崁頂集興軒子弟(團)[二]_武場樂器_鼓界 20141114_Lah-jih

崁頂集興軒子弟(團)[二]_武場樂器_鼓介        20141114_Lah-jih

※集興軒子弟(團)樂器分做武場kap文場，武場有鼓介、鑼鈔；文場有吹kap絃。以合奏為主，排場、對曲，子弟陣、八音、三筆鑼仔是鬧熱陣頭。年節歕春，做生日排場，ngiâ-tsih神明，娶新娘，送亡者上山頭(tsiūⁿ-suaⁿ-thâu)攏需要集興軒子弟(團)tàu跤手。

▲鼓介(kó͘-kài)：khǹg tī鼓架頂，有tak鼓、小鼓、khiauh板、kho̍k板，是打擊樂器，子弟(團)ê鬧熱需要鼓介起動、帶動、指揮、tshuā頭。
△tak鼓：mā叫做phiak鼓、阮較慣勢講lak-tak-á，