19550000_搖笱kap抱囝椅

19550000_搖笱kap抱囝椅：                   Lah-jih_20140326

文：蕭平治    相片：陳萬來

「eⁿ-á iⁿ-iⁿ-khùn，chi̍t-mê tōa chi̍t-chhùn，eⁿ-á iⁿ-iⁿ-sioh，chi̍t-mê tōa chi̍t-chhioh！」8歲囡仔用偝巾āiⁿ 1歲嬰仔，ná搖ná唸，ná唸ná惜，8歲囡仔是阿爸ê屘仔囝，1歲嬰仔是阿爸ê大漢孫，大人leh無閒，囡仔mā著tàu chhōa囡仔。

「睏去--à，來，tháu落來hō͘伊tiàm hàiⁿ-kô睏！」大嫂kā嬰仔khǹg-tiàm 幌笱，嬰仔精神又閣ŏaⁿ ŏaⁿ oaⁿ-oaⁿ叫，大嫂交代Jih--è繼續搖，「搖--à搖，搖到園--裏偷挽茄…」搖無兩下，嬰仔to̍h睏kah真ka-chōe，Lah-jih輕輕liam腳去外口家己sńg chhit-thô。

He 搖囡仔ê hàiⁿ-kô是用肥料袋仔thīⁿ--ē，雙爿chhng黃麻索仔，雙頭黃麻索仔長長縛tiàm眠床koaiⁿ kap壁邊竹管縫，嬰仔睏tiàm hit內面，kài-sêng hō͘人mo͘h-tiâu-tiâu，to̍h安心仔睏，有時koh-ē睏kah喙角微微仔bún笑，若tn̄g-tio̍h嬰仔家己驚醒mà-mà-háu，Lah-jih to̍h趕緊倚去輕輕仔搖。che是8歲時tàu chhōa阿爸ê大孫記智，1950年ê歷史。

紲落去阿爸ê孫1个1个來出世，除了塗跤蓆仔sńg、用手抱，上捷to̍h是用偝巾āiⁿ，hàiⁿ-kô搖。bē記得tang時厝內開始有竹ut ê iô-kô(搖笱)kap抱囝椅，細漢囡仔boeh睏to̍h khǹg-tiàm搖笱搖，搖笱仝款縛tiàm眠床koaiⁿ kap壁邊竹管縫，koh縛chit條索仔ē-tàng搝咧搖，ē-tàng ná寫字ná顧囡仔，che是囡仔chhōa嬰仔ê記智。

搖笱(iô-kô)：有人講hàiⁿ笱，用竹ut--è講做搖籃，雙爿頭縛索仔兩爿hàiⁿ來hàiⁿ去，後--來有人用索仔縛tiàm發條ē-tàng頂下sìm--leh sìm--leh搖振動，雖罔節省空間，m̄-koh對嬰仔頭殼發育無好。早期庄腳散赤，khioh he肥料、麥片、麵粉ê包裝袋，thīⁿ做軟sìm-sìm ê hàiⁿ-kô，boeh kā嬰仔囥落去睏有較費氣，m̄-koh嬰仔ē感覺較安全四是。mā有用細條索仔pīⁿ ê網仔笱。

抱囝椅(phō-kiáⁿ-í)：桂竹ut--è ê抱囝椅，tī早期庄腳農村所在，逐口灶攏ē有一隻，四跤落地時，ē使得大人做椅仔坐，若kā四跤péng向前，ē使得hō͘細漢囡仔坐，坐leh sńg，坐leh食物，坐leh睏攏真安心好勢。作田人無閒是天賜，查埔人無閒田園種作，查某人無閒厝內煮飯、洗衫、煠豬菜、曝粟kap chhōa囡仔、育囝…ta̍p-ta̍p-tih-tih一大堆，有時koh-tio̍h上山拾柴，田--裡tàu跤手。囡仔āiⁿ leh做穡有較麻煩，囡仔睏--去to̍h kā hē-lo̍h搖笱iⁿ-iⁿ-khùn，精神活動ê囡仔m̄是khǹg tī塗跤chhit-thô，to̍h是khǹg-tiàm抱囝椅坐，有大漢囡仔做伴sńg上好，若tn̄g-tio̍h大人無閒到bē記得囡仔boeh食奶，抑是放尿放屎無kā處理，據在伊mà-mà-háu，據在伊哭kah睏--去，猶是無人chhap--伊，to̍h ná像hō͘人苦毒ê新婦仔，所以有人kā抱囝椅講做新婦仔椅。

