁿ十冬暗時讀冊寫宿題ê未來望，六年牛仔班出業閣再讀補習班hit年kap讀初中hit 3冬，暗時需要伊陪伴，看冊寫字lóng是伊陪tī身軀邊，番仔油燈一定著khǹg tī目睭前tsiah看有，1點鐘、2點鐘停睏，鼻孔lóng是hō͘烏煙薰kah烏tsap-tsap。
去彰化讀初中hit 3年，透早5點to̍h-ài精神準備坐6點火車，厝內無時鐘，阿爸to̍h節欲倚8點時陣去對面阿伯in-tau看時間，轉--來to̍h kā番仔油燈ê番仔油thîn hō͘ tīⁿ，半暝精神看--一下，to̍h知影幾點，有時可能著看幾若擺，等到番仔油蝕到油燈ê一位記號，tsiah去叫阿嫂起來煮飯，閣等到好食飯阿爸tsiah叫我精神準備食飯款飯包出門去車頭。
阿爸ê頭殼真巧，ē-hiáu想tsit步，阿爸tsiâⁿ辛苦，暝時無thang一醒到天光，特別寒sih-sih 落霜ê冬天。

老歲仔團湘西張家界9日遊----第二工：

老歲仔團湘西張家界9日遊----第二工：
※七早八早to̍h出門，路燈閃熠伴月光，趕欲廣州坐高鐵，今日路頭有夠遠。
※廣州長沙七百公里，兩點半鐘坐tiàm膨椅，坐kah尻川䫌燒hōm-hōm，khin-lin-khong-long khin-lin-khong-long窗外風景真súi。
▲昨暝亂鐘仔寄3點，比morning call提早半點鐘精神，先hiâⁿ滾水泡1杯家己tsah來擂茶包，溫溫仔kā lim落腹，tsiah-koh kā身穿行李整理一擺，10分鐘後去洗蕩順紲khû便所，khû bueh 10分鐘無動無靜，不得已，提出法寶 通腸浣湯通尻川，koh去khû，謝天謝地鱟桸飯笠，有效--koh，3分鐘後得著敨放，心情輕鬆，紙尿褲是護身寶物，一定著穿，m̄-thang bē記得，家己裝備家己款好勢，等待牽--e梳妝完備，行李拖--leh落樓上車起行。
透早4點半珠海到廣州公路，路燈光iāⁿ車輛無濟，夜色卻是真媠，城市燈光閣有天頂月娘，著！昨暝八月半因為台灣做風颱，珠海mā是滿天烏雲，今仔日實在好運，透早tsiah-nī大粒koh tsiah-nī光ê月娘，一路陪伴一直kah天光，百外公里遠駛bueh兩點鐘，有人車內食飽啄龜到tsit-tsūn，阮是沿路欣賞烏影kap路燈月光leh拚輸贏，難得ê經驗。
來到廣州高鐵站，人聲kā-ka̍p，電火真光，闊koh懸ê建築，放送頭ê放送聲，一直變化車班tī時入站tī時bueh行，逐家來來去去無閒tshih-tshih。行入大廳to̍h kā tshuā隊導遊講--一聲，趕緊去khû一下仔便所，了後放心tùe人排列、檢查行李，咱是提早來等火車，in suah車bueh入站tsiah leh改札，夭壽，行李拖leh lōng，ùi 12車走到第6車，ná看番號ná顧牽手，有夠緊張，猶是咱台灣高鐵坐著較爽快較自在。
※高鐵起行，siű siű輕搖，行過都市，行過庄腳，tsi̍t-tsuā欲走700公里，趕緊來去，趕緊來去，來去長沙看景緻。
※高鐵起行，輕輕罔搖，ná看光景，ná leh tuh龜，台北高雄往復久，liâm-mi to̍h到， liâm-mi to̍h到，隨人著顧行李包。
9點外來到長沙，當地導遊苗族阿妹kap遊覽車已經leh等候，今仔日一工lóng-tī長沙，導覽空課交hō͘阿妹服務，tshit-thô景點有黃興步輦街、愛晚亭、簡牘博物館、橘子州頭四位。
黃興步輦街是一條現代化街路，時行名牌、洋裝、化妝品逐項有，最新上市iphone手機仔mā-leh展示，我是趣味街路雕塑藝術品，看he砧皮鞋、剃頭擔、補鼎紲火、西洋鏡、磨菜刀磨鉸刀ê古早物，hō͘咱想起囡仔早當時，台灣mā有tsit款回憶。
愛晚亭是一个風景區，步輦se̍h一liàn，景緻súi，散步bē-bái，觀光地區，物食tshit-thô物真濟，生理ka-ia̍h，廣埕tshāi 1尊毛澤東徛像，特別影目。
簡牘博物館，收藏出土古物簡牘，是猶未有紙進前，人類按怎利用竹爿、柴板來寫字tsiâⁿ做書寫、閱讀ê冊，雖罔展覽是複製品，ē-tàng看出古早人ê巧氣。
橘子州頭ê江神廟，廟內服祀觀音佛祖，壁堵浮雕十八羅漢，中國是鼓吹無神論ê國度，廟寺罕得khuàiⁿ，m̄知in ê心靈按怎寄託？邊--a to̍h是湘江，江邊風景真súi，大欉水柳仔，tiàm-tsia散步是享受。
Se̍h來se̍h去se̍h到m̄知身在何處，kan-nā記得景點一寡點點滴滴，tī tó食飯bē記得，ing暗旅館tī tó位？已經gông-tshia-tshia。

△七早八早to̍h出門，路燈閃熠伴月光。

△高鐵廣州站外面。

△高鐵列車。

△車內自翕精神好，無愛睏神。

△車票。

 △剃頭擔，ngiau耳孔。

△補鼎紲火。

 △磨刀。

△看 西洋鏡。

△砧皮鞋(tiam-phuê-ê)。

 △來去愛晚亭。

 △愛晚亭，毛澤東題字。

 △跤酸，小歇睏。

 △愛晚亭 簡介。

 △後壁面徛像是 毛澤東。 

△橘子州頭：江邊風景。

 △水柳仔。

 △江神廟：中國是鼓吹無神論ê國家，罕得看著寺廟。

 △佛祖觀音？

△十八羅漢。

 △大欉桂樹。

▲參觀簡牘博物館：

△老人囡仔性，學少年人 心適--一下。

△簡牘，用竹爿kap柴枋寫字，tsiah-koh用線連貫成冊，提供書寫閱讀。猶未有紙時代ê冊。

 △模擬古早時代製作簡牘場景。