看相片回想人生_1948/8→1954/7國校7冬：

看相片回想人生_1948/8→1954/7國校7冬：
【看相片回想人生，是leh描寫Lah-jih ê記智，mā是leh紹介70外冬來ê生活一點一滴，講古兼敨放心思。】
▲這是人生第一張相片，翕tī 1950年6--月，斯當時讀田中鎮第三國民學校2年乙班，tī學年結束bueh歇熱進前集合tiàm後壁棟教室前翕tsit張相片，實在是真無簡單ê緣份，感謝學校長陳成章先生kap親愛ê級任盧淑琬老師。
12冬後師範出業分發轉來母校教冊，頭一擺擔任觀摩教學，已經調任田中國小ê盧淑琬老師有來參觀，有kap伊相認，此後suah bē-hiáu去kap伊相揣，等到做兵轉--來，聽講老師已經結婚搬去日本，to̍h 按呢m̄-bat koh見面。
Hit-tsūn ê庄腳囡仔，生做gōng-sòng gōng-sòng，查埔囡仔剃光頭，穿黃岩色khah-khih衫，有ê kan-nā穿縛帶仔ê內褲。查某囝仔頭毛lóng是鉸烘爐喙，穿花仔布衫裙，全班kan-nā副班長陳碧雲有穿鞋，tshun--e lóng是褪赤跤。
木造khàm瓦教室，有天窗有地窗，光線充足空氣流通，無電火無電風，塗跤無khōng紅毛土，熱--人tsiâⁿ涼，寒--人冷sih-sih，烏色烏枋，白墨寫--起來ē落漆，擦烏枋時phông-phông-ing。雖罔男女合班，可是罕得lām-leh tshit-thô，真趣味真心適ê因緣，男女同學suah等到大人大種結婚生囝了後，tsiah leh相認，坐佇學校長正爿這位是阿圓--ā(陳圓)，kap伊做厝邊已經20幾冬，算是上有緣份ê女同學，伊時常o-ló我囡仔時tsiâⁿ-khiáu tsiâⁿ定著，伊mā kài怨嘆kan-nā讀到三年仔to̍h無koh繼續去街路本校讀。
第二排徛tī學校長正手爿hit个to̍h是我，hit年2學期lóng是第一名，做班長，有一擺kap另外一位查埔同學上台演話劇，我演『老公公』伊演『小華』：『年老公公，白髮蒼蒼，一個不小心，跌倒路當中』『過路的小孩看見了，急忙走過來，快快扶起公公來』⋯記智tsiâⁿ深，懷念ê趙同學已經bē記得模樣生做。

 ▲Tsiah-nī古錐ê囡仔相，大約是8-9歲tsiâⁿ-tsa̍p歲，suah bē記得是幾歲翕--è，khah-khih衫肩頭有肩章，頷領hit鈕鈕仔liú kah四正四正，為啥乜ē翕tsit張相？貼身份證用--ē？ná像是mā ná像m̄是，因為照規定兒童14歲tsiah-tio̍h申請身份證。
△Tsiah-nī古錐ê囡仔，4歲to̍h無老母，看bē--出來--ho͘ⁿh。
原因是伊生做tsiâⁿ乖tsiâⁿ好頭嘴，gâu讀冊mā gâu-sńg，大人緣好囡仔緣mā真讚，bē因為讀冊gâu to̍h hiau-pai，囡仔伴一大陣，m̄-bat kap人冤家相罵，厝內兄嫂疼命命，連厝邊頭尾庄內ê大人長輩mā lóng真照顧。
厝內粗重空課m̄免做，生活 規矩，讀冊寫字m̄免老爸費氣，大嫂二嫂照顧細叔親像後生，m̄-tsiah戇戇仔大戇戇仔過日，suah bē感覺失去無愛ê稀微。
唯一hō͘阿爸受氣(siūⁿ-khì)--è是「îⁿ-tîⁿ」個性，衫褲破無補無愛穿，穿外褲定著愛hâ皮帶，每擺為著破衫破褲無補無愛穿，害阿嫂著趕緊攑針揣布隨時補hō͘我穿，阿爸to̍h罵我「你tsit个囡仔有夠iⁿ-tîⁿ！」

