▲Tsā-hng(昨昏)行程拖傷久，さっぽろっ(札幌)街路景點看無著，to̍h利用下早 起程坐車se̍h一下仔，雖罔阿岳有紹介，無落去參觀總--是較無彩，車駛無緊，沿路看著1881年明治時代ê時鐘台(塔)，到今猶閣ē振動，真正是日本國寶，猶有1888年落成ê北海道廳舊紅磚廳舍kap警察署，電視塔，然後tsiah去小樽(おたる)。
▲小樽(おたる)是觀光城市，除了有古早運河kap倉庫，koh真濟古早「新巴洛克建築」，秀面tsiâⁿ-súi tsiâⁿ特別，kap咱大目降(Toā-ba̍k-kàng)(台南縣新化)舊街ê巴洛克建築無仝，各有特色，不過人維護了較有氣質較原味清氣。
Kui條街路ê「新巴洛克建築」，lóng改落去做生理場，商店、餐廳、咖啡廳kap賣玻璃藝品，tsia ê玻璃工藝tsiaⁿ發達，in kā玻璃講做硝子(グラス)。
Tī小樽音樂盒堂本館門口有一座歐洲式ê音樂鐘，是水煙式(蒸汽式)，定時ē吼出像五分仔車母ê汽笛聲。阮入去內面參觀，mā有交關囡仔kah意ê音樂盒。有一間咖啡廳推銷lim咖啡送有hello kitty ê咖啡甌仔，兩老--ē to̍h趁lim清芳ê咖啡，一甌無夠氣koh-tsài紲杯lim一甌。
Se̍h是se̍h bē完，看mā看bē了，時間有限tsiah 兩點鐘久，to̍h集合起程，直接到4日前飛來日本北海道ê機場千歲空港。半路tn̄g-tio̍h日本航空自衛隊飛行表演，小可管制，逐家看kah tsiâⁿ趣味心適，tshìng-kuân、分裂、吐白煙、倒頭栽、相閃身tsit款刺激危險ê飛行，較早做兵to̍h bat看過飛虎隊表演，實在技術絕等。
利用等飛龍機ê時間，四界lau-lau--leh，食一下子點心，翕一个相，然後登機phű--一下to̍h轉來到桃園機場，結束4暝5工 Tshit-thô北海道 ê旅途，tshit-thô kah tsiâⁿ順序，tsiâⁿ歡喜，tsiâⁿ滿意。
△1881年明治時代ê時鐘台(塔)，到今猶閣ē振動，真正日本國寶。
△北海道廳舊紅磚廳舍，1888年落成。
△路邊光景。
△小樽(おたる)運河。
△新巴洛克建築。
△小樽音樂盒堂本館門口ê歐洲式音樂鐘，是水煙式(蒸汽式)，定時ē吼出像五分仔車母ê汽笛聲。
△囡仔kah意hello kitty 咖啡甌仔，兩老--ē 趁lim清芳ê咖啡。
▲咱大目降(Toā-ba̍k-kàng)(台南縣新化)舊街ê巴洛克建築，秀面tsiâⁿ媠。
△小樽音樂盒堂本館內面足濟無仝造型ê音樂鐘，等候人客來交關。
沒有留言:
張貼留言