古物仔_囡仔時代記智篇_玻璃珠仔：陳慶芳收藏/蕭平治翕相

古物仔_囡仔時代記智篇_玻璃珠仔：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】為著保留生活台語原音原味，所以寫較濟lô-má-jī。

▲玻璃珠仔(po-lê-tsu-á)：看著玻璃珠仔目睭做一下金--起來，he是囡仔時代最愛，用得來看媠，用得來耍tshit-thô，ī tiak珠仔，ī  sio-khian--e，ī ばんざい tsu̍t 珠仔孔。
四兄國校卒業了後，to̍h kā伊耍ê 7-80粒玻璃珠仔送hō͘我，因為有tsia-ê珠仔，suah pìⁿ-tsiâⁿ囡仔伴ê囡仔頭，bueh ī 珠仔，揣Lah-jih--è to̍h無m̄著。
△tiak珠仔kap tsu̍t珠仔：tiak珠仔動作是手蹄向天，kí-tsáiⁿ中指囥珠仔，用大垺翁指甲尾尖tiak出，he珠仔ē跳懸tsiah落地；tsu̍t珠仔是手蹄àⁿ地，kō͘大垺翁kap kí-tsáiⁿ ni珠仔，大垺翁khuè塗跤，tsiah用kí-tsáiⁿ tsu̍t--出去，珠仔kan-nā tī塗跤liàn。
△khian珠仔：khian to̍h是tàn(擲)， 手提珠仔khian塗跤ê珠仔，是有目標ê khian，m̄是烏白khian烏白tàn。
△ī 挽菜：tī塗跤挖5-kâi像茶甌仔大ê窟仔tsiâⁿ做一个十字形「+」，tsiah-koh tī外圍另外挖1-kâi做鬼仔孔，每人一粒珠仔，to̍h ē使得耍，珠仔ē-tàng ùi本孔出發se̍h一輦koh轉來本孔，to̍h ē使得講ばんざい萬歲，囡仔人bē-hiáu日本話to̍h講做挽菜。
請看後壁文章「19520800_Tiak珠仔 ī ばんざい」
△看媠、耍tshit-thô：玻璃珠仔一粒圓圓，ē使得tī塗跤、眠床頂、桌仔頂liàn來liàn去，he通光玻璃，色水光影變化多端，有ê內面閣有花紋親像楊桃liām，滾lúnt-sūn滾真súi。mā有he無通光--e，色彩súi kah ná像大理石磨--ē。
Hit 7-80粒玻璃珠仔內面有1粒較細粒 水色--è tsiâⁿ特別，規粒通光ńg通光，無tsham一屑仔雜質，我足寶惜tsit粒珠仔，無tshìn-tshái分人看，驚做耍了缺角去。tsit粒珠仔有真心適好耍ê祕密，kō͘兩支指頭仔kā 提坦直看--出去，真龜怪，玻璃珠仔內面有影像，看一下真，he影像tang時仔是對面ê景緻，厝宅、竹模、天頂、雲尪，雖罔細細tī珠仔內，m̄-koh tsiâⁿ清楚，kap真ê景緻相仝，不過是倒吊--è，實在怪奇。(tsit種好玄ê發現幫贊以後讀冊對自然現象ê理解，加真容易。)

19520800_Tiak珠仔 ī ばんざい          20110917_Lah-jih

5年升6年hit个歇熱，1工下晡4點goă，1-tīn囡仔伴滾來到阮灶腳厝角頭，講boeh「Tiak珠仔 ī挽菜(ばんざい)」。chia是下埕南爿曠地，有1棚菜瓜棚kap一坵用燈籠花籬笆圍起來ê園仔，園仔到灶腳chiâⁿ闊，無leh曝粟，會使得挖孔，是sńg珠仔好所在，koh逐个囡仔伴攏知影Lah-jih珠仔上濟，boeh ī挽菜，來Lah-jih in-tau sńg to̍h無m̄著。

「人chiah濟，咱來分國ī！」已經國民學校畢業ê Bo̍k-chhong--ē chhoā頭指揮：「我一國，Ka-hiông--ē一國，阮2人じゃんけん(janken/猜拳)選人，hō͘我選著徛chit爿，Ka-hiông--ē選著--ē徛伊hit爿…」

「我無珠仔！」

「我mā無珠仔！」

「等一下！」Lah-jih越頭起跤走，無1-分鐘久捾1-kâi烏色lān-pha袋仔斡倒轉--來，jîm幾若粒珠仔出--來：「A-pêⁿ！lah！」「Ka-tēng--ē！lah！」「No͘h-lí-á！lah！」一人tu一粒，chhun--e 較緊koh捾轉去囥。