▲田中國民學校4年級下學期歇熱進前翕--è：
1948年入學讀第三國民學校1年級2年級，升3年級hit冬，明禮國校成立，原來第三國民學校suah成做第一國民學校分校，倚近第一國民學校tsit三里ê學生自按呢pìⁿ-tsiâⁿ第一國民學校ê學生。升4年級to̍h kap本校學生sio-lām，阮hit班全部是查埔學生，級任是四川籍游傳章老師，游老師ê頭殼有hō͘銃子飛著ê pa-khî[疤痕]，一撮 白白 無頭毛，學生囡仔私底下叫伊白頭khok-á。Hit-tsūn老師tuà宿舍，學生ê作業lóng是Lah-jih mo͘h去宿舍交hō͘師娘，等候老師批改好勢，tsiah-koh mo͘h轉來分還同學。
老師tsiâⁿ歹，振動著to̍h是搧喙䫌攑箠仔摃，he學生囡仔ná像m̄驚摃m̄驚phah ê款，phah了閣再phah，猶是仝款狡怪仝款蠻皮tsok-gia̍t，有ê同學kui-khì褲內seh課本。
Hit-tsūn學生囡仔大部份攏剃光頭、褪赤跤，有ê kan-nā穿內褲，褲帶tīn-tōng-hìⁿ。第一排正手爿第一个 khû--leh hit个to̍h是Lah-jih，面腔看--起來 加真巧氣，雖罔成績m̄是頭一名，老師mā是hō͘我做班長。
學期尾有一位少年人來tshuā阮唱歌拍球tshit-thô，3工後to̍h翕tsit張全班團體相，koh加1个無熟似ê老師，10冬後師範出業做老師才知，倒爿彼位是黃木杞老師，中央彼位是猶leh讀師範ê葉茂杞老師，伊是來實習--è，正爿這位to̍h是級任游老師。

 ▲19530900_放牛食草牛仔班 20121201_Lah-jih

1948年8歲入學田中第三國民學校讀一年級，有甲乙兩班，hit-chūn頂潭里、中潭里、龍潭里、三民里、三光里、大社里ê囡仔攏tī chia讀冊，升3年--ē ê時，三民里、三光里、大社里ê囡仔tòe學校搬去外三塊厝，頂潭里、中潭里、龍潭里ê囡仔留tiàm原來tī員集路大溪邊ê學舍讀，原來學舍soah chiâⁿ做田中第一國民學校ê分校，阮mā chiâⁿ做田中第一國民學校ê學生，男女合做 1班。升4年--ē 徙去街路田中第一國民學校本校，因為男女分班soah hām本校學生sio-lām，無外久仝班同學to̍h熟似liù-liù，雖罔學生lām來lām去，校舍徙來徙去，總--是感覺趣味新奇，每日讀冊歡歡喜喜，無特別認真mā無啥乜壓力，上課下課快快樂樂。升起去5年--ē，pún-chiâⁿ是仝班同學，攏是學校leh pìⁿ把戲，讀無二個月to̍h閣再啥乜「能力分班」kā阮拆開，好朋友四散無仝班，感覺真可惜，Lah-jih編班考試第19名編tī甲班，熟似著khah gâu讀冊ê同學mā算bē-bái，m̄知啥物原因「能力分班」一個月後to̍h破功，猶原恢復原來班級，逐家歡喜kah，快樂時光無外久，學校又閣kā阮chhiâu-chhe̍k 1擺，téng-pái是gâu kap頇慢分班，chit擺是boeh升學kap m̄升學分班。

Bē記得是五年下學期學期中抑是學期尾，級任胡老師有來家庭訪問，問阿爸：『要給蕭平治考初中嗎？』

「老師問講敢boeh hō͘我考初中--là！」 阿爸當然是鴨仔聽雷m̄知啥意思，Lah-jih做翻譯。

「你kā老師講：無法度to̍h是無法度--là！」

老師講『好可惜喔！』

『好可惜喔！』『好可惜喔！』，『好可惜』m̄是好話，因為『好可惜』kap「無法度」仝意思，『好可惜』ê結果，to̍h是hông編入「牛仔班」放牛食草，也to̍h是hông hìⁿ-sak拋荒ê開始。

六年級有5班，3班升學班安排kap辦公室仝棟，男女各1班無boeh升學ê牛仔班安排tī離辦公室上遠ê南爿面，隔壁to̍h是水田，播田割稻看現現，是學校ê『邊彊地區』。『邊彊地區』是hō͘人流放ê所在，阮chit-tīn m̄-bat世事ê戇囡仔soah kā看做天外天，好chhit-thô ê樂園。教室向南起，chit種起法真ku怪，走廊出--去3-4步to̍h是田，教室後壁to̍h是北爿，有後尾門，外口有鳳凰木、chhêng-á(榕仔)kap運動埕，闊莽莽，有單槓kap兩个所在ē-tàng畫躲避球場siàng肉球，是運動、chhit-thô、sńg ê好所在。

新學年開學，換新級任戴老師，少年親切gâu招呼，hit-chūn功課表有公民訓練、說話、讀書、作文、寫字、算術、珠算、公民、歷史、地理、自然、美術、勞作、音樂、體育，雖罔無按功課表，逐科加減攏有leh教，siáⁿ知教無1個月戴老師to̍h hông召去做補充兵，換來一个陳老師，有人講伊m̄是老師，是來代替戴老師--e，陳老師教冊ná像無經驗，大部份m̄是伊讀hō͘阮聽，to̍h是叫阮讀hō͘伊聽，連算算術mā家己唸家己算，然後to̍h叫阮家己算家己寫， 美術、勞作、音樂、體育m̄-bat教，重要ê課ná像kan-nā國語kap算術--niâ。

