無捨世，行佇卯--字：

無捨世，行佇卯--字：                         Lah-jih_20170329

鋏咱指頭仔尾閣縛咱手股頭，叫咱「恬恬倒，毋通振動。」

喝一聲「這馬欲開始」隨就共咱面崁烏布「恬恬毋通講話」：

攑針揬‥‥‥攑鑽仔揻‥‥‥揬遮揻遐、揻遮揬遐，三人欺負咱一人。

橫逆，橫逆，夭壽，夭壽，揬了閣再揬，揻了閣再揻，「會疼--未？」明明咧共咱裝痟。

「用腹肚喘氣，較袂艱苦！」有夠假仙假觸？一時煞予咱暗笑減輕無奈。

「蕭老師，放輕鬆，莫緊張。」既然知影咱是蕭老師，到底佮恁有啥乜深仇大恨，著按呢凌遲，針針入肉尖尖見骨。

「好--à！好--à！」講了閣再講，猶原一直揬一直揻，一屑仔都無細膩，實在夭壽骨。

講--的一直講，聽--的袂當應聲，明其知，撞著這款歹人，應話嘛是無卡縒，只好喙仔開開據在怹揬據在怹揻。

毋知經過外久，攏無振動嘛無徙位，舞到怹歡喜滿意才放咱喘一下大氣。

「共你撓兩點鐘，實在歹勢，這馬已經好勢。」

「謝謝！多謝！」予人揬予人揻閣著共人會多謝，到底為啥貨？

種嘴齒！