看相片回想人生----1974讀暑期部空中教學班

 【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】

▲1965年做兵前參加大學聯考考無tiâu，koh bē-giàn去讀師專，to̍h按呢iân-chhiân到1974年，chiah m̄情m̄願去讀暑期部空中教學班，兩年4學期ê課程安排下班後看電視上課，另外安排兩个歇熱轉去學校上課。

每學期開學 著去學校選課買冊，學期尾chiah閣轉來學校考試，別人按怎讀咱m̄知，咱是讀無幾節課to̍h無耐性koh讀，尾仔連教科書mā無買，每學期註冊完to̍h是聽候考試。

來空中班讀冊ê老師雖罔是學校現任教師，既然是boeh來讀冊to̍h是學生，學生驚考試是無解ê定律，考試前大多數老師lóng緊張萬分，「平時m̄認真，臨時chiah leh o͘-mí-tō͘-hu̍t！」考試中，靜觀厝邊隔壁，有人chhi-chhi-chhu̍h-chhu̍h，有人想boeh探頭，監考老師是罔行罔巡，有khoàiⁿ ná無khoàiⁿ，mài siuⁿ過m̄是款to̍h好。

咱雖罔無準備，因為考題是100條選擇題，憑常識判斷，無30分鐘to̍h交卷。等待成績公佈--出來，全部及格平均7-80分，笑詼--e是第二學期考試，坐後壁彼位老師竟然要求「mài hiah緊交卷--lah！」伊kioh是我有gōa-khiàng--leh！窮實，無買冊無讀冊koh-ē及格過關，確實有夠khiàng。

歇熱轉去學校上課有分組，選音樂組著彈琴、唱歌鑑定，彈琴咱頇慢，歌聲算bē-bái，to̍h按呢kap 9个男生 40幾个女生合做一班上課，大部份是師範學校ê學長，年齡精差無幾歲，閣有仝款趣味，hit兩个暑假田中、台中來來去去，有時坐車有時騎o͘-tó͘-bái，都也心適m̄知艱苦。

老師學生面對面上課ê學期尾tn̄g-tio̍h考試，上驚驚填充題kap問答題，雖罔老師有暗示題目，總--是bē-hiáu to̍h是bē-hiáu，boeh按怎提分數？只有違背一向習慣ê良心，抄paper作弊(chok-pè)，心肝íⁿ-á phi̍h-pho̍k-chháiⁿ。考試偷看實在見笑，早tō按呢認定。

音樂組考試kài簡單，老師指定2首歌hō͘咱揀，咱選徐志摩作詞彼首『偶然：我是天空裏的一片雲，偶爾投影在你的波心，你不必訝異，更無須歡喜，在轉瞬間消滅了蹤影。你我相逢在黑夜的海上，你有你的，我有我的方向；你記得也好，最好你忘掉⋯』認真唱到chia，竟然真正『忘掉』bē記得尾仔結束hit段，有夠厭氣，目睭lió著老師已經96 tit-boeh chu̍t--落去，結果6改2，92分，噗仔聲koh bē少。