20140403_後發性白內障

20140403_後發性白內障 Lah-jih_20140501

正蕊目睭視網膜手術已經7年，白內障超音波水晶體乳化術換人工水晶體mā有3年外，最近目睭感覺愈來愈bông愈bū，tio̍h-koh來去病院檢查看覓。

4月3日檢查結果，正蕊無啥各樣，m̄-koh發現倒蕊有問題，醫生kí螢幕影像分析：視網膜有1塊庀仔kha̍h--leh，kap éng-kòe正蕊情形相仝，需要手術。

聽soah心肝ìⁿ-á chhoah-chi̍t-tiô，又閣著開刀？想起7冬前theⁿ-tiàm手術台ê無奈kap忍受1禮拜bē-tàng taⁿ頭、bē-tàng倒leh睏ê苦楚，實在不止仔鬱卒。醫生好心推荐「微創手術」ê好處、安全kap自費支出，因為代誌大條「需要kap厝內人參詳，後日chiah做決定。」

經過醫生朋友建議，ùi網路Google走揣7冬前hit位醫師複診，4月12日坐高鐵去台北檢查，特別提醒「7冬前視網膜是醫師你手術--è。」2蕊目睭經過各種儀器檢查後：

「倒蕊目睭小可白內障，視網膜ê各樣無嚴重，建議慢且開刀，每3 kó͘月做追蹤檢查to̍h好；正蕊人工水晶體發現有所在霧霧，che可能是最近目睭bông、bū ê原因，需要做處理。」

Ah m̄著koh換水晶體koh手術一擺？

「m̄免，用雷射tiak-tiak--leh to̍h好，kā你掛4月15日下晡ê診，無人做伴來無要緊，簡單處理--niâ。」

原來che叫做「後發性白內障」，teh tī心肝頭ê鬱卒隨時敨放，輕鬆想boeh唱歌。

雷射(LASER)照射處理，簡單bē-thiàⁿ，kan-nā聽著tiak tiak tiak ê聲音--niâ。因為目睭有點散瞳(sàn-tông)目藥水，天光日chiah感覺目睭忽然間做一下光--起來，倒蕊mi--起來，正蕊感覺特別光，連目睭內玻璃體ê小烏點、蜘蛛絲lóng-koh浮現，雷射ê功效to̍h是hō͘人工水晶體koh-chài thang-kng(通光)，醫術ê高明kap儀器ê厲害充滿新奇奇蹟，現代人破病hō͘醫生看，診斷、治療m̄-nā需要醫師ê醫術，mā需要有綴時代進步ê精密儀器。

無病m̄-thang kāu多疑，有病to̍h-ài醫，古早人講，「先生緣，主人福。」揣有信心ê醫生看病真要緊，有信心ê醫生tī tó位？聽人講？經驗談？抑是聽人講ê聽人講？上網查？Google--一下，ē-tàng提供真濟參考資料。

19520700_剉甘蔗：

19520700_剉甘蔗： Lah-jih_20140319

文：蕭平治     相片：蕭文章
三兄種ê甘蔗teh-beh剉，吩咐Lah-jih著去食甘蔗順紲tàu巡頭看尾，m̄-thang hō͘人偷giâ偷iap siuⁿ過濟。兩分外地ê紅甘蔗，人外koân、直lak-sak、tŏng大支，三兄ê phah拚得著好收成，ta̍k-ê o-ló「意仔叔確實gâu顧！」