其實che mā bē-tàng怪陳老師，攏是學校無重視，kā阮看做無效m̄免讀冊ê學生，乖乖六年出gia̍h(業)to̍h好，人he升學班將來boeh考初中，tio̍h-ài加強補習，m̄-chiah學校有啥物需要學生囡仔tàu做ê khang-khòe，攏是叫阮牛仔班去做，親像有人boeh來巡視，需要大摒掃，抑是boeh種樹仔，boeh種草疕⋯，攏是阮查埔牛仔班負責，囡仔人ài-sńg，ē-tàng tiàm 外口ná做ná chhit-thô，總比tī教室內唸冊歌較趣味好sńg。

人講讀冊讀tī尻脊骿，有影--neh，hit-chūn boeh chah ê冊也無幾本，阮攏用一條大條包袱巾包包縛tiàm尻脊骿，to̍h ē-tàng ná行ná走ná chhit-thô去學校，mā有人捾ka-chì-á，有冊揹仔thang揹--ē無幾个。自從陳老師kā阮上課，to̍h愈來愈無sêng leh讀冊，早起出門開始滾，滾到學校猶leh滾，飼牛囡仔放牛食草，chit-tīn牛仔囝自然放放m̄讀冊顧chhit-thô，早自修ê齣頭̄是hap-sian開講、走相掠，寒天時tiàm壁角相lòng kheh燒講是麻油車leh「chiⁿ油」，tio̍h sńg到老師來抑是朝會chiah-ē歇睏。第一節教國語第二節教算術，第三節m̄是唱歌to̍h是hō͘學校派去勞動服務，第四節講是慰勞運動課，國語、算術課是照課本內容讀讀--leh，然後該寫--è寫，tio̍h算--è算to̍h準tú好，上心適--è to̍h是音樂課，m̄免課本，m̄免風琴，mā無歌譜歌詞，老師kan-nā講一句話to̍h ē使得坐leh欣賞。

「第一个， 大頭一--è。」 老師點第一个學生。

「a-so͘ a-ē a-ḿ--ā，前khok後khok鼻pêⁿ-pêⁿ，目睭大大目眉垂，肚臍hiàn-hiàn真愛笑，你若m̄笑--一下 我to̍h無愛kap你好。」陳金一gâu tèⁿ-khong-tèⁿ-gōng，ná唱歌雙手ná比，比頭殼，比目睭，比肚臍，表演猶未soah逐家to̍h笑kah ha̍h-ha̍h叫。

「A-kiat-á！換你。」 大頭一--è 點名。

 A-kiat-á唱1條萬里長城萬里長，tăⁿ唱soah阿洋已經攑手喝聲「我！ 我！ 我！」

「好！阿洋，換你。」

阿洋趕緊chông起去台頂，「eⁿh-heⁿh」1聲開始表演：

「我boeh唱蘇武牧羊，蘇武ē-á ē--ā ē，」「ah 我bē-hiáu--à！」隨走落台跤，ná走ná叫「王木樹換你！」⋯⋯

老師坐tiàm辦公桌hia真正『無為而治』，學生1齣閣1齣，有歌聲有pho̍k-á聲，有喊喝有笑聲，鬧熱贏過冬尾戲。chit種音樂課重複閣再重複， 大頭一--è 逐擺唱「a-so͘ a-ē a-ḿ--ā⋯」阿洋仝款làu氣伊ê「蘇武ē-á ē--ā ē，」老師輕鬆，囡仔歡喜。

體育課閣較好sńg，老師tàn一粒球hō͘班長to̍h OK，學生家己畫躲避球場ī siàng肉球，裁判家己做，按照家己設ê規則sńg，力頭飽ê人一直khian一直siàng，較細漢--è較軟chiáⁿ--è只好一直閃一直bih，閃kah相碰，bih kah phak落塗跤， 有人sńg到規身重汗，有人滾kah規身軀o͘-sô-sô，頇慢sńg--è看kah起愛笑，等到鐘聲響，逐家喝爽chiah結束。有時ē sńgじんとり(陣取り/囚徒基地)，chit種遊戲kài趣味，比單純ê走相jiok較有變化，人數6人到20人分兩國，一國佔一欉樹仔做「主」，兩爿chhoā頭先じゃんけんpōe輸贏，輸--e hit國派一个人先走，贏--ē mā派一个tòe後壁jiok，一个jiok一个，後壁--è ē使得掠頭前，hō͘人掠--著tio̍h趕緊轉來「主」，若比對方慢到to̍h-ài hông禁tī對方陣營⋯⋯，sńg法複雜有變化，重點tī走飆相jiok，牛仔跤走bē-siān，下課sńg10分鐘感覺無tap無sap bē-kòe-giàn，m̄-chiah ē利用上課sńg hō͘夠氣，有時sńg過頭，有人走田岸路jiok對田洋仔去，soah bē赴轉來上課，bē赴上課to̍h bē赴上課，mā免緊張，極加hông罵hông罰徛--niâ，hit-tang-chūn 扑、罵、罰徛、罰giâ椅仔枷是四常ê chheⁿ-chhau，「chia̍p罵m̄驚，chia̍p扑bē疼」，啥乜是bē見眾啥乜是見笑代，都攏無感覺。

