古物仔_嫁娶篇_餅印/糕仔印/糖塔模/金紙印：陳慶芳收藏/蕭平治翕相

古物仔_嫁娶篇_餅印/糕仔印/糖塔模/金紙印：陳慶芳收藏/蕭平治翕相
▲餅印：慣勢講餅印，mā有講餅模，模kap印有一寡差別。
台灣人生性分張，「嫁查某囝，hīng大餅。」to̍h是一種好風俗，歡喜分享喜悅、食物。雖罔分張，總--是tī hit个散赤年代艱苦過日ê環境下，分享是無thang siuⁿ慷慨--è，m̄-tsiah有另外一句「刣豬公，無相請。」
Hīng餅有hīng大餅kap禮餅兩種，食大餅bē夾牙，意思是無一定著包紅包祝賀，但是食著禮餅to̍h-ài失財包紅包恭喜人嫁查某囝。所以貺餅著看親疏、交陪做決定；若是貺大餅，厝邊頭尾掠一个範圍貺，阮庄腳是分角頭leh貺。俗語講：「有--ē嫁餅，無--ē賣囝。」有--ē貺餅貺較闊，無--ē 家己人貺貺--leh 准tú-suah。
做大餅(酥餅)免餅印，做禮餅tsiah-tio̍h餅印，餅印花紋kap粿印仝款是陰刻，印--出來ê花紋是浮紋，字是倒反，花紋除了龍鳳以外，一定ài有囍--字。
△這支餅印大塊花紋複雜，餅唇若bueh印ē媠款，著看師傅功夫。

△這支長方形餅印，花紋tsiâⁿ特別，有兩支旗仔，是日本時代ê物，bueh印ē媠款，mā著tsám-jiân-á ê才調。

▲糕仔印：mā有講糕仔模，講糕仔模較合形體。
Kap餅印仝款是陰刻，因為糕仔麩khah無黏性，較oh做型，所以糕仔印kap一般粿印、餅印小可無仝，需要刻較深，kap糕仔厚度平深，按呢揤hō͘ tiâm-tsa̍t，tsiah kā khok-khok--leh khok--tshut-lâi(脫模)。
△這支糕仔印ē使得印狀元糕，mā ē使得做餅印印禮餅。因為刻較深窩，邊仔mā有花紋，印出來ê 狀元糕、禮餅大塊koh-súi，主人家to̍h-ē感覺chiâⁿ有體面。
禮餅是查埔--e teh-tiāⁿ(訂婚)禮品；狀元糕是查某--è回禮ê禮品。

△狀元糕抑是禮餅，用tsit種印模加真方便印，餅唇、糕仔唇攏有形體，無論大細，一定ài有囍--字。

▲糖塔模：糖塔是天公生、神明生、嫁娶、祝壽拜神ê供品。是傳統糖藝，需要用糖塔模灌糖膏落去做，做成塔型，厚工koh歹控制，ē使得排tiàm神明桌頂看媠，mā ē使得提來食。
△這是兩塊柴刻ê糖塔模，合做伙tsiah灌糖漿tiàm內面，等糖漿反𠕆了後tsiah kā模pak開，to̍h成空殼ê糖塔。

△用索仔縛做伙tsit組是六塊組合ê糖塔模，收集者講是龍鳳糖塔模。

▲金紙印：kap印仔仝款，平面雕刻，是提來硩tī紙面、提來khop tī紙面 ê印，m̄是模。不過印仔刻字有陽刻有陰刻，這塊金紙印是陽刻，大花金、龍鳳配、雙喜囍--字，是特別提供嫁娶拜神用ê金紙印。

俗語：嫁查某囝，hīng大餅；刣豬公，無相請。
俗語：有--ē嫁餅，無--ē賣囝。