1950－2012_音樂、音響、sim-sek、sńg

1950－2012_音樂、音響、sim-sek、sńg    20121220_Lah-jih

Sim-sek是leh講sńg ê過程。

Sńg是leh講m̄是kài用心，kan-nā「好sńg」--niā-niā，bē-tàng chiâⁿ做內行人來展寶。

音樂主要是leh講學校ê教學內容。

音響是leh講Lah-jih一生聽音樂ê家私頭仔，按怎leh chhia-poa̍h-péng。

「Iū-koh leh chhia-poa̍h-péng--à，tiàm he電視櫃仔後壁壁堵lak hit-khang是boeh創啥？」

「講hō͘你bat，喙鬚to̍h好拍結，boeh chhng喇叭線起去樓頂--lah，按呢to̍h ē-sái-chit tī二樓房間聽音樂。」徛家樓仔厝kap隔壁兜無公家壁，壁堵kap壁堵中間làng 一縫，ē-tàng seh入去chhng喇叭線，tī樓頂安2粒鼓吹，ùi樓腳客廳主機分線接樓頂喇叭，按呢樓頂房間to̍h有音樂thang聽。有音樂thang聽，暗時to̍h加真好睏，1塊CD聽無5分鐘久to̍h睏kah kō͘ⁿ-kō͘ⁿ叫。

結婚20冬來，to̍h算hak chit組siāng-kài貴，組合音響，有CD，有卡帶，有喇叭，開4萬箍新台票，超過1個月薪水，歡喜是真歡喜，滿足是真滿足，講著錢to̍h感覺疼tiuh-tiuh。窮實m̄是看錢ná性命，實在是經濟ân-tòng-tòng，愛到--à，phî-phî kap牽--e參詳chiah決定--ē。因為khǹg tī人客廳，boeh聽家己kah意ê古典音樂，總是較無方便，為著加一套，m̄-chiah家己天才想chit步，iū-koh著kā牽--e 三ko͘-chiâⁿ四ko͘-chiâⁿ追加1對喇叭。

有較高級音響thang聽，to̍h開始趣味看音響雜誌，研究聽音響ê智識，接線、定位、開機、保養、排疊⋯⋯  ，總講一句，to̍h是boeh了解按怎pâi-thia̍p chiah-ē好聽，看音響雜誌siāng-ài看he音響器材紹介，看主編ê分析ná看ná趣味，ná看ná kah意，m̄-koh若看著價賬，kha̍p-bē-tio̍h著十幾萬、幾十萬，siāng-sio̍k--è mā著5-6萬箍，kan-nā想都m̄敢siàu想，只有癮仙膏ê份。看清現實，改善現有ê器材較重要，chhiâu-sóa 喇叭位置、kā喇叭thiap跤尖⋯  等等一寡撇步，若有一寡效果to̍h感覺心滿意足，m̄-chiah ē時常chhia-poa̍h-péng徙來徙去接來接去。

對好聽音樂聲感覺趣味，有記智ê年紀大概是tī 8-9歲時，囡仔時代常捷聽阿爸kap人挨弦仔唱七字仔，to̍h感覺真好聽，加減ē家己罔挨罔學，koh-iā小可挨有花字，差一點仔to̍h hō͘阿爸送去曲館學絃管。讀國校5年，頭一擺聽著老師彈風琴教阮唱歌，是第一擺接受西洋樂器，到讀初中chiah接觸著小吹聲、鋼琴聲、小提琴聲、品仔聲、口琴聲，聽著chia ê優美樂音，心內充滿新奇、趣味、欣羡，趣味是趣味，散赤保守ê庄腳囡仔是m̄敢siàu想boeh買啥物樂器來學。tī學校因為有琴聲ê伴奏，對唱歌koh-khah感覺心適愛唱，chiok-ài上音樂課，欣賞老師彈琴koh ē-tàng開嘴大聲唱歌。初二hit年，參加學校品仔隊，學ē-hiáu歕品仔，家己歕家己欣賞to̍h感覺足歡喜--è，有一工看隔壁班同學leh歕口琴，真好聽，to̍h探聽tī tó位買、gōa-chē錢，tiàm心內sìm幾若禮拜chiah決定寫批kā四兄討錢來買。讀師範學校時，bat聽過2擺演奏會，對ピアノ(鋼琴)、バイオリン(小提琴)產生真大欣羡，猶是仝款m̄敢siàu想boeh-ti̍h，一直到師範第三年下學期，lún-bē-tiâu慾望ê siàu想，chhân-chhân koh一擺寫批kā四兄討錢買1支バイオリン，可惜無錢倩老師教，只好家己「無師自通」學到put-tap-put-chhit。學音樂學無成，加減對樂理、樂器、演奏技巧有淡薄仔體會瞭解，chia-ê智識影響未來蓋大，m̄-nā ē-tàng tī學校彈琴教學生唱歌，mā ē-tàng休閒時間自我消遣gī-niū唱歌、欣賞音樂。