放牛食草to̍h是án-ne-seⁿ，上課無sêng上課，讀冊無sêng讀冊，等到下學期戴老師退伍轉來，功課已經tòe-bē-tio̍h-tīn，老師有心想boeh教阮加減bat--一寡， 可惜逐家已經蠻皮慣勢成自然，放放m̄讀冊， 而且學校kā阮看做義務工仔差遣猶原無變，老師只有牽牛食草，行1步算1步，3個月後阮to̍h「畢額(業)隨人事農工商各奔鵬程慢你」，Lah-jih領著牛仔班第一名鎮長賞，歡喜2工to̍h開始hō-lí-hō-sō m̄知boeh創啥？悲哀！

▲田中第一國民學校第9屆畢業生六年戊班(牛仔班/無bueh升學)1954年6--月翕--è：
總共65个男生，奇蹟是竟然出2位國小老師，蕭平治kap邱慶利，其他m̄是作田to̍h是做工做生理。斯當時應屆畢業生著畢業考試，結果全班Lah-jih考上懸分，6科277分，全校排名108。Lah-jih是koh讀1年補習班tsiah有讀初中，邱慶利按怎做老師m̄知影，he是伊轉去台東以後ê代誌。第二排中央hit个是Lah-jih。級任老師是戴華德老師。

△畢業證書：

△2014年戴華德老師有轉來參加田中國小退休老師聯誼會會餐，m̄知已經幾十年無見面。

△畢業考試6科277分全校排名108，竟然得著鎮長賞：

1954年田中第一國民學校第9屆畢業生有5班，縣長賞全校kan-nā 1个，是鄭光甫，鎮長賞1班1个，六年戊班牛仔班得獎是蕭平治，獎品精裝標準國語詞典1本，另外提著(國民黨)服務站站長賞，獎品細本字典1本。

tsiah-ní ló͘ ê成績ná-ē得著鎮長賞，因為是1班1个，而且六冬成績總平均Lah-jih是9.？，全班第一懸分。是因為牛仔班hō͘學校放牛食草tsiah 變成全校108名。所謂ê國民義務教育，哪會tsiah-ní無公平？m̄知枉屈偌濟愛讀冊ê囡仔栽？

當年鎮長蕭鴻是阮崁頂人，服務站站長是陳再福。

△1952年六年級發ê田中國民學校學生成績記錄冊：

△1954年1月：13歲半，身高126.5公分，體重29.7公斤。

 △六年級成績有學校長、級任印章，是老師ê筆跡。3、4、5年成績是Lah-jih家己抄自舊成績記錄冊。

▲日治時期田中公學校舊照：Download FB〈台灣國定古蹟編篡研究小組〉 相片

△Lah-jih讀過兩間國民學校，一、二、三年讀田中第三國民學校，to̍h是tsit-má ê三潭國小，師範學校出業tī這間母校教15冬。四、五、六年kap補習班讀田中第一國民學校，to̍h是tsit-má ê田中國小，tī這間母校教28冬到退休。

Tsiâⁿ熟似ê記智，建築物kap1954年ê記憶仝款，學校門倒爿是人家厝，牆圍仔頭前kap街路徛家亭仔跤平闊，學校門通路正爿有2棟柴造教室，khàm安全瓦，風頭壁是柴枋仔，tsit 2棟是低年級教室，通路入--去是老師辦公室，磚仔起，tsiâⁿ-súi，正爿hit棟是5年級教室，倒爿看bē著是6年級教室。閣過去是禮堂，兩爿mā有教室，禮堂南爿to̍h是運動埕，運動埕南爿有2棟教室，東爿是放牛食草ê牛仔班，西爿是4年級。

