古物仔_嫁娶篇_茶盤茶罐仔茶米甕仔：陳慶芳收藏/蕭平治翕相

古物仔_嫁娶篇_茶盤/茶罐仔/茶米甕仔：陳慶芳收藏/蕭平治翕相
娶新娘，人生大tāi-tsì，10日前8日後無閒tshih-tshih，拴tse款he，清洗內面借碗箸，倩to-tsí辦桌煮料理，貼柱聯寫紅帖⋯到kah前1-2工，厝邊隔壁tàu跤手，借椅桌搭布棚，拴新娘轎發落人工扛kioh-á，央叫庄內子弟(團)準備子弟陣、八音團⋯
上鬧熱上無閒是新娘娶入門hit中晝，人客齊到bueh看新娘mā boeh食腥臊，蜈蜞咬蛤鬧熱滾滾，2點半鐘--過去，tàu跤手--è趕緊整理桌椅還隔壁，thn̄g菜尾仔貺厝邊，娶新娘齣頭到遮圓滿大吉昌中狀元？猶未！紲落去猶有齣頭，盈暗kap半暝後。
半暝後咱著mài講，來講「食新娘茶」，ē使得講是『餘興節目』，不過kan-nā至親長輩ē-sái-tsit參加，mā是新娘kap長輩熟似ê禮數。
Tsit个叫妗婆，「妗婆！」
妗婆：「甜茶甜甜，hō͘恁冬尾生後生。」
趕緊kā妗婆說謝，「多謝妗婆！」
Tsit个叫姑丈，「姑丈！」
姑丈：「茶盤金金，茶甌深深，相佮意愛，新人相唚。若無相唚，tsit甌茶我無愛lim。」
taⁿ to̍h 害，姑丈ná-ē tsiah-ní無斬節，連囝婿都面仔紅紅，媒人趕緊解圍：「姑丈姑丈真趣味，新郎新娘袂曉得，阿姑姑丈做一个樣，阮才看樣來相唚。」「這位姑丈真趣味，新人ta̋ⁿ結婚，bē-hiáu相唚，bueh請阿姑姑丈做一个樣，看bueh姑丈唚阿姑，抑是阿姑唚姑丈，上好是兩人mo͘h leh唚，按呢新郎新娘m̄-tsiah 會曉，掛保證，一定ē相唚。」tsit款臨時巧氣應答，互動tī媒人kap人客之間，新娘上加ē使得pì-sù bún--tsi̍t-ē bún--tsi̍t-ē niā-niā。
「食新娘茶」齣頭，需要備辦茶盤、茶甌，拴甜茶(摻糖ê茶米茶)、薰、冬瓜、糖霜。奉茶是上尾齣，茶lim了後，to̍h-ài硩紅包，紅包有大細，厚話慷慨包較濟，hân-san tàng-sng--e包較少，有人講通和包平濟。
▲茶盤：捀茶茶盤，一般是圓形，lâm-thn̄g--ē，色水媠，題字花紋含意kap ang-á-tsiá(翁仔某)幸福關連。
△lâm-thn̄g ê圓形茶盤：永結同心， 紅唇白底，牡丹富貴，雙雙對對。

△lâm-thn̄g ê圓形茶盤：
上_紅唇白底，鴛鴦水鴨相交纏，永浴愛河。
下_紅唇白底，牡丹富貴，圓形雙囍。

△長方形茶盤：字題 榮諧伉儷(îng hâi khòng lē)，圖畫 紅色牡丹花，雙爿有耳。

△茶盤：鮘魚開喙，雙雙對對，永浴愛河，萬年富貴。

△茶盤：金魚、水草，魚水之歡。

▲茶罐仔：食新娘茶人客 3-5个，10 thóng个攏有，所以泡茶需要大支茶罐。
△新娘嫁妝：細支húi-á茶罐仔。

▲新娘嫁妝：錫製茶米甕仔。

唸謠：火金星，十五暝，請恁姨仔來食茶，茶芳芳，茶米甕，甕大妗，大妗做媒人，媒人著火燒，親家親姆雀雀趒，趒到柚仔跤，黃--ē挽去食，青--e留leh送丈人，丈人o-ló好，阿兄娶阿嫂，阿嫂跤疼bē入房，阿兄手疼bē挨礱，⋯⋯
食新娘茶講好話：
龍鳳相隨，𩸙魚開喙，新娘生媠，新郎古錐。(ui)
茶盤四方，金銀滿堂，新娘巧妝，新郎財王。(ong)

茶盤四角框，中央hë 茶鐘，一杯來相請，子孫代代興。(ing) 
冬瓜ná菜脯，bueh問新娘siáⁿ-mih人ê某。

Google「食新娘茶講好話」，資料真濟。