正規學音樂無koh siàu想，演奏樂器小可ē-tàng娛樂家己，欣賞音樂聽歌上趣味，聽音樂需要ラヂヲ(收音機)電唱機，厝前Chàn-seng-á in-tau有一台，有時聽電台放送，有時放唱片，伊koh-tī厝外安裝1粒喇叭pun人聽，每kái若聽著音樂聲，to̍h走去頭前門口埕bih-leh偷聽，聽kah耳仔phak-phak，放送--è攏是流行歌曲，m̄是台語to̍h是日語，ài唱台語流行歌攏tī 讀師範進前chit段時間無形中kah意--起來è，hit-tang-sî上kah意聽文夏ê歌。

踏入社會做老師，開始有薪水領，有錢to̍h有信用，經過朋友紹介kā電氣行頭家賒一台6粒球仔êラヂヲ(收音機)kah電唱機，免保證用嘴chhóaⁿ，to̍h ē-tàng 分期thoaⁿ納，提早享受聽音樂ê趣味。

人講「食飯食俺爹，趁錢趁sai-khia」，我是趁錢家己開，食飯食飯坩中央，兄嫂攏無khe-khó，每kó͘月薪水若領，較儉mā著去唱片行買1-2塊烏膠唱片來聽。後--來看朋友聽ステレオ立體聲，koh-khah siâⁿ人慾望，隔轉年iū-koh叫人組一組鐵殼仔8粒球仔立體音響，開去2-kó͘月較加月俸，將近boeh 2000箍，ステレオ立體聲有立體ê感覺，聲音ùi倒爿走kah正爿，ùi正爿走kah倒爿，實在希奇，聽he交響樂演奏kài-sêng聽現場，人聲、樂器聲pâi-thia̍p kah ná真--e，m̄-nā心適koh加真好聽。thó-chè開錢ê結果，mā加減影響著家庭ê活力，厝內有音樂，增加bē少鬧熱，聽歌仔戲、聽布袋戲，年節鬧廳歕春，加真有氣氛，可能是chit款緣故，阿兄阿嫂m̄-bat阻擋計較--過。

做兵退伍娶某了後，責任自然來，早前hit組音響已經歹去，暫時m̄敢想boeh hak新--e，簡單買手捾音響暫度，有音樂thang聽to̍h好，規日無閒tī學校教冊kap chhōa囡仔、幫忙牽手經營西裝社，因為稅厝徛，mā無閒工心情sńg音響。10年經過hak第一間ná粉鳥櫥2樓厝，生活小可安定to̍h-koh開始siàu想高級音響，chit時已經進入卡式錄音帶時代，耳孔開始kéng-koai，7-8千箍貨色bē-giàn聽，chiūⁿ萬以上閣無hit-lō才調，規氣閣等，成家結果to̍h是囡仔1-ê 1-ê來，生活開銷利不及費，無閒tī走chông顧囝顧家ê生活中，一目nih iū-koh過去3-4冬，總--是有較chhun-chûn ê時陣，kap某參詳結果，tī台中看kah意一組3,0000箍綜合機兼一對喇叭，試聽mā已經試聽好勢，等待1點鐘後納錢交貨，siáⁿ知陪太太去台中公園se̍h 1-liàn了後soah「暗頭仔食西瓜⋯  」反悔無boeh買，為著個人享受，開chiah濟錢實在開bē落--去，經過koh-chài chhiau-chhōe，chiah買1台17,000箍ê貨色，都也勉強滿意。