三兄做穡頂真phah拚，ùi選蔗種4䈄3目開始到牽網仔cha̍h風，插柱仔縛篙仔，chit一年外來，不sám時to-ē khoàiⁿ三兄tī甘蔗園裡淹田、沃水，培壟、om塗，hē肥、pak蔗箬，特別tī甘蔗已經chiâⁿ人懸ê時，著愛tī外圍牽網仔cha̍h風cha̍h日頭，koh-tio̍h tī四周圍chhāi柱仔，用桂竹仔kā甘蔗1壟1壟kah-kah--leh，hō͘甘蔗ē-tit lōng-ko直欉koh大支，直koh大支ê甘蔗媠款賣較有錢，人講埔里甘蔗真出名，原因是埔里是山窩地形，無風無搖甘蔗自然直，m̄-koh猶是感覺三兄種ê「大箍紅」較好食，m̄-nā清甜koh真phò，連甘蔗頭ê甘蔗目都chhè-chhè真好gè真好哺。逐家歇睏時揀he短節曲痀ê甘蔗，用溝仔水洗洗--leh 免削皮to̍h嚙kah笑bún-bún，「紅布包白布，一喙食，一喙吐。」食soah，7-8个工人koh繼續做穡，有ê剉甘蔗，有ê修蔗根剁蔗尾，捆捆縛縛做一捆，m̄-boeh 成百斤，用量仔量好登記好to̍h夯chiūⁿ路邊牛車，mā有he熟似庄裏ê庄腳店仔注文1把2把家己夯轉去賣。三兄顧看秤花kap記斤兩，Lah-jih甘蔗ná嚙ná巡ná hoah聲：

「he súi--è 留leh hō͘阮賣，boeh 提提he短節曲痀--e！」

kā恁lo一寡蔗尾hō͘阮ê牛食！

「好--lah！」
「â！m̄-thang kā阮提hiah-chē--lah！」

三兄做人算是分張，m̄-koh chia提--一寡，hia lo--一寡，損失bē少，tn̄g-tio̍h小貪--e 無kā阻擋，實在ē好款，講也莫怪，散赤田庄所在，為著食，總--是ē有一寡「無惜面底皮」ê人，hoah罔喝，tòng罔擋，猶是目睭金金看人giâ leh走。

下面紹介一寡kap甘蔗有關ê語詞、動作：

1、Chhah kam-chià(插甘蔗)：kā甘蔗尾仔節，剁一節2目3䈄抑是4䈄3目ê甘蔗節做蔗種，平坦掩(om)tiàm土內，經過淹田沃水，2个目to̍h-ē puh-íⁿ。
2、Chhò kam-chià(剉甘蔗)：甘蔗插了後，經過1年抑是年半to̍h會使得收成，工人攑蔗keh仔Chhò kam-chià(剉甘蔗)，ùi塗肉ê所在剁斷。

3、Chià-keh-á(蔗鍥仔)：割草用草鍥仔，L形；剉甘蔗用蔗鍥仔，J形，刀尾鉤鉤ē使得kā甘蔗鉤倚身軀邊。

4、Pak chià-ha̍h-á(剝蔗箬仔)：甘蔗大欉需要kā蔗箬仔pak hō͘光生，pak落來ê蔗箬ē-tàng hiâⁿ火。

5、Chià-to(蔗刀)：刀形，１刀２用，刀嘴ē-tàng削、剁，刀肉有瓜剾仔ē-tàng剾。

6、Siah kam-chià(削甘蔗)：較早用蔗鍥仔削，需要技術，chiah-ē kā甘蔗皮削薄薄；chit-mái用蔗刀剾，緊koh方便。

7、Lân chià-kin(鱗蔗根)：剉--起來ê甘蔗頭猶有根著削掉，koh bē使得傷著甘蔗皮，所以tio̍h用拍魚鱗ê方式處理，叫做Lân chià-kin(鱗蔗根)。