Bo̍k-chhong--ē Ka-hiông--ē 開始石頭鉸刀紙一直poe̍h，poe̍h贏先揀，1擺1个，第一擺Bo̍k-chhong--ē贏：「Lah-jih！」

「A-ba̍k！」Ka-hiông--ē選。

第二擺Bo̍k-chhong--ē閣贏：「Ka-tēng--ē！」

「A-pêⁿ！」Ka-hiông--ē koh選。

連紲poe̍h 5-piàn，12个分做2國對抗輸贏，注定心適好sńg。

Sńg「Tiak珠仔 ī挽菜(ばんざい)」，ài先tī塗跤挖6-kâi孔，坦直掠排3孔，每孔大約5(台)尺遠，中央hit孔坦橫2爿仝款5(台)尺遠挖2孔，成1个十字「+」形，另外tī「+」形ê外圍小可較遠所在挖1孔，叫做鬼仔孔，阮灶腳厝角頭chit个珠仔場，早to̍h挖便便，chit-má koh小可しあげ(修飾、潤飾)一下to̍h會使得sńg。

Bo̍k-chhong--ē Ka-hiông--ē じゃんけん(猜拳)結果，Ka-hiông--ē in hit國A-Chiàng先chu̍t，chu̍t一下過頭遠，koh來換Ka-tēng--ē，Ka-tēng--ē技術bē-bái，chu̍t一下tú-tú-á好落中孔，繼續往正爿hit孔chu̍t，oă！siuⁿ輕手soah停tī孔邊，換A-pêⁿ，A-pêⁿ是chu̍t珠仔高手，手路幼，boeh遠boeh近控制真tú好，siòng目標koh準，伊ùi本孔出發，連紲中孔、正爿邊仔孔，koh來伊m̄相中孔，伊boeh坐便車，tú-chiah Ka-tēng--ē chu̍t hit粒tú-tī孔邊，A-pêⁿ倒手掠1掠，離hit粒珠仔chiah半尺遠，正手kā伊ê珠仔chu̍t--出去，「khiăk」--一下踫著Ka-tēng--ē hit粒珠仔，伊to̍h直接徙到中孔繼續chu̍t倒爿hit孔，--一下失覺察，珠仔liàn過邊仔孔。Koh來Bo̍k-chhong--e，伊雖然較大漢，m̄-koh技巧無比阮khah-gâu，伊ê珠仔停tī中孔邊，紲落去Ka-hiông--ē，伊ê珠仔無入孔，歹運紲kā Bo̍k-chhong--e ê珠仔踫入孔內，chit聲害--ā，著hông罰停睏(停權)1擺，Bo̍k-chhong--e珠仔會使得khioh轉來khǹg原位；koh來，「bah-soh--à！」看現場ê陣勢，中孔、邊仔孔攏有1粒珠仔tī孔邊，Lah-jih心內暗爽一下，紲落去是輪著伊， Lah-jih kā珠仔hē入去本孔，開始chu̍t，伊khû--落去，身軀身小可àⁿ-kē，倒手ùi孔邊掠一掠，正手提珠仔，珠仔ni tī tōa-pû-ong kap kí指中間，tōa-pû-ong tī下跤，kí指tī téng-koân，2蕊目睭niauh-koân，注神siòng Bo̍k-chhong--e ê珠仔，然後kí指kā珠仔按力lián倒轉chu̍t--出去，珠仔慢慢仔gô，輕輕仔碰著Bo̍k-chhong--e ê珠仔，「khiăk」一聲，Bo̍k-chhong--e ê珠仔tú好liàn到孔邊停--leh，Lah-jih 得著入孔ê權利ē-sái進中孔，ùi本孔半khû徛仔行5-hoa̍h koh khû--落去，掠一掠，珠仔tú好tī頭前，Lah-jih kā珠仔踫對倒爿hit孔，停tī孔前，半khû徛仔koh行5-hoa̍h，kā珠仔koh chhoā轉來到中孔，chit擺無hiah好運，珠仔停tī中孔倒爿，無法度sio-chhoā行，kan-nā「kho̍k 2下」進到téng-koân hit孔，chiah-koh chu̍t到中孔，無入孔，停tī孔邊。

逐个tiām-tiām看Lah-jih leh展功夫，看kah 1-爿歡喜1-爿懊惱，看Lah-jih已經失手，Ka-hiông--ē hit國隨時有笑聲，「hŏ͘！chit-má lín該死--à！A-ba̍k 換你！」

