tio̍h kap tiō：

 tio̍h kap tiō：

一个學生姓趙名認真，見擺考試無及格，老師tō kā 趙認真 提醒著認真。

趙認真講：老師，我知我叫做趙認真，你m̄免hiah麻煩叫兩擺--lah。

老師：ná有kā你叫兩擺，我是叫你Tiō Jīn-chin tio̍h jīn-chin，聽有--bò͘？

學生：聽無！

紅霞：

 紅霞：

日頭落海出紅霞      紅霞媠噹噹      實在誠迷人      欲看紅霞等欲暗      看著紅霞心輕鬆庄跤田洋看紅霞     時間一輒久      霎時無看見      若無出日日中晝 哪有美景佇尾後

日頭斜西黃昏時      紅霞紅記記      夕陽無限好      毋通可惜近黃昏      當下參悟人生味人生可比紅霞出     欣賞無鬱卒      人生本是苦      苦甘滋味莫執著 不受後有真快樂

Âng-hê:

Ji̍t-thâu lo̍h-hái chhut âng-hê, âng-hê súi-tang-tang, si̍t-chāi chiâⁿ bê-lâng,    

                boeh khòaⁿ âng-hê tán boeh-àm, khòaⁿ-tio̍h âng-hê sim khin-sang.

Chng-kha chhân-iûⁿ khòaⁿ âng-hê, sî-kan chi̍t-tiap-kú, sap-sî bô-khòaⁿ-kìⁿ,

                nā-bô chhut-ji̍t ji̍t-tiong-tàu, ná-ū bí-kéng tī bóe-āu.

Ji̍t-thâu chhiâ-sai hông-hun sî, âng-hê âng-kì-kì, sek-iông bô-hān hó,

                m̄-thang khó-sioh kīn hông-hun, tong-hā chham-ngō͘ jîn-seng bī.

Jîn-seng khó-pí âng-hê chhut, him-sióng mài ut-chut, jîn-seng pún-sī khó͘,

                khó͘ kam chu-bī bē chip-tio̍k, put siū hiō iú chin khoài-lo̍k.

1991年11月1日台文通訊第四期

 1991年11月1日台文通訊第四期：

東方白先生ê意見，值得咱參考。

彰化溪州鄉西畔村（Sai-pêng-á）石塔仔：

 彰化溪州鄉西畔村（Sai-pêng-á）石塔仔：

聽在地人講古：1842年東螺溪做大水，溪水phôaⁿ岸水淹Sai-pêng-á庄，tī危急ê暗暝，石塔位置出現一個人徛tī一粒石頭頂，用手一直ia̍t，指揮引𤆬庄眾脫險。

仝時，有人點一葩火光炤路，Sai-pêng-á庄chiah無淹庄。有人講hit葩火是南瑤宮媽祖顯聖救渡。每擺南瑤宮媽祖若有割香勻庄，定定會來Sai-pêng-á石塔仔巡視保佑閤家平安。

後來庄民tī chia起石塔阻擋水災，mā號名石塔仔。

石塔是庄民信仰精神堡壘，是祖先留落來ê信仰資產。

Sàm-pō͘散步：

 Sàm-pō͘（散步）：

Hitnî joa̍hthiⁿ

（Hit年熱天）

Múiji̍t hônghun boehàmásî

（每日黃昏boeh暗仔時）

Asun-.ê tōē kōaⁿê khǹgtī akong sinkhupiⁿ

（阿孫--ê tō ē捾鞋囥佇阿公身軀邊）

Akong theⁿtī phòngí       ba̍kchiu mi-mi

（阿公撐tī膨椅 目睭mi-mi）

Asun-.ê kō͘ iùiùsèsè chhiútêá

（阿孫--ê撾幼幼細細手蹄仔）

Khinkhin kā akong tōathúi tah nn̄gsaⁿē

（輕輕kā阿公大腿tah兩三下）

Akong chengsîn kāgoán chhēngê

（阿公精神 kā阮穿鞋）

Chi̍tlâng khan chi̍tchhiú         chi̍tlâng khan nn̄gê

（一人牽一手         一人牽兩个）

Hoaⁿ-hí ê akong      chhōa hoaⁿhí ê asun

（歡喜ê阿公 chhōa歡喜ê阿孫）

Hāuhn̂g sàmpō͘ sìkèse̍h

（校園散步四界踅）

詹文聲教授台語薪傳賞 得賞感言：

 詹文聲教授台語薪傳賞 得賞感言：                  Lahjih  20201031

肯定我行ê路，肯定我做ê工。

感謝詹文聲教授ê台語薪傳賞，感謝台灣羅馬字協會推薦，感謝各位評審肯定。

Chit ê獎賞上大ê意義是：「肯定我行ê路，肯定我做ê工。」

1991年chiah知siáⁿmih是十五音，開始傳統音韻研究，想boeh做漢學先á。

1993年接受鄭良偉教授「漢羅lām寫」台語文觀念啟示，寫出頭一篇台語文〈阿爸ê鹿角薰吹〉，tō改變方向，kā「生活台語」chhuisak chiâⁿchò 我ê事工，boeh書寫生活台語 台語文，絕對需要Pe̍h-ōe-jī。

觀念ínchhōa概念，概念ínchhōa學習，台文通訊、台文Bóng報是糧食，台語網社團taigu@googlegroups.com是我精進ê好所在，電腦、台語輸入法是上重要工具，學E-Mail、學上網chiâⁿ做必要日常，除了家己進修，mā用心tī國小老師ê教學推廣。