比較下面tsit張1945年四兄卒業紀念冊ê相片加真早，因為樹仔較細叢。

△1945年四兄卒業紀念冊：學校門。

 △1945年四兄卒業紀念冊：高等科卒業生，上後壁排中央穿烏色--è是蕭有朋(Chiu-á兄)，後壁背景是木造大禮堂。

 △1945年四兄卒業紀念冊：初等科卒業生，後壁排中央電火柱前穿烏色--è是四兄蕭順強，後壁背景是木造大禮堂後壁面。

▲光頭taⁿ-á剃好，看起來有較gōng-sòng，穿khah-khih衫肩頭有肩章，頷領hit鈕鈕仔mā liú kah四正四正，倒爿衫仔袋閣有插萬年筆(bān-liân-pit/鋼筆)，著！著！to̍h是三兄提30箍hō͘我翕tsit張相去報名考補習班，因為有讀hit 10 kó͘月ê補習，tsiah有後--來初中、師範、做老師ê人生。

▲19540900_惡補10個月kap鄭來生老師：
Lah-jih_20121120投稿《台文戰線》

Kā人講Lah-jih讀牛仔班出業無人ài信，「讀牛仔班ē-tàng做老師？a̍h有可能？」

50歲hit年主持阮hit屆國民學校同窗會，會後猶有人leh問：Lah-jih你chit-má leh創啥？

1954年7月初，田中第一國民學校第九屆出業，結束6年讀冊生活，畢業典禮結束，手裡phóng 1張畢業證書、2張獎狀、1本詞典、1本字典，內心歡喜得著鎮長賞kap服務站長賞，che是牛仔班第一名ê榮譽。轉到厝--裡 阿爸、阿伯攏o-ló，阿兄、阿嫂mā一直kā人展：「阮Jih--è 真khiàng，得著鎮長賞，1班chiah 1个，真無簡單。」

Siáⁿ知歡喜無幾工，to̍h歡喜bē起來--à，kui工閒仙仙，四界hō-lí-hō-sō，m̄知boeh創啥？阿爸叫去田裡khau草，khû無幾分鐘to̍h講boeh轉去厝--裡 看冊，看chi̍t-kho͘ 「o͘ⁿ」--leh，除了讀過ê教科書，哪有啥物「冊」？只是貧惰借口--niā-niā，規氣來去chhoē囡仔伴chhit-thô，根熟牛仔班已經sńg年外，慣勢--lò͘。

7月底，A-ba̍k A-chiàng相招kā阿爸講：「阮boeh招Lah-jih--è 來去考補習班，好--bò͘？讀補習班to̍h ē-tàng去考初中--ō͘！」

「A̍h有法度！」che是阿爸慣勢ê話母，聽聲to̍h知伊ê無奈，無錢所致，只有tiām-tiām無出聲。

「Lah-jih！恁三兄tī店仔hia叫你去。」三兄leh叫定著有好空--e。

「Jih--ē，chit 30箍提去翕相kap報名！」原來是A-ba̍k kap A-chiàng去講hō͘三兄知。Che是頭一擺參加比輸贏ê考試，結果Lah-jih考tiâu，A-ba̍k A-chiàng 「nǹg甘蔗園溝轉--來」， A-ba̍k A-chiàng in阿公按呢keng-thé in 兩人考無tiâu。

升學主義日人時代to̍h有，日本人轉去了後補習風氣猶原繼續，1954 hit年，學校為著方便考無tiâu ê學生進修，特別招chit班補習班，因為報名人數siuⁿ過濟soah著用考試來分輸贏，錄取60-thóng个，二八水、chhân-tiong-ng、社頭攏有，上遠一个tòa三家村，因為無學籍，免納學費，其他參考書、簿仔鉛筆、考試紙需要交錢hō͘老師代買， 擔任級任是鄭來生老師，he「補習班」ná像變通辦法成立--è，有人講是「7年級」，阮家己消遣講做「補chi̍t-khang」。

「補chi̍t-khang」9月1日開始上課，學生多數是考初中考無tiâu抑是考無理想，無--to̍h像Lah-jih按呢牛仔班出業--è，ē使得講程度低成績無好ê學生khioh-khioh做伙補習ê 1班，ē記得6--月畢業考，總共考6科，Lah-jih chiah考277分，是牛仔班第一名，m̄-chiah鄭老師教阮ùi 4年級下學期復習起，然後chiah紲接 5年級6年級，9月1日到隔轉年7月1日投考，mā-chiah 10 kó͘月，時間有夠迫。

復習4年級下學期功課ná像leh走飆，無半個月to̍h影過--à，閣來老師to̍h ná教ná復習ná考試，1禮拜小考至少10擺，每個月著mo͘h-leh-khàu 1擺 [模擬考]。老師chiâⁿ有計畫，小考用--ē ê考試紙是kā 8開畫圖紙切做6份，雙面ē使得用，寫算術10條tú好tú好，考國語考常識mā適合，boeh分boeh收，boeh寫boeh改攏真利便，「交換改」ē-tàng節省老師氣力kap時間，快速有效率。che是「補1孔」ê班級，無leh教寫字無leh教了解kap欣賞，ē-hiáu寫正確答案為第一，練習練習閣再練習，考試批改考試批改閣再考試批改，老師刻鋼板油印ê考卷攏印刷3份以上，chit禮拜教了著用，後個月復習mā著用，後學期總復習當然著用，m̄是內行ê明星老師bē-hiáu按呢計畫。鄭老師是hit-tang時 ê惡補名師，面 生做戽斗戽斗，khan 1支圓形烏框目鏡，chiâⁿ有形威，惡khia̍k-khia̍k，ē giâ籐條摃人尻川䫌，學生囡仔真驚--伊，家長卻是真佩服--伊，尻川後學生攏叫伊「阿猴--ē！」

