20140105_裁縫sai-hū kap i-ê ke-si： 【台文通訊bóng報2014年6--月第243期】

20140105_裁縫sai-hū kap i-ê ke-si：    Lah-jih_20140105

【刊tī台文通訊bóng報2014年6--月第243期】

裁縫sai-hū有2種，1種做女裝，1種做男裝，男裝師傅主要做西裝，hông 叫做西裝師傅，若kan-nā ē-hiáu做西裝褲，to̍h叫做褲sai。boeh做師傅tio̍h ùi師仔工做起，經過3年4個月chiah ē-tàng出sai，西裝師傅ê ke-si-thâu-á真濟，下面揀一寡khah重要--è做紹介：

一、裁縫車：日本話叫做ミシン/mishin，一般講 裁縫車仔，簡稱做車仔，古早裁縫車仔是用跤la̍p，緊慢由跤蹄控制，正轉倒轉tio̍h-ài練習慣勢，正車、倒踏針chiah-ē lia̍p-chia̍p 平順；裁縫車仔頂面有1粒車仔線，車針下面梭仔殼內面有纏線ê梭á-chí，由chit 2條頂下線滾絞交纏，to̍h-ē kā布kap布車相黏，梭á-chí纏線無濟，需要加纏較濟粒備用。為著趕khang-khòe，有人開始安mó͘-tah(馬達)代替跤la̍p，因為起動tòng-tiam̄快速敏捷，仝款ài練hō͘慣勢熟練chiah車ē緊捷liú-lia̍h。傳統ミシン安mó͘-tah若猶嫌傷慢，kùi-khì換 平車(SEWING MACHINE)，平車是成衣加工用，速度chiâⁿ-kín，歹控制，特別是倒踏針，閣較需要熟練，跤手hūn-tūn是chiâⁿ pháiⁿ-pháng chiâⁿ pháiⁿ學--è。

二、布床：布床是量布、製圖、裁剪、熨、thīⁿ、鉸、pâng ê平台，桌面lóng-ē chhu 1-têng帆布，較好操作。布床ê製作，簡單--e用2隻竹ut--è ê四跤馬仔，頂面khòe 1塊厚koh大塊ê合板；工夫--e 直接kā合板khǹg-tiàm事務桌仔頂；抑是kùi-khì chhiàⁿ kap-choh師傅做專用--ē。布床另外一个路用是師仔工暗時ê眠床。

三、鉸刀、鑽仔：鉸刀鉸布鉸線，鑽仔鑽孔ngiáu線，鉸刀上重要是hit支裁剪用ê裁縫鉸刀，lāi、輕力、好鉸、bē péng-pêng、ē tak尾chiah是好鉸刀，裁剪時lóng是2-têng布料疊leh鉸，布料若是毛織西裝料，有ê是厚tut-tut，鉸刀m̄-nā tio̍h lāi，mā著有重量，鉸著chiah-ē輕力，he 鉸刀ē tak尾是kài重要，1剪 鉸--落去，boeh鉸到tó位攏bē-tàng拖沙，到tah to̍h是到tah，尤其是開橐袋仔喙、鈕仔孔，鉸刀若bē tak尾，鉸過頭to̍h歹收山，tak尾to̍h是鉸到鉸刀尾猶是真mé-lia̍h kā布紗鉸斷ê意思。鉸刀若boeh lāi、bē péng-pêng koh ē-tak尾，鉸刀品質kap 保養真重要，除了布、線以外bē使得烏白鉸，磨kap修理著chhiàⁿ磨鉸刀師傅服務，鉸刀品質好bái，西裝師傅chiah-ē了解。

四、尺：做男裝慣勢用台尺、布尺、角尺、彎尺kap くじら(kujira)尺，罕得用公尺公分，台尺用來量布長kap褲跤尾闊度；布尺一面標公分一面標英吋，慣勢用英吋量身軀寸尺，所以kā布尺叫做ìn-chih帶仔；角尺是製圖用--ē，L形，頂面畫英吋，koh有1/3、1/4、1/6、1/8 ê寸尺標記，thang hō͘師傅hôa算，親像頷頸周圍是上圍[胸圍]ê 六分之一，胸圍ê四分之一是偌長，角尺已經換算好勢免koh麻煩家己計算，除了製圖以外，角尺mā ē-tàng量褲底[褲擋]；彎尺一支彎彎ná彎刀，用來製圖畫衫身彎曲部份，因為人客身材無仝，boeh偌彎偌曲，tio̍h靠師傅經驗變竅；くじら(kujira)尺是上捷用--著ê 一支尺，比台尺較長較細板，1尺10寸，1寸10分，師傅人攏簡單講做くじら，he是一支hôa算用ê尺，くじら 8寸=台尺1尺，8:10=0.8，くじら 1尺=15吋，10:15=2:3=0.66，講--起來花sà-sà，m̄-koh經過長期換算ê結果，師傅車thīⁿ需要用尺時，kan-nā chit支くじら to̍h好勢liu-liu。日語くじら to̍h是海翁[鯨魚]，原來くじら(kujira)尺to̍h是鯨尺，是換算用ê尺。

五、熨斗：製圖、裁剪，布料著舖平，衫仔紬(thiu)、褲紬、頷領、手ńg箍、袋仔蓋ê造型，西裝、衫褲成品ê整形，lòng tio̍h熨斗去熨平、固定，特別tī身軀phòng--一下 naih--一下ê所在，需要用熨斗ê熱度去pôaⁿ ho͘開、pôaⁿ hō͘有貼身ê形體，親像褲底若pôaⁿ有形體，穿--起來m̄-nā pih-tsah好看，koh好khû、好走、好giâ-koân，師傅ê功夫tī chia，師傅ê鋩角tī chia。較早熨斗用火炭火，熱度歹控制koh費氣，後--來用電熨斗to̍h加真方便，布料boeh熨進前需要噴水，chit-mái ê熨斗攏kâⁿ水蒸氣，真正方便。

六、針線kap布指：針 chhng線boeh thīⁿ鈕仔、phah線釘、pâng褲跤尾、tioh毛sín[毛襯]、tioh試穿，需要用thīⁿ針，一支細細支仔，出力時需要布cháiⁿ來tú針腳，布指套tī中指尾節，大垺翁kap kí-cháiⁿ攑針thīⁿ，布指拄針鼻sak力，m̄驚布厚仝款針入針出，快速無比，華語號名『頂針』有理。che布指古早用布tān，chit-mái是アルミ(輕銀、鋁)ná手指。針車用--ē是車仔線，過去用棉紗線，chit-mái用lóng線khah勇，比thīⁿ線較幼，為著特別用途mā ē使得用粗線。

七、粉土：粉塗比粉筆khah粉khah iù-jī，hûi角薄薄三角形，製圖畫sûn用，塗粉bē tiâu布，用尺拍拍--leh to̍h無--去，bē kā布料bak lâ-sâm，看是無重要，無伊koh bē使得。

感觸：裁縫業師傅教sai-á，採用師徒制，使用家私kan-nā尺一直無改變，直接使用公分直理直路m̄用，偏偏使用台尺、英吋、くじら三種無仝長度ê尺hôa來hôa去lām-leh用，害師仔工sa無cháng，著用3年4-kó͘月ê時間來學，實在無科學了時間，傳統行業若無改變，綴時世bē著，注定趁無錢。