A-ba̍k功夫kap Lah-jih 不輸上下，A-ba̍k kā珠仔hē入去本孔，開始chu̍t，伊khû--落去，身軀身小可àⁿ-kē，倒手ùi孔邊掠一掠，正手提珠仔，珠仔ni tī tōa-pû-ong kap kí指中間，tōa-pû-ong tī下跤，kí指tī téng-koân，2蕊目睭niauh-koân，注神siòng中孔邊--a ê珠仔，chit-chūn中孔有2粒珠仔tī孔邊，A-ba̍k ê kí指kā珠仔按力lián倒轉chu̍t--出去，珠仔慢慢仔gô，輕輕仔碰著頭前Bo̍k-chhong--e hit粒珠仔，「khiăk」一聲，珠仔小可徙位，A-ba̍k得著入孔ê權利進到中孔，伊koh khû--落去，kā Bo̍k-chhong--e ê珠仔chhoā到正爿孔，又閣停tī孔邊1掠遠，做珠仔做kah足tú好，紲落去伊無kā Bo̍k-chhong--e ê珠仔koh chhoā轉去中孔，伊用較大力kā珠仔直接踫到倒爿孔邊--a，實在chiâⁿ厲害，又閣tú-tú-á好停tiàm孔邊，「pho̍k！pho̍k！pho̍k！pho̍k！…」有o-ló有鼓勵，噗仔聲鼓舞A-ba̍k iāng勢，紲落去伊kā珠仔送到téng-koân hit孔孔邊，chit-má A-ba̍k伊穩心仔半khû跳，親像水蛙按呢跳到中孔「kho̍k --2下」，跳到邊仔孔「kho̍k --2下」，koh跳到中孔「kho̍k --2下」，連紲跳到téng-koân hit孔，頂孔無珠仔thang「kho̍k」，A-ba̍k大概是歡喜過頭，一下無小心chu̍t無入中孔，chiōng按呢結束伊ê「演技」，peh--起來，手poāⁿ-poāⁿ--leh，換人chu̍t。

Chit擺人濟sńg真久，輪幾若擺猶無輸贏，第四輪輪著Lah-jih，伊koh展絕招，伊kā別人ê珠仔踫過來chhoā過去，帶動珠仔khǹg-tiàm孔邊，然後按本孔、中孔、正爿、中孔、倒爿、中孔、頂孔、中孔、正爿、中孔、倒爿、中孔順序，khû--leh peh--起來、khû--leh peh--起來一直「kho̍k」珠仔，無一tah久仔to̍h「kho̍k」轉來到本孔，第一个挽菜(ばんざい)，逐个看kah無nih目，ná-ē chiah厲害chiah gâu chu̍t！

人濟好sńg是好sńg，tn̄g-tio̍h高手A-ba̍k kap Lah-jih tī--leh，to̍h pìⁿ-chiâⁿ無好sńg，「kan-nā看in表演to̍h好，ā-sái ī！」有人抗議，需要考慮，逐家參詳，以後若是tn̄g-tio̍h人濟，to̍h分做2-場sńg，A-ba̍k kap Lah-jih mā-ài家己chām-chat，盡量niū人sńg，m̄-thang kan-nā顧家己表演。

後記：耍玻璃珠仔一般攏講tiak珠仔，手蹄仔(手掌)向天，用tōa-pû-ong kap kí指ni珠仔，tōa-pû-ong chhi̍h珠仔，用tōa-pû-ong ê 指甲kā珠仔「tiak」--出去；阮庄腳囡仔to̍h無仝款，是手蹄仔(手掌)向地，用tōa-pû-ong kap kí指ni珠仔，用kí指指頭仔尾下力kā珠仔「chu̍t」--出去，按呢chu̍t，珠仔chiah-ē tiàm土腳liàn，不過若是kan-nā sńg珠仔sio-kho̍k，to̍h隨在人按怎「tiak」、按怎「chu̍t」。

Lah-jih ê珠仔是四兄讀公學校時買--è，hia-ê珠仔kài-súi，nā-boeh ī挽菜OK，nā-boeh借來「khian」輸贏，to̍h-ē拒絕，因為用khian--e 珠仔ē破去，nā-boeh 耍用khian--e ê chhit-thô，阮攏用bâ-bui-chí，to̍h是the̍h來洗衫用ê「無患子」ê種子，kap龍眼核仔平大粒，真tēng〔硬〕。20110925_Lah-jih