講著「phah」，Lah-jih實在ē驚，在來to̍h乖巧gâu讀冊，厝--裡hō͘阿爸phah ê經驗 ē-tàng算擺，學校hō͘老師phah mā kan-nā讀4年--ē hit-pái， hit-pái 閣是因為無揣大支箠仔hō͘老師，惹老師受氣所致。聽講鄭老師phah學生是按照考試成績決定，Lah-jih讀牛仔班，成績足ló͘--è，恐驚ē時常hō͘老師phah，驚惶tī心內，不時leh觀察老師hia 是m̄是有箠仔抑是籐條，好佳哉，kan-nā有一支kí烏枋ê教鞭--niâ，m̄是籐條。tn̄g-tio̍h考試無及格時，老師mā無用phah--è，kan-nā罵罵--leh to̍h準tú-soah，若是無認真聽老師上課，伊ē khian粉筆提醒，真準--ō͘，罕罕chiah-ē khian m̄-tio̍h人，所以逐家攏m̄敢tèⁿ-siáu，乖乖仔上課。

Hit-tang-chūn國民學校ê課程包含：公民訓練，國語(說話、讀書、作文、寫字)，算術(筆算、珠算)，常識(社會：公民、歷史、地理；自然)，工作(美術、勞作)，唱遊(音樂、體育)。高年級月考考國語、算術、 公民、歷史、地理、自然6科目，初中入學考試kan-nā考國語、算術kap常識3科，m̄-chiah老師siōng-kài致重算術chit科，國語科字形、注音、造詞、造句ngē記上有效，鉤破音kài bái-châi，老師ē特別提醒，若是歷史、地理，仝款死記、死背無撇步，因為he歷史、地理也m̄是講古kap chhit-thô，若boeh講透機，話to̍h講bē離，beh thái-thó有hit-lō͘美國時間，而且chit方面ê智識老師敢to̍h有法度了解lōa-chē？自然科仝款用暗念暗記，啥物觀察、實驗，連聽都m̄-bat聽--過，總講一句，常識科暗記、ngē記、背了閣再背，然後考試看效果to̍h-tio̍h。

早起7點開始上課，下晡慢1點鐘放學，中晝歇睏點半鐘，著行20外分鐘路轉去食飯chiah koh轉來學校，囡仔跤m̄知thiám，記得是1個月後，老師講後禮拜著開始加強補習，開始進入戰鬥，chit-má boeh調整上課時間：早起仝款7點上課，下晡照學校時間5點放學，暗時6點to̍h-ài轉來學校上課，10點放學，1個月ê補習費收20箍，電火錢貼2箍。老師講早起時較有精神，所以10點進前教算術，10點後教國語kap常識，下晡復習兼考試，暗時mā是教算術kap考試、練習。國語、常識用背--ē認真記較無問題，算術to̍h較食力，+ －× ÷ ê四則計算是無問題，當教到分數ê除法，尤其是分數除分數時，真正tn̄g-tio̍h大困難，m̄知boeh按怎算，老師烏枋頂比手話刀講kah嘴nōa全波，Lah-jih台腳「有聽沒有懂」，聽無to̍h是聽無，考試紙分--落來，仝桌許榮吉一時仔寫了了，老師1聲「交換批改」，許榮吉攏總「著」100分，「Lah-jih--è，你攏m̄-tio̍h--liah！」知--lah，iàn-khì tī心內，bē-hiáu當然mā攏m̄-tio̍h。

「 Lah-jih--è，看我ê，改改--leh！」許榮吉是一年級讀到四年級上mah-chih ê同學，細細聲kā考試紙tu倒轉--來。

「逐家改好--à-ho͘ⁿh，100分--e giâ手。」老師利用「交換批改」時間lim茶pok薰小歇睏，許榮吉100分 kā手giâ koân-koân，順紲kā Lah-jih ê手tàu giâ-koân，chit種重複ê戲齣演boeh到1個月，謝天謝地，無人發覺，老師mā一直「莫宰羊」無感覺，感謝好朋友tàu-saⁿ-kāng，mā感謝家己「作弊(choh-pè)」度難關，閣非常認真kā「chit孔」補--起來，3個月後，成績「突飛猛進」進步到家己mā驚chi̍t-tiô，每10擺考試ê平均m̄是70外to̍h是80外。為著boeh刺激競爭效果，老師閣用1步，kā每10擺考試ê成績按懸低分 排名次 定坐位，第一名坐頭前排正爿第一位，上尾名坐上後壁，Lah-jih ùi中排一直向前行，到kah下學期第一位to̍h罕得有人kap Lah-jih爭，chit時老師mā發覺著Lah-jih ê才調，聽同學叫「Lah-jih」，伊mā tòe人叫「 Large」，伊閣kā阮解說講「Large」to̍h是「大--ē、偉大」ê意思。

