Tshit-thô北海道----第三工、湯之川→函館朝市→行經洞爺湖→昭和新山→熊牧場~贈送熊餅乾與可愛棕熊互動→定山溪
代先來函館早市參觀消費，車到停車場，載走行李ê車mā tī tsia，原來是按呢--ò͘，行李OK，行向函館朝市，ùi-tsia已經看出阿岳能力，台語滑溜，華語ē講，日語gâu講，m̄是普通ê厲害。
▲函館朝市：
函館朝市是現代化建築市場，清氣衛生，行入內面，海產滿滿是，逐隻鮮tshioh-tshioh，有魚、蝦、蟹、鰇魚應有盡有，果子菜蔬有夠鮮koh幼字好食款，蘋果、網仔瓜[哈蜜瓜]、水蜜桃kap無籽葡萄。上hō͘咱o-ló--è是排疊整齊，擔仔位塗跤清氣tang-tang，招呼人客禮貌十足，有一擔釣鰇魚，現釣現刣現處理，生食ùn わさび，好sńg是好sńg，kō͘尖鉤仔鉤有較無合現代愛護動物ê要求。看著he 1碗1碗pho͘鮭魚卵ê丼物／どんぶりもの，喙瀾水giōng-bueh tin--落來，驚做食了礙著腹肚，只好kan-taⁿ giàn sian-ko。後生買1葩無籽葡萄食看覓，芳甜幼膩無籽規粒哺，規世人m̄-bat食過tsiah-nī好食ê葡萄。坐車進前peh上停tī海墘ê古早連絡船，阿岳講自動車ē使得駛入去れんらくせん船艙內面。
△現代化建築ê市場，清氣衛生。
△內面規劃整齊清氣相。
△蚶仔貝類tsiah大粒，猶leh吐水。
△蘋果、網仔瓜[哈蜜瓜]、水蜜桃kap無籽葡萄。
△停tī海墘ê古早連絡船れんらくせん，自動車ē使得駛入去船艙內面。
▲行經洞爺湖：
參觀函館朝市了後，繼續前往昭和新山(しょうわしんざん)，沿内浦湾(うちうらわん)一直se̍h，遠遠ē看著有珠山(うすざん)壯觀形威，是一座活火山，山頂猶leh bok白煙。tsit tsuā路駛不止仔久，ùi内浦湾南爿駛到北爿，路邊樹仔無懸，有時koh-ē出現藍色海洋，以有珠山為背景，景色tsiâⁿ媠，看bē-siān。沿内浦湾(うちうらわん)一直se̍h，
▲來到昭和新山(しょうわしんざん)已經晝，治iau要緊，佇這間飯店食三丼日本料理，有火鍋，有さしみ，mā有米飯，to̍h是合味，滿意。食飽小歇睏，店外口行行--leh，tsia是庄腳所在，電火柱仔掛電桶牽電線，飛來兩隻烏鴉(o͘-a)，規隻烏sô-sô ê o͘-ah-á tī北海道不sám時看ē著，並無歹吉兆ê意思。
△三丼日本料理，有火鍋，有さしみ，mā有米飯，to̍h是合味，滿意。
△歇tī電火柱頂ê烏鴉。吼聲ah ah ah ah！
▲上車無5分鐘to̍h到昭和新山(しょうわしんざん)是一粒位火山，是tī1943年12月到1945年9月期間噴發tsò-tsiâⁿ ê火山，火紅山尖有時koh-ē噴煙。前面有草埔，囡仔上歡喜，日頭tsiâⁿ猛，戴帽仔翕相有烏影，團員ti7-tsia翕tsit張團體相做記念。
△熊牧場看熊：
上車無5分鐘to̍h到熊牧場，看一寡準棕熊hông關tiàm紅毛土窟仔內，實在無啥乜心適。行行看看--leh準tú-suah。
▲とうやこ(洞爺湖)沿路：
參觀熊牧場suah，上車阿岳講：「各位鄉親，pún-tsiâⁿ今仔日行程到遮suah，因為時間猶閣早，咱to̍h ùi洞爺湖ê南爿tshuā逐家來去西北爿サイロ展望台看光景，tsit所在較少人踏跤到，景緻tsiâⁿ媠。沿路斟酌看路邊正爿，to̍h是洞爺湖，咱bueh ùi南爿se̍h到西北爿，m̄-thang失去欣賞ê機會。」
今仔日se̍h兩擺半圓形ê路程，一擺是頂晡沿内浦湾(うちうらわん)se̍h到昭和新山，下晡bueh ùi昭和新山se̍h洞爺湖到サイロ展望台。
とうやこ[洞爺湖]是アイヌ語，是一个火山湖，中央有4-kâi島叫做中島，生活tī tsia ê生物因為hō͘水隔開，自然形成kap人無仝ê特色。
公路沿とうやこ(洞爺湖)se̍h，青青ê天，白白ê雲，深藍色ê湖水，深綠色ê樹木，mā有淺綠色草埔，柔性色水，とうやこ to̍h是tsiah-nī溫柔美麗。
△看出窗仔門外，tuè車欣賞：
▲とうやこ(洞爺湖)サイロ展望台：
來到サイロ展望台，落車看詳細，遠遠對面hit爿有山做背景，火紅山尖敢是昭和新山(しょうわしんざん)？彼粒上懸--ē敢是有珠山(うすざん)？中央ê小島確定是中島，khóng-sik天頂影入湖變藍，闊莽莽êとうやこ湖邊有綠色ê山綠色ê樹林，藍色綠色共一體，とうやこ hō͘人ê感覺是hiah-nī平和柔軟，看久bē-siān。
囡仔耍bē-suah，大人翕相翕bē-suah。
突然間聽著直昇機飛起ê プロペラ(螺旋槳)聲，原來是載人客飛上天欣賞とうやこ(洞爺湖)1-liàn。
▲定山溪溫泉公園：
離開サイロ展望台來到歇暗ê旅館，房間安搭好勢，先去附近定山溪溫泉公園散步，看人tī溝仔內leh浸跤，原來是溫泉，趕緊鞋仔褪--落來開始浸，燒絡燒絡，小可寒意liâm-mi消失。
飯店暗頓款kah tsiâⁿ phang-phài，有日本料理mā有西洋式，自助料理隨人kah意，bueh-ài啥乜家己揀。來日本當然是食飽koh食khá，さしみ配日本さけ第一優先，閣來てんぷら，日本ê tsìⁿ料khah-bē油，糋蝦仔特別好食，燒酒落喉koh-lâi一杯烏咖啡，飽koh醉，醉tī tshit-thô了歡喜，心情滿意。
盈暗睏phòng床。
感想：
guā-kok iû-lám tē-thâu so͘, bô-khuàⁿ tē-tô͘ m̄-tsai lō͘，tsáu-tang óng-sai koh uan-uat, tsi̍t-sî thâu-khak piàn hô͘-tô͘.
lo̍h-tshia tio̍h-ài tuè hō͘ tiâu, tuè bô tio̍h-tīn hāi-liáu-liáu, uē-gí tshiú-ki lóng bē-thong, bueh-huah kiù-miā kiaⁿ-kiàn-siàu.
沒有留言:
張貼留言