作田人按怎灌溉淹田：                Lahjih      20200918

彰化縣八堡圳是台灣上蓋古老埤圳之一，1709〜1719康熙年代施世榜建造，造福彰化縣境內八堡農田水利。關係八堡圳ê起造，逐家較趣味 林--先生ê傳說，講伊教施世榜用籠仔笱（lam-á-kô）工法，chiah解決濁水溪引水入圳ê困擾。古早為著風調雨順國泰民安，攏會編一寡神話、神ê旨意來an-tah民心，八堡圳ùi二八水分流一圳kah二圳，建 林先生廟；來到田中央造水門hō͘八堡兩圳相通，起 世芳宮林媽廟；然後到鹿港地界，建 天后宮服祀本尊媽祖林默娘，lóng是水神，lóng是姓林。

籠仔笱截水引水入圳，確實是好工法，八堡圳另外一種真重要ê工法，soah罕得有人論述紹介，啥乜工法？tō是浮圳工法，啥乜是 浮圳？

 

八堡圳，在地人講大溪，大溪主流ùi二八水鼻仔頭向西北爿流到鹿港地界，主流koh有分流，號做中圳，設有tòng-mn̂g（擋門）[水門]調節水量，田中地界有鴻門圳、大高圳，中圳有涵孔閘門調節圳水流入大水溝kap細條水溝，水溝仔岸埋圓形涵孔流入水田淹水，構成灌溉水利網。

大溪是按照地形懸低起落，擔塗kā圳路兩爿坉岸，坉成「凹」字形圳體，m̄是挖溝，圳岸坉塗坉懸懸，koh建造水門通水溝，水溝通田園，大溪、中圳溪底，水溝溝底lóng比水田較懸，溪水水面看起來ná像浮tī地面頂懸，所以號做浮圳。圳水溝仔水若boeh淹田，只要kā水門、涵孔開--開，一港一港濁水溪水tō自動流入田園。

 

八堡圳灌溉水利網，兩爿坉懸ê溪岸溝仔岸，大量坉塗ùi tó位挖塗？Tòng-á潭chit个大潭按怎形成，是另外值得思考ê問題。

八堡圳灌溉淹田範圍真闊，二八水、田中央、社頭算是水頭，khah-bē欠水，播田期前後上需要水，為著爭水，有時mā-ē póe-hōe，因為lóng是厝邊隔壁，罕得冤家相拍。

 

下面來講一寡放水淹田ê用語，可能kah別所在有淡薄仔精差：

八堡圳：原名「施厝圳」，mā叫做「濁水圳」，較捷講「八堡圳」。八堡是東螺東堡、東螺西堡、武東堡、武西堡、燕霧上堡、燕霧下堡、馬芝堡及線東堡。

大溪：八堡圳，在地人慣勢講「大溪」。古早有 大溪岸、大溪水、大溪無崁蓋 語詞。

中圳：八堡圳ê分流[支流]。田中地區有鴻門圳、大高圳。

水溝á：中圳koh分流，tō是水溝、水溝á。

浮圳：浮圳ê構造，親像「凹」字形，圳體浮比地面較懸，圳水親像浮tī地面。

水門：施設chhiān枋閘水，古早號做tòng-mn̂g/táng-mn̂g (擋門)。

水田：食濁水溪溪水ê水田，塗壤肥koh黏。

涵空：圳岸、溝仔岸下面埋圓形暗管，引水入水溝抑是田園。較深安閘門，較淺直接塞破布。

放水：kā圳水流入水溝，kā水溝水流入田地，叫做放水、放田水、淹田水、淹水。

濁水窟仔：涵孔水chhiâng-lo̍h所在，留一坪大ê田地挖濁水窟仔，窟仔水chiah盤過水田，濁水窟仔chhē底ê烏塗膏真肥，聽候犁田前，tō kā烏塗膏清去下坵田。

頂坵pôaⁿ下坵：1埒田地抑是1塊田地，倚溝仔邊是頂坵，地較懸，離溝仔較遠是下坵，地較低，涵孔放水了後，利用開田岸隙tō-ē頂坵盤下坵。

田岸隙(chhân-hōaⁿ-khiah)：田岸人工掘ê缺隙，破水（phòa-chúi）ê水路。

làu水：田水siuⁿ滇抑是已經無需要田水，利用田隙瀉水。chit種田岸隙著掘較深。

破水：kā田岸掘田岸隙來引水抑是退水。

清水溝：濁水溪水是濁--ê，年久月深塗膏ē chhē底，需要人工清除。古早是逐家義務勞動做公工。

清大溪：八堡圳中圳仝款年久月深沈積濁水溪流來ê石頭沙á kah烏塗膏，歸庄人出動義務勞動做公工清除。