Ùi TW301到HOTSYS-HAHSYS到KKS台語輸入法kap信望愛台語客語輸入法FHL Taigi-Hakka IME，m̄nā安裝使用，mā提出意見hō͘開發者參考，為著Pe̍h-ōe-jī台語文，有夠kepô cha̍pchhap，展現Lahjih甘草個性本質。

林俊育長老講：「漢羅書寫，王育德教授主張，鄭良偉教授提倡，鄭良光先生創辦台文通訊來實踐。」我是忠實支持者，一直歡喜kintòe後壁phahpiàⁿ。

1997年呂興昌教授指導牽教寫〈台灣俗語鹹酸甜〉，得著教育部獎勵，是肯定我ê才調，2020年ê今á日，得著詹文聲教授台語薪傳賞，是肯定我行ê路是正確ê路，肯定我做ê工是有意義ê工。

感謝逐家！感謝逐个來kā我鼓勵！

歡喜得「詹文聲教授台語薪傳賞

 歡喜得「詹文聲教授台語薪傳賞」

台灣羅馬字協會10月31日

Tiàm成功大學台文系頒發「詹文聲教授台語薪傳賞」

得著chit-ê獎賞，對我來講，意義贏過光榮，「肯定我行ê路 肯定我做ê工」是感想。

牽手、後生新婦、查某囝囝婿kap內外孫lóng來到現場觀禮kap逐家kā我鼓勵恭喜。

這是人生上歡喜ê 一工。

●Chiâⁿ hoaⁿ-hí lâi niá詹文聲教授台語薪傳賞             Lah-jih  20201031

●"Tio̍h-chiáng kám-giân" gōa lóng-tho̍k hō͘ ta̍k-ê thiaⁿ.

●Khéng-tēng góa kiâⁿ ê lō͘, khéng-tēng góa chò ê kang:

●Kám-siā Chiam Bûn-seng kàu-siū ê Tâi-gí sin-thoân siúⁿ. Kám-siā Tâi-oân Lô-má-jī-hia̍p-hōe chhui-chiàn, kám-siā kok-ūi phêng-sím khéng-tēng.

●Chit-ê chiáng-siúⁿ siāng-tōa ê ì-gī sī: " Khéng-tēng góa kiâⁿ ê lō͘, khéng-tēng góa chò ê kang. "

●1991 nî chiah chai siáⁿ-mih sī si̍p-ngó͘-im, khai-sí thoân-thóng im-ūn gián-kiú, siūⁿ boeh chò Hàn-o̍h sian-á.

●1993 nî chiap-siū Tēⁿ Liông-úi kàu-siū, "Hàn Lô lām siá" Tâi-gí-bûn koan-liām khé-sī, siá-chhut thâu-chi̍t-phiⁿ Tâi-gí-bûn" A-pa ê lo̍k-kak hun-chhoe" , tō kái-piàn hong-hiòng, kā "Seng-oa̍h Tâi-gí" chhui-sak chiâⁿ-chò góa ê sū-kang, boeh su-siá seng-oa̍h tâi-gí tâi-gí-bûn, choa̍t-tùi su-iàu PE̍H-ŌE-JĪ.

●Koan-liām ín-chhōa khài-liām, khài-liām ín-chhōa ha̍k-sip, 

Tâi-bûn thong-sìn, Tâi-bûn bóng-pò sī niû-si̍t, Tâi-gí-bāng "taigu@googlegroups.com" siā-thoân sī góa cheng-chìn ê hó-só͘-chāi,Tiān-náu, Tâi-gí su-ji̍p-hoat sī siāng tiōng-iàu kang-kū, o̍h E-mail, o̍h chiūⁿ-bāng chiâⁿ-chò pit-iàu ji̍t-siâng, tû-liáu ka-kī chìn-siu, mā iōng-sim tī kok-sió lāu-su ê kàu-ha̍k chhui-kóng.

●Ùi TW301 kàu " HOTSYS-HAHSYS" kàu " KKS Tâi-gí su-ji̍p-hoat" kap Sìn Bōng Ài Tâi-gí Kheh-gí su-ji̍p-hoat " FHL Taigi-Hakka IME", m̄-nā an-chong sú-iōng, mā the̍h-chhut ì-kiàn hō͘ khai-hoat-chiá chham-khó, ūi-tio̍h PE̍H-ŌE-JĪ tâi-gí-bûn, ū-kàu ke-pô cha̍p-chhap, tián-hiān Lah-jih kam-chhó kò-sèng pún-chit.

●Lîm Chùn-io̍k tiúⁿ-lo kóng:" Hàn-lô su-siá, Ông Io̍k-tek kàu-siū chú-tiuⁿ,Tēⁿ Liông-úi kàu-siū thê-chhiòng, Tēⁿ Liông-kng sin-seⁿ chhòng-pān "Tâi-bûn thong-sìn" lâi si̍t-chiān. Góa sī tiong-si̍t chi-chhî-chiá, it-ti̍t hoaⁿ-hí kin-tòe āu-piah phah-piàⁿ.

●1997 nî Lī Heng-chhiong kàu-su chí-tō khan-kà siá "Tâi-oân sio̍k-gí kiâm-sng-tiⁿ", tit-tio̍h kàu-io̍k-pō͘ chiáng-lē, sī khéng-tēng góa ê châi-tiāu. 2020 nî ê kin-á-ji̍t, tit-tio̍h Chiam Bûn-seng kàu-siū ê Tâi-gí sin-thoân siúⁿ, sī Khéng-tēng góa kiâⁿ ê lō͘ sī chèng-khak ê lō͘, khéng-tēng góa chò ê kang sī ū-ì-gī ê kang.

●Kám-siā ta̍k-ke!

●Kám-siā ta̍k-ê lâi kā góa kó͘-lē!