時間ná飛，除了固定月給以外，牽手經營ê西裝店幫贊真濟，囡仔會大，厝間猶原是粉鳥櫥，勉強koh買1間半舊落30坪店面，整修後到徙入去tòa已經是半百年紀，配合人客廳簡單設備，to̍h買1組環繞音響，有前聲道、後聲道、遙控、CDプレーヤー、卡帶，開去4,0000箍，chit聲真正進入「sńg」音響ê開始，過去hit段長ló-ló ê 20幾年來，對聽音樂、買音響ē-sái講充滿好奇、期待kap戇想--niā-niā，chit-mái chit台50瓦有環繞ê Amplifier hō͘人充滿期待。音樂會聽現場，樂團tī頭前台頂，樂聲是Stereo立體聲，左右分開，che Surround Sound環繞音響，人tī前後喇叭中間聽，he聲音是啥款感覺？是m̄是hit種四聲道音響？用想--ē 想bē出--來，趕緊動手要緊，開始牽線kā後壁喇叭掛tiàm壁頂，線路接好勢，開機、khǹg CD，揀hit塊有 Surround效果--è，樂聲一出現，kui-ê客廳khin-khin khiang-khiang、tin-tin tiang-tiang，前有後mā有，倒爿是提琴，正爿是鋼琴，猶有he鼓聲ná像tī樂團ê後壁位置？ná-ē chiah心適chiah趣味⋯，為著「好聲音」，開始chhiâu-chhe̍k喇叭位置，換訊號線、喇叭線，因為m̄甘開錢，貴--è開bē落--去，效果當然有限，sńg無半年to̍h感覺ià-siān，猶是聽he Stereo立體聲較實在，為著家己hèng聽古典音樂，m̄-chiah加買一對喇叭，分線起去樓頂，m̄-chiah tiàm he電視櫃仔後壁壁堵lak-khang，真正是天才chiah-ē想著chit款撇步。

音響常識無底深坑，開機進前一定著檢查接線是m̄是「正確」，開機進前音量需要「歸零」，chit種基本常識是kā hit台Surround Amplifier sńg報銷--去chiah知影ê智識。主機害去著換新--e，參考雜誌紹介去員林音響店試聽Orlle了後，開2,8000箍to̍h kā mo͘h--轉來，講著錢仝款開著疼tiuh-tiuh，m̄-koh「ŏa」一聲to̍h知影開錢開了有價值，「che m̄-chiah是真正音響！」pá-tīⁿ、sio-lo̍h、低音bē hm̄ bē chak、高音bē尖，真正好聲，聽he流行歌，iù-jī、輕鬆、聽ē出演唱者ê個性、情感，聽he siōng-ài聽ê古典音樂，koh-khah感動，Violin ê泛音柔軟mî-mî，piano聲tēng-pak mé-chhè bē拖沙，聲音1粒1粒chiâⁿ明，kui-ē樂團發出ê力頭power⋯，是頭一擺感受著『帕華洛帝』hām『破瓦落地』ê精差是啥物？che是配合hit對細支B&W ê效果，o-ló兼觸喙舌，滿意度9.5。紲落去買CD來聽是重點，古典音樂較kah意熟似ê音樂家Beethoven、Chopin、Mozart、Vivaldi⋯，西洋老歌、台語老歌、日本演歌，歌仔戲、南管kap現此時ê各種流行歌、演奏曲⋯，聽若kah意to̍h買，尤其是he發燒片、啥物幾粒星、TAS名盤，橐袋仔若飽飽隨時買轉來聽，耳孔聽kah ē出油，CD唱片1日1日濟，siáⁿ知ná聽ná歹款，對音響器材要求mā愈來愈kéng-koai(揀乖)，除了致重音質kap出力，開始斟酌大師劉漢盛所紹介「音響二十要」ê 超低音、音場、細節⋯，一組無超過5萬箍ê器材，boeh要求精密品質是無可能，總--是ē-tit聽著一寡éng-kòe m̄-bat聽著ê bass聲、微微ê伴奏聲，to̍h hō͘我thiòng入骨髓，目bui心bê，愈聽愈入迷，愈聽愈戇神，ná像食鴉片，音樂siâⁿ人迷茫ê關節tī chia，雄雄chiah發現作曲者、演奏者ê功夫ná-ē chiah-nī hō͘人欣羡敬佩。

人講「人心牛腹堵」，慾望永遠貯bē-tīⁿ，對樂聲ê追求從來m̄-bat滿足--過，牽--e看我聽kah chiah-nī注心滿意：「按呢滿意--à-ho͘ⁿh？」

「暫時真滿意！」

「ah無後日boeh-koh買--hio͘h？」

「He當然！錢水若有夠額to̍h-ē koh siàu想較讚--è。」

10幾年來，牽--e一直建議「等較有錢--leh！等較有錢--leh！到時chiah買一組足讚足讚--è，12吋ê喇叭，ē phōng koh-ē khiang--e⋯」。伊boeh-thài-ē了解無音樂ê生活是gŏa-nī無聊gŏa-nī ta-sò ê日子，真正「講hō͘你bat，嘴鬚to̍h好拍結」。