8、Siu chià-kin(修蔗根)：鱗蔗根mā講做修蔗根，修hō͘好看頭。
9、Cháⁿ chià-boé(斬蔗尾)：甘蔗尾需要kā  bē甜部份剁掉，蔗刀攑chhu-chhu剁/phut--落去to̍h好。
10、Tok chò koe̍h(剁做劂)：1支甘蔗boeh分做2節3節，用cháⁿ--è 歹看樣，需要刀kap甘蔗成直角剁。
11、Chhiat chò ko̍eh(切做劂)：短節boeh分做2劂，需要khǹg tī枋仔頂切。
12、Chûi chò ko̍eh(chûi做劂)：踅圓箍仔sè-jī切叫做chûi。
13、Khún kam-chià(捆甘蔗)：甘蔗1支1支ná竹篙，頭尾需要捆捆縛縛較好搬徙。mā講做Pa̍k kam-chià(縛甘蔗)。
14、Thiu kam-chià (抽甘蔗)：ùi kui捆甘蔗抽--出來。
15、At kam-chià(at甘蔗)：無用刀，直接at斷。

16、Chià-hông-á(蔗紅仔)：未熟ê甘蔗，小可ē甜，ē食得。

17、Pû kam-chià (炰/烰甘蔗)：用火pû hō͘燒，有無共款氣味。
18、Suh kam-chià thng(吸甘蔗湯)/Phùi kam-chià phoh (呸甘蔗粕)：甘蔗tiàm喙內哺，kā汁suh入腹肚內，kā粕phùi出喙外。
19、Kam-chià chin-tiⁿ(甘蔗真甜)/Kam-chià bē-tiⁿ(甘蔗袂甜)：甘蔗好食雙頭甜。bē甜甘蔗鹹鹹。
20、Kam-chià siuⁿ-tēng(甘蔗傷𠕆)：siuⁿ-tēng oh哺。頭khah-tēng。
21、Kam-chià chin-phò(甘蔗真泡)：phò，to̍h是有湯閣有chhè[脆]。好哺好食。

22、甘蔗粕真phò大箍紅：一種品種，大箍、phò、好食。

23、Kam-chià làu-ham(甘蔗落䈄)/cha̍t-ham(甘蔗實䈄)：甘蔗1目1目叫做1䈄1䈄，䈄長叫làu-ham，䈄短叫cha̍t-ham。
24、Khè kam-chià(齧/啃甘蔗)；Gè kam-chià(嚙甘蔗)；Chia̍h kam-chià(食甘蔗)。
25、Giâ kam-chià (夯甘蔗)/Gia̍h kam-chià(攑甘蔗)；Ká kam-chià chiap(絞甘蔗汁)；Âng kam-chià(紅甘蔗)做四秀仔食；Pe̍h kam-chià(白甘蔗)製糖。

26、Phoà kam-chià(剖甘蔗)：這是一種相輸(跋輸嬴)ê趣味比賽，kā蔗頭蔗尾chûi(se̍h圓箍仔削斷)hō͘平平，chhāi 塗跤，蔗尾用蔗刀khoè--leh，然後相準準ùi面頂剖落去，1刀破做2爿算贏，贏--ē得甘蔗，輸--e納錢。先有人揀甘蔗hō͘人phòa，chiah有自認有把握ê人去phòa，通常贏--ē ē分一半hō͘輸--e。

27、Khōng kam-chià(khōng甘蔗)：先有人揀一支甘蔗，頭尾chûi hō͘ chê，chiah ùi中央部位剁1刀，刀肉tiâu--leh，並倚壁邊，然後隨人出䦰，有ê liàm草仔枝，有人用番仔火支、番仔火橐，唱明2劂甘蔗差偌長，出䦰好勢，kā甘蔗chûi斷相比，上接近--ē贏，差上濟--ē輸，贏--ē得甘蔗，輸--e納錢，通常贏--ē ē分一半hō͘輸--e。

