老人囡仔性閒閒罔話仙: 崁頂集興軒子弟(團)[一]_歷史佮人物 20141109

崁頂集興軒子弟(團)[一]_歷史佮人物 20141109_Lah-jih
崁頂集興軒興衰史： Lah-jih_20141110

崁頂集興軒子弟(團)[一]_歷史與人物 20141110_Lah-jih

參考資料：林美容著_彰化縣曲館與武管【南彰化臨山篇】

20141018蕭平治與蕭木泉對話開講kap樂器翕相。

▲崁頂集興軒(Tsi̍p-hin-ian)歷史：

1、成立佇日本時代，根據集雲軒鼓架題字「明治30年成立」是西元1897年，已經有117年歷史。順良補充：「民國七十五年五月公金重修時，為著加深集興軒ê歷史，蕭添露建議增加成立年閣，所以應該無夠117年tsiah-tio̍h。不過根據我所知，集興軒tī黃起in老爸黃清河時代to̍h已經存在，黃起kap黃清河攏是鼓吹手，黃起koh家己整布袋戲團。」ē-tàng確定--ē是大約佇1950年，太平里ê陳金龍先生來崁頂開館。陳金龍先生的師傅是社頭鄉石頭公「北管先生」洪朮先生。(蕭木泉學吹ê時陣是20歲，今年85歲，已經有65年歷史。)

2、練習演出地點：役會kap公埕(土地公廟仔將爺廟仔廟埕)。金龍師來崁頂大約教有四、五館ê時間，彼陣「先生」並m̄是逐工來教，因為其他庄頭mā有倩伊教，若有來教，集興軒會計算日數，算先生禮予--伊，斯當時先生禮用粟仔代替現金，教一館大約千外斤稻穀ê價賬。「金龍先」代起先教扮仙戲《三仙會》，mā教過【鬥鵪鶉】、【一江風】、【下小樓】等曲牌。另外「金龍先」mā有佇田中鎮平和里、復興里kap溪州鄉圳寮、下壩、大庄等所在教--過。

3、團員名單kap專長：

蕭添露(Lóo--è)：Lóo--è是鼓介頭手師傅。tak鼓、通鼓、拍板是kui-ê子弟(團)ê總指揮。

蕭木泉(Sūn-liâng--ē)：Sūn-liâng--ē(順良)絃、吹逐項會，少年時代to̍h真tsiūnn-kioh(上腳)。

詹德鑑(A-kàm)：A-Kàm是鼓吹高手，gâu吞氣(thun-khuì)，歕吹nńg-lio̍h像甜粿，報紙bat報導伊ê功夫。

紀丁味(Ting-bī--ē)：絃、吹攏會。

蕭壬辰(Jīm-sîn--ē)：鑼鈔、對曲。

蕭如東(Jî-tong--e)：鑼鈔。對曲，扮小旦，幼聲好聽。
蕭元讚(Tsàn--è)：鑼鈔、通鼓、唱曲。

蕭明堂(Phah-tâng--ē)：鑼鈔。對曲，扮大花。

蕭明魁(A-Khue--a)：鑼鈔。對曲，扮大花。

蕭金殿(A-Tian)：鑼鈔。對曲，扮小生。

蕭金閣(Kim-koh--ē)：鑼鈔。對曲，扮小生。

蕭金郎(Khi̋n-lóng)：鑼鈔、通鼓、唱曲。

陳傳木(nâ--ē)：鑼鈔。對曲。

蕭興賢(tuā-kóng Hiân--ē)：鑼鈔。對曲。

黃起(Khí--è)：鼓吹。

曹錫榮(Îng--ē)：大鼓，鑼鈔。
蕭烏棕(Ba̍k-bui)：鼓介、鑼鈔、絃吹lóng-ē。
蕭昌蔭(Ìm--è)：介、鑼鈔、絃吹lóng-ē。kap黃起tī布袋戲傳做後場。
蕭愛哮(Tsîⁿ-ta̍t-á)：唱曲，聲音懸koh媠，北管曲〈緊中慢〉是伊ê專門，高音bē尖，真好聽。

4、老師傅蕭順良：蕭順良戶口名蕭木泉，是集興軒鼓吹手，伊ê吹學了有起，少年時代，為著練習歕鼓吹，驚kā人吵--tio̍h，時常利用落雨天抑是去田裡，較無人ê所在練習，20歲to̍h時常hō͘人倩去娶新娘攤，歕笛仔、噯仔，閣kap隔壁阿鑑學歕吹。m̄-nā gâu歕吹，殼仔絃、二絃、大管絃逐項會，斯當時鼓吹引仔lóng是伊家己製造。

5、老師傅ê怨嘆：

老師傅蕭順良今年85歲，ùi少年時代加入集興軒子弟(團)kap金龍師學吹，已經65年歲月，伊講：「過去咱集興軒是真tshiaⁿ-iāⁿ，無論絃吹、鼓介、鑼鈔逐項有人學，對曲角色幾若个，大花、小生、小旦攏會曉，tn̄g-tio̍h年節，神明生，抑是娶新娘，需要啥物腳數，tshin-tshâi招招召召--leh，to̍h ē-tàng出場，子弟陣、八音、三筆鑼仔，抑是過年歕春、排場、唱曲，腳數夠額，lóng mā鬧熱滾滾無冷場。想kah tsit-má，aih！⋯⋯」順良師想--著to̍h怨嘆，怨嘆無人繼承集興軒ê傳統。

「頂年仔開幾若萬箍倩師傅來tàu教，結果--leh， siuⁿ老--ē siuⁿ老--ē，無閒--ē無閒，少年--ē koh無想bueh學；尾仔總是招有夠額ē-tàng開班，siáⁿ知頇顢--ē頇顢，tshàu-tsheⁿ--è tshàu-tsheⁿ，像A-Îng to̍h kan-nā會曉鑼鈔，教伊絃吹to̍h是學bē來。ah Tshang-mê--ē，kan-nā講--伊幾句，tiuⁿ--leh to̍h講無愛學，最後猶m̄是散了了。集興軒註定愛消失去！無奈mā無辦法。」

△崁頂集興軒舊鼓架正面，刻字「明治三十年」「仲秋月吉置」