1994年開始趣味唱カラオケ(Karaoke)，hit台Orlle留leh純聽音樂用，koh hak 1台100瓦主機、大支喇叭kap VHS錄放影機、Echo混音機(迴音混音機)、mài-khuh(microphone)，開去5-6萬箍，che是規家口仔ê享受，開了chiâⁿ有價值。總--是對聽音樂ê要求m̄-bat停睏--過ê我，1995年，有一工看著田中街路新開一間音響店，入去參觀熟似頭家楊--先生了後，知影m̄是一般電氣行，to̍h pìⁿ-chiâⁿ店內常客，楊--先生bē囥步，tī伊hia得著真濟音響常識，koh ē-tàng tī伊ê音響室得著印證，伊了解我對聲音ê要求真龜毛，錢koh開bē落--去，to̍h紹介1對二手貨 瑞士小喇叭Pawel Acoustics Ensemble，允准搬轉來厝--裡試聽，聽到滿意chiah決定boeh買抑m̄買。真正好喇叭，一聽to̍h kah意，細支bóng細支，低聲真飽tīⁿ(滇)，聽鼓聲tēng-pak肉聲，高音順耳，聽女高音iú-jī鑽入雲頂bē鑿耳，中音上滿意，甘甜nńg-lio̍h koh耐聽，聽久bē ià-siān，試聽1禮拜決定留--落來，3萬ê價賬買10幾萬ê貨，tiông--tio̍h-à。無獨立聽音響室，只好kā家己ê睏房當做聽音響好所在，暗時牽--e tī樓腳看TV連續劇，家己to̍h tiàm樓頂房間聽音樂，迷醉tī音樂家、演奏樂團、演奏者、演唱者kap樂器之間ê對話。

退休後第二冬，有一工tī網路拍賣市場影著1台7粒球仔ê綜合機，看價賬boeh賣6萬箍，心iū-koh浮動，手iū-koh ngiau-ngiau，真空管發燒機，因為價賬貴蔘蔘koh oh侍候，一直m̄敢siàu想，忽然間看著chit台20瓦真空管綜合機，chiah boeh賣6萬箍，上網路揣經銷商看詳細，風評bē-bái，原價9萬外，ē-tàng做後級連結，使用無夠1年，ē買得，to̍h按呢開始進入球仔ê發燒世界。無聽無比較to̍h像鼓井水蛙，開機了後to̍h知輸贏，m̄是欣賞he球仔光影，是hō͘ he sio-lo̍h sio-lo̍h溫柔中閣有力頭ê聲音吸引，尾音ê延續chhèng高音自然無壓迫感，若是幼聲siu-soah，閣hō͘你聽kah一清二楚bē斷氣 清koh明，顯出ê人聲是中氣十足，感覺ē出演奏者ê投入，聽ē出作曲家幼膩ê思想舖排，感動tī注神中m̄敢喘氣，感動tī作曲者演唱演奏者ê天才kap苦練成果展現。真空管ê音樂輸出，人講是發燒管機，真空管ê痴迷者人講是發燒友，真正有影頭殼發燒phaíⁿ去？無聽過boeh-thài-ē了解，聽過了後chiah知啥物是樂聲，啥物是好聽，啥物是好物，啥物是High-End。

Sńg是tú好to̍h好，sńg了過頭to̍h pìⁿ-chiâⁿ失去聽音樂ê趣味。Lóng是因為散赤，學琴學無成，學音樂mā kan-nā限制tī學校ê課表內，偏偏to̍h是對音樂聲有意愛，m̄-chiah 4-50年來，浸tī聲音ê要求、音響ê追求一直無pàng-soah，因為錢開較bē落--去，無法度真緊達到希望，mā因為bē-tàng滿足現實koh充滿向望，chiah-ē sńg bē-siān，sńg bē-soah，che mā是一種享受。

人生70外，sńg音響聽音樂超過50冬，現此時使用J.C.Verdier 220DE擴大機，Rega Apollo CD唱盤，Pawel Acoustics Ensemble瑞士小喇叭，假使牽--e koh一擺問講：「按呢滿意--à-ho͘ⁿh？」

「滿意！滿意！非常滿意！」應該是m̄免考慮ê回答，雖罔心內猶原siàu想he百萬音響ê享受。