28、甘蔗ê禮俗：嫁查某囝陣頭著縛2欉甘蔗，連根tài尾，有頭有尾、節節高升、大葩尾。

29、Nǹg kam-chià-hn̂g kau(軁甘蔗園溝)：參加考試考無tiâu，見笑ùi甘蔗園轉--去。

30、「Kah君約tī甘蔗溝，蔗葉拍結做號頭，夭壽啥人kā阮敨，害阮1人nǹg 1溝。」

31、第一戇，種甘蔗hō͘會社磅。

19560000_牛車： Lah-jih_20140221

19560000_牛車：   Lah-jih_20140221

牛車是5-60年代進前，農村猶未普遍機械化ê運搬工具，車粟包、肥料、甘蔗、蕃薯著伊，載石頭、沙仔、紅毛塗著伊，車嫁妝、柴頭ba̍k-koe̍h mā著伊，甚至載人看戲，載人看病仝款需要伊服務，ē使得講bû-se-put-chí載，m̄-chiah hō͘駛牛車牽牛車--e攏不止仔無閒koh趁有錢。

拖牛車--e是牛，giâ貨送貨起落--ē是人，攏需要力頭飽，耐操耐做有擋頭ê粗khang-khòe，一車貨物tín-tāng-tio̍h to̍h是5-6000斤，koh-khah重載--ē是7-8000斤，連同牛車m̄-boeh成萬斤，tn̄g-tio̍h chit款重載，牽牛車ê牛車兄to̍h-ài tiàm頭前陪牛哥行，kā牛哥加油tàu出力，抑是lêng牛鼻叫助手後面tàu-sak。貨物少ê時陣，抑是等貨落了後，牛車兄to̍h-ē坐tiàm頭前牛車koaiⁿ牽牛索攑牛摔仔指揮牛哥，若是穡頭做了已經黃昏，koh-ē趕牛小可lia̍p-lōng走，輕鬆唱山歌，看牛輕鬆仔走，一時感覺牛kap人互相依倚，saⁿ-kap做穡感心畫面，che是較早台灣人m̄食牛肉ê感恩心靈。

Tng牛車空載時陣，to̍h是囡仔坐牛車好機會，庄裏牛車有5台，耀輝--e ê牛車囡仔siōng-ài坐，m̄-nā bē kā人趕，koh-ē停落來hō͘囡仔坐好勢，耀輝--e生做武腯武腯，跤手猛掠，phah拚好鬥陣，tòa-tī隔壁內底，伊lóng-ē叫「Lah-jih--è 來頭前坐kap我做伙！」

Àu-ta̍t-á伯惡khia̍k-khia̍k，m̄ hō͘人坐to̍h是m̄ hō͘人坐，每擺若有人坐伊ê牛車to̍h氣phut-phut，狡怪好膽ê囡仔無大無細ài kā伊chhòng-tī，kì-chāi 伊趕，boeh坐to̍h是boeh坐，趕kah chiâⁿ煩時，規氣牛摔仔攑--leh 落車，囡仔自然走kah畚間去，聽候伊koh轉去頭前坐，囡仔又閣khi̍p-tiàm牛車道hàiⁿ--leh hàiⁿ--leh 笑hai-hai。

Sêng-á兄hoâiⁿ koh ok，一个面仔hm̍h-hm̍h m̄講話，逐个攏m̄敢坐伊ê牛車，雖罔Lah-jih好頭嘴tiāⁿ-tiāⁿ相借問「Sêng-á兄，你boeh去tah！」mā m̄-bat坐伊ê牛車。

牛車Jī--ē人tiām-tiām罕得kap人開講，囡仔坐伊ê牛車，tio̍h-ài用偷坐--ē，罕罕--à chiah-ē kā人趕。

上趣味to̍h是坐牛車Hok--à ê牛車，路頭路尾tn̄g-tio̍h lóng-ē停落來hō͘ Lah-jih坐，載到阮門腳口chiah 落車，別个囡仔boeh坐伊ê牛車，除了in內底ê人，其他免講，囡仔伴攏chiâⁿ欣羡Lah-jih，m̄免用偷坐--ē，原因是牛車Hok--à kap阿爸Chín-á叔公真bā，真有話講。

阿爸時常交代「m̄-thang偷坐人ê牛車，牛車leh行振動，按呢peh-chiūⁿ peh-lo̍h ē 危險。」阿爸雖罔無夠kut-la̍t做穡，教囝確實有伊1套道理。莫怪牽牛車--e 攏bô-ài hō͘人偷坐伊ê牛車，這m̄是ko͘-láu，是安全問題。

下面to̍h來紹介牛車ê構造：

牛擔：khòe-tī牛頷頸，彎曲像山形，大部份是刺竹牛擔。竹筍尺外懸，to̍h用模具引導伊定形，等到竹若sek到ngē-chiāⁿ tēng-pak chiah取落來しあげ(修飾)，這有專門做牛擔ê販仔提來牛墟賣。

牛鼻圜(gû-phīⁿ-khoân)：銅質，kǹg過牛鼻，縛索仔牽牛、指揮牛ê行動。

牛索：黃麻抑是瓊麻phah--è ê三股索，一爿縛tī牛鼻圜，一爿hō͘人牽leh指揮牛ê動作。

牛吊龍：牛鼻圜kǹg-tī牛鼻，tīn-tōng-hàiⁿ是一項負擔，所以kā牛鼻圜用細條索仔吊tiàm牛耳後牛niah所在，減輕牛鼻ê負擔，chit條索仔叫做牛吊龍(鼻龍phīⁿ-lêng)。

牛牽胸：牛擔khòe-tī牛頷頸，無張持ē溜--去，為著固定牛擔位置，用一條細條黃麻索仔ùi頷下箍起來縛tiàm牛擔兩爿，chit條索仔叫做牛牽胸。

牛坪仔：駛牛犁田時，牛擔連接犁鉤hit捾家私叫做「kha車」，若牛擔連接牛車台hit 2支柴篙，to̍h叫做「chhia-pêⁿ-á(車坪仔)」，hit 2支chhia-pêⁿ-á柴篙著用直絲用chiⁿ--e ê káu-chan-á(校欑)柴，káu-chan-á tēng-pak韌koh勇，ē堪得拖成萬斤ê重載。牛擔縛接chhia-pêⁿ-á用鐵箍鎖tiâu，過去是用藤抑是黃麻索chhiah成「8」字型縛tiâu--leh，m̄-chiah有一種用麵粉做成「8」字ê嘴食物叫做「kha-chhia-tîn(kha車藤)[麻花]」。

頂下磨盤：牛車ē-tàng轉彎踅角全靠頭前輪kap牛車台相連hit-ê「頂下磨盤」，頂下磨盤to̍h親像石磨仔ê頂下盾，ē-tàng tńg-se̍h。

牛車耳：牛坪仔有鉤仔kap牛車台ê牛車耳連結，是活動--ē。

牛車道：牛車台ê前後有橫杆(hoâiⁿ-koaiⁿ)叫做牛車道，ē使得坐人。

牛車杙á：牛車台ê兩旁邊--a有4-kâi鐵箍仔，ē-tàng chhāi牛車杙á，固定貨物。

牛車輪：早期ê牛車輪是柴造，外鉛包鐵箍，kauh著塗跤有深深ê牛車溝。後--來chiah換樹奶輪(thài-iah)。

寫到遮，雄雄想起詩人 陳明仁ê詩句：「牛車路，溝長長，想boeh相借問，你iⁿ-iⁿ-oaiⁿh-oaiⁿh ē-tàng行jōa遠，kám-ē行過阮故鄉ê田園。」懷念ê台灣水牛，懷念坐牛車ê記智，懷念ê庄腳牛車路ê牛車溝，「大頭--ē 大頭--ē坐牛車，牛車iⁿ-oaiⁿ叫，大頭--ē khih-khih笑！」