「算術」教學，頂學期重點tī整數、分數、小數ê加減乘除運算，下學期to̍h開始「應用問題」ê開破kap挑戰，老師想盡各種比論，背公式，教撇步，比手兼畫刀，用心開破hō͘學生理解，學生to̍h ná背公式、ná算看覓、ná參考老師ê撇步，確實是困難挑戰。長度是十進位，面積是百進位，體積是千進位，十進位百進位容易理解，啥乜是千進位to̍h oh-tit了解，面積kap地積有啥乜無仝？特別是he立體形ê表面面積，看ē著頭前面to̍h看bē-tio̍h後壁面，看ē著正爿to̍h看bē著倒爿，看ē著頂面to̍h看bē著下面，算kah霧sà-sà；和差問題、水流問題、有餘 kap不足問題，認真聽認真算to̍h ē-hiáu；像he雞兔關仝椆，頭幾粒，跤幾支，問你雞幾隻兔幾隻？實在無合理；上tiau-kó͘͘人ê題目是：1粒露螺peh 2.55公尺koân ê竹篙，日--時peh 45公分，暝--時倒退lu 15公分，請問露螺幾工ē-tàng peh-chiūⁿ竹篙尾溜？真正考倒師傅。有時老師mā開破到家己gāng--khì，補習到chit坎站，大部份同學攏頭殼mo͘h-leh燒，Lah-jih soah愈算愈趣味，有時老師koh-ē問我按怎算？老師講：「m̄是bē-hiáu算，若用代數算真緊to̍h算ē出--來，老師只是m̄知影boeh用啥乜方法，chiah有法度kái-phòa hō͘逐家了解ē-hiáu算。」真正有影講kah hō͘你bat，嘴鬚to̍h好phah結。

鄭老師確實是明星老師，教算術一流--ē，特別「應用問題」，伊用畫圖說明，比「圖解算術」參考書閣較詳細頂真，強調每列一个計算ê「式」，lòng tio̍h簡單寫說明文字，伊講說明文字寫ē出--來，to̍h證明已經了解，而且koh要求阮一定著排hō͘整齊。若tn̄g-tio̍h he真pháiⁿ說明真pháiⁿ了解ê問題，伊to̍h強迫ài用ngē記--è，kap記he歷史年代、地理位置仝款，只有按呢，chhun--e無啥物撇步。親像boeh按怎分別是除--ē 抑是乘--ē，伊to̍h強調hit字『的』ê意思，『什麼的⋯』後壁一定是「 ×」法，閣特別用台語講「siáⁿ-mih ê⋯」一定是乘法。「5角ê鉛筆買5支，著gōa-chē錢？」當然用乘法，若「15平方公尺ê土地切做3塊，每塊gōa-chē？」若用乘法去算敢著？chit款ê撇步soah hō͘ Lah-jih感覺怪怪懷疑懷疑。窮實講，解題ê撇步，鄭老師確實教真濟閣真有道理。

人生變化無定數，改變Lah-jih讀牛仔班命運，鄭來生老師算是非常重要ê貴人，siōng-kài感謝--ē to̍h是第一學期伊無giâ箠仔phah囡仔，tī Lah-jih表現頇慢hit段日子，ē-tàng hō͘ Lah-jih維持自尊，安心phah拚讀冊，雖罔tòe-bē-tio̍h進度，時常考無及格，而且無法度完成課後宿題，tī厝--裡因為宿題bē-hiáu，寫kah phak-tī桌頂哭，老爸m̄甘soah叫Lah-jih mài讀，是家己堅持boeh讀，是因為老師bē kā人phah，chiah-ē繼續讀--落去，hit段時間，10個月ê日子，只有歇禮拜日kap咱人過年2工，大部份上課ê日子是早起6點to̍h出門，下晡kap boeh暗仔轉來食飯，暗時著讀到10點放學，chiah koh半行半走20外分鐘，到厝已經更深夜靜，kan-nā chhun阿爸猶未睏leh等Lah-jih入門，有時閣有宿題ài寫，著chhiân到11點外chiah ē-tàng去睏，按呢--無打緊，若tn̄g-tio̍h透風落雨天，真正有影liân-hôe-á嬸婆--òe，有夠苦憐--ē，仝庄2个同伴蕭國照kap蕭吉平攏boeh歇睏，kan-nā chhun Lah-jih孤一人出門，暗時10點放學，boeh行20分鐘暗路，是暗眠摸ê暗路，hit-chūn學校門口有1-pha 60-che̍k電火球仔路燈，著閣公里外chiah koh有 1-pha，chhun--e只有天星抑是月娘做伴，落雨答滴北風sǹg-sǹg-kiò，無雨幔moa布袋，戴一頂大瓜笠，阿爸hō͘ Lah-jih穿伊ê雨鞋chah 1支手電仔(火)，交代m̄-thang 一直chhiō，電藥(電池)貴蔘蔘，hō͘你做膽to̍h好，行街路猶算好行，過第二pha路燈以後to̍h真hiau-hēng，尤其行轉來到Tóng-á潭，路邊全是刺竹模，àm-sàm無看路痕，北風一直吹，竹模to̍h iⁿ-oaiⁿ吼，路邊樹影tī烏暗中搖--leh搖--leh，穿hit雙阿爸ê雨靴管，chho̍p--leh chho̍p--leh伴著寂寞心情，土腳雨水tòe雨鞋噴濺到跤後曲，更加冷ki-ki、寒sih-sih，驚惶、恐怖leh giâu-gî，心內愈想愈驚，腳步ná hoa̍h ná緊，m̄敢越頭看，一心一意注心細膩看手電仔chhiō路，頭lê-lê只想向前行。50年代ê囡仔lóng mā驚鬼，敢講Lah-jih m̄驚，「心正m̄驚鬼」Lah-jih細漢to̍h按呢了解，雖罔驚惶，猶是心神掠定家己安慰。

戰鬥ê日子1工1工一直過，決勝負ê日期mā漸漸迫近，老師開始調查「boeh考tó位？」 boeh考tó位？戇戇 Lah-jih猶閣m̄知 boeh考tó位？ 探聽同學chiah知有彰中、員中、實中、北中可選，hit-chūn各校單獨招生，聽人講彰中siōng-kài歹考，to̍h決定報名彰中。老師緊張繼續leh加強，學生toè-leh繼續leh加油，老師sa出法寶開始phah囡仔，「籐條giâ-chiūⁿ手，m̄管chhin-chiâⁿ抑朋友。」有夠衰，頭一个開張to̍h是Lah-jih，因為常識科考無到老師訂ê標準，phah 2下，「large--è，boeh考彰中--lioh！」順紲khau-sé警告，好佳哉，無見笑，因為已經是班--裡 第一名。

考期到，老師親身chhōa學生「chiūⁿ驚赴拷」，第一節考國語，老師無問輸贏，第二節考算術，Lah-jih輕輕鬆鬆，下課鐘響，老師緊張萬分「是非題第二題，你答著抑m̄著？」

「m̄著！」

「ò͘！我知--a！」老師一聲我知--a！Lah-jih心內mā已經倒頭栽，hit題m̄著去--à，1題4分，倒扣4分，算術只考92分， 冤枉， 實在冤枉， m̄是Lah-jih bē-hiáu，是Lah-jih認真聽老師ê話：「面積kap地積無仝，面積單位是平方公尺平方公里；地積是leh算土地、田地，單位是公頃、公畝，千萬m̄-thang hut m̄著--去。」

Hit第二題是非題是按呢寫：

有一塊地，長30公尺，寬20公尺，面積是600平方公尺⋯⋯(      )

Lah-jih ê答案是(－)m̄是(+)，現了8分，實在冤枉，好佳哉實力有夠，猶原考tiâu彰化中學，學號4585，敢是排名第85名？

講實力有夠m̄是pûn-ke-kui leh膨風，鄭老師gâu教是真--ē，Lah-jih gâu讀mā是真--e，hit-chūn初中一年級上學期猶原有算術科，hit學期翁慨校長抽考，算術科Lah-jih考97分，同時97分有3个，因為Lah-jih列式整齊，寫字端正閣有說明文字，得著一年級全校第一名。

想起10個月ê無暝無日，m̄管透風落雨，無管讀kah lōa艱苦，考券1張閣1張，考試考了閣再考，m̄驚暗sàm路有lōa恐怖，冷風霜雨有lōa苦楚，hó-ka-chài，戇戇條直個性，m̄知影thang哀，認份歹命m̄知影thang吼，kan-nā知影讀冊真趣味，m̄-chiah gōng-sòng gōng-sòng一直拚，假使hit-chūn知影艱苦m̄-tam輸贏，to̍h放棄機會，m̄知影今仔日ê Lah-jih ē pìⁿ-chiâⁿ啥物款ê運命？寫到chia，家己soah為著細漢時陣目箍紅。