冬節食冬節圓：

冬節食冬節圓：

俗語講「無冬節都beh so圓，無講冬節敢m̄ so圓」。

廿四節氣「冬至」固定tī太陽曆12月22/23日，暝--時上長 日--時上短，咱台灣人慣勢講做「冬節」，是民俗節日，是古早「過年」。

冬節chit工著挨粿挲冬節圓拜神明、拜公媽，算是大節。囡仔上歡喜，冬節圓若食落腹肚內to̍h加一歲，而且期待足久足久ê「過年」tit-boeh到。

俗語講「無冬節都beh so圓，無講冬節敢m̄ so圓。」除了冬節，啥乜時陣tio̍h-ài挲圓？

敬神明、拜公媽、娶新婦、嫁查某囝、做禮數lòng tio̍h挲圓，而且圓仔tio̍h-ài挲hō͘圓圓圓，koh-tio̍h摻糖摻hō͘甜甜甜，表示喜氣、團圓、圓滿。

猶有，圓仔除了食甜，mā ē使得煮鹹，當做點心食，hèng秫米路ê人，煮甜煮鹹lóng好食，m̄免摻色料染紅番仔米，mā m̄免挲kah圓圓圓，若是煮甜，ē使得lām bôe-bôe ê紅豆、塗豆；若是煮鹹圓，隨在你摻豬肉、香菇、茼蒿、韭菜，在人kah意。

農民曆正月15是上元節，慣勢講chiaⁿ-goe̍h cha̍p-gō͘，需要挲紅圓拜三界公，m̄知啥乜時陣開始時行「元宵節」食「元宵」，元宵圓有包餡，做法kap挲圓仔完全無相仝，元宵真好食是好料理，總--是tn̄g-tio̍h冬節拜神明拜公媽，上虔誠是拜紅圓拜冬節圓。

食冬節圓hō͘老人ê感想是，「gín-á so-îⁿ ke chi̍t-hòe, lāu-lâng chia̍h-îⁿ lāu-tò-thōe.」