安假嘴齒----醫學台語：               20210924  Lahjih

四月底感覺下齒岸兩齒門齒iôló͘ iôló͘，chia̍h mi̍h真gāigio̍h，回診齒科醫診療，檢查結果，需要挽嘴齒安假嘴齒。經過同意確認，注麻射了後，醫生to̍h kā嘴齒挽掉，kài簡單，咬棉á止血，著等兩三點鐘後chiah ētàng食流質食物，醫生交帶兩禮拜後複診chiah進一步評估安嘴齒ê辦法kah選擇。

因為武漢肺炎疫情嚴重，m̄敢出門去員林，歇睏四禮拜chiahkoh回診，繼續抽神經 [根管治療] ê醫療。醫生詳細檢查孔嘴kah邊a齒、齒岸：「看che齒岸無夠粗勇，若boeh種嘴齒恐驚無適合，咱來安假嘴齒敢好？」

同意醫生建議，醫生繼續分析：「做假嘴齒，需要邊á齒tàuphō tàukēng，看he邊á門齒kah狗齒lóng細細，需要兩齒tàu phō chiah有夠力。猶有，邊á門齒mā需要抽神經 [根管治療] khah bē後擺麻煩。咱安排後禮拜來處理。」

抽神經有人講thāu神經，to̍h是kā嘴齒內面ê神經、血管、淋巴kah其他軟組織，清除hìⁿsak，避免造成感染，chiah koh kā嘴齒內面thūn hō͘ tiâmcha̍t。

 

經過一禮拜koh來診所，坐chiūⁿ診療椅，先kâm一嘴lo̍k嘴水，一分鐘後「嘴peh開」。

「咱chitmá來抽神經做根管治療，先kā你注麻射，siókhóa痛痛。」嘴peh開，ba̍kchiu自然瞌·落·來，射針輕輕tu̍hlo̍h ná蚊á tèng，sòa·lo̍hkhì咱kannā ē使得注心聽，專注tī醫生按怎tī咱ê嘴孔展現伊藝術ê手路。

抽神經需要kā嘴齒lakkhang，lak入去嘴齒內面ê神經、血管、淋巴所在，有聽見高速齒科手機一直無停hoⁿhoⁿ叫，leh chhia leh ui leh chǹg，mā siókhóa phīⁿtio̍h ná石頭hu ê氣味，雖罔bē疼，總·是gāigio̍h。He嚨喉滲著水，已經giōngbeh tio̍hkacha̍k，趕緊giâ手「暫停」，suh一嘴大氣，lo̍k一嘴水，診療椅iūkoh放pòaⁿ-theⁿ-tóⁿ姿勢，kèsiok ui、chhia、lù、chha̍k lóng隨在伊，奮鬥beh半點鐘，醫生chiah講暫時歇睏5分鐘。

5分鐘後，繼續另外hit齒，仝款半點鐘無歡喜mā無無歡喜聽醫生kah護理師對話kah手機hoⁿhoⁿ聲⋯

點外鐘經過，兩齒嘴齒已經鑽孔深入齒根，醫生ka插兩支針，叫我去翕X光，看情形是無夠深，繼續しあげ，仝款chhia、chha̍k、bôa、khau、lù一直來，X光koh翕一擺，總算ē使得，紲落去是清洗吹乾，開始thūn藥á，完成今仔日ê醫療，約定後禮拜繼續，經過兩點鐘，麻藥猶原麻麻，大約tio̍hkoh等三點鐘久chiah ē使得食物件。

 

經過一禮拜koh來診所，坐chiūⁿ診療椅，先kâm一嘴lo̍k嘴水，一分鐘後「嘴peh開」。

Tāiseng檢查抽神經hit兩齒下門齒，了後叫我頂下齒kāha̍p hō͘伊看，醫生講：「Kāha̍p無正ē傷著下齒，需要矯正頂齒ê角度，而且頂門齒有兩齒mā需要抽神經。」

「咱chitmá來kā頂門齒抽神經做根管治療，先kā你注麻射，siókhóa痛痛。」嘴peh開，ba̍kchiu自然瞌·落·來，射針輕輕tu̍hlo̍h ná蚊á tèng，sòa·lo̍hkhì咱kannā ē使得注心聽，專注tī醫生按怎tī咱ê嘴孔展現伊藝術ê手路。經過兩點外鐘完成今á日進度，預約後禮拜kohchài繼續。

 

經過一禮拜koh來診所，坐chiūⁿ診療椅，先kâm一嘴lo̍k嘴水，一分鐘後，醫生分析假嘴齒按怎做：「頂齒岸四齒門齒需要做齒套來矯正嘴齒，著先kā嘴齒磨hō͘細支有縫，chiah ētàng kā齒套loptiâu·leh；下齒岸中央挽掉hit兩齒著做假嘴齒，chiah kah邊a四齒做齒橋連接，邊a四齒mātio̍h磨hō͘細支來套齒套，ánne lóngchóng十齒，八齒是齒套，兩齒chiah是假嘴齒。」聽kah hoesàsà，原來比較早鑲嘴齒進步真濟。

醫生講：「今á日to̍h是kā boeh做齒套八齒磨hō細支，時間ē khah久，先kā你注麻射⋯」

Chitpái ui、chhia、lù、chha̍k、tu̍h、koah、ngiáu、lā、thuh、khau、tèng、tōng、bôa 攏總來，足足兩點半鐘，耐性giōngboeh tòngbētiâu，最後koh咬模，講boeh做chi̍tê臨時假嘴齒，適應khòaⁿmāi，thang做調整。

 

隔兩工回診tàu臨時假嘴齒，看起來加真súikhoán，了後，koh經過兩禮拜試哺kah兩擺修正調整，chiah kā正式假嘴齒安裝好勢。四月外日田中到員林駛車來回十幾chōa，總·是kā嘴齒安好勢。