5. 漢羅文ê書寫原則

5. 漢羅文ê書寫原則

母音分類：用a、i做例

開喙母音：				閉塞母音：
基本母音	鼻化母音	喉塞音	鼻化喉塞音	鼻音韻尾	鼻音韻尾	鼻音韻尾	入聲韻尾	入聲韻尾	入聲韻尾
a	ann	ah	annh	am	an	ang	ap	at	ak
i	inn	ih	innh	im	in	ing	ip	it	ik
	多數屬非漢語系統、有音無漢字、需要羅馬字			漢語系統、有音有漢字(漢文音、讀冊音、文音)

根據頂面台語音韻母音分類， ē-tàng看出台語除了有「有音有漢字」ê漢語， mā有「有音tshuē無漢字」ê非漢語系統， tsia ê「非漢語系統」ê台語有需要用羅馬字來表達，語音tsiah-ē精確，意思tsiah-ē清楚，羅馬字ē-sái當做文字來書寫，mā ē-sái當做音標標音。

「非漢語系統」來源複雜，有百越語、平埔語kap歸化做台語音韻ê西班牙語、荷蘭語、日語、英語……tsia ê「非漢語系統」ê台語，若ngē-beh用漢字來教學、書寫，m̄-nā費氣了時間mā-bē tàu-tah。

5.1  台語文書寫方式

現時台語文書寫方式有三種；

1. 全羅文：全部用羅馬字書寫ê方式，書寫規則kap英文相仝，每段頭一字大寫，標點符號用半形標記，羅馬字是表音文字，按怎講to̍h按怎寫。

2. 全漢文：全部用漢字書寫ê方式，非漢語部分應用借音、借意來書寫，用字bē一致，標點符號採用中文式全形標記。

3. 漢羅文：漢字kap羅馬字thàu-lām ê書寫方式，是認定漢字是字羅馬字mā是字ê綜合應用，同意台語漢字to̍h寫漢字，無同意漢字to̍h寫羅馬字，標點符號採用中文式全形標記。

5.2　結論

先有語言tsiah有文字，漢字是字，羅馬字mā是字。

以「生活語言」角度來書寫台語，無合用有爭論ê漢字改用台語羅馬字來書寫， án-ni咱所講ê「文白異讀」kap各所在「方音差」ê問題隨時得到解決。

尊重漢語系統，來自漢語古音者，用漢語發音漢字書寫；重視台語主體性照咱ê「生活語言」， ē-tàng漢字表達--ê用漢字，有爭論--ê用台語羅馬字，台語羅馬字是字mā有標音功能，雖然bē-tàng「望形生意」， m̄-koh ē-sái「呼音解意」，漢羅合寫ê台語文tsiah是台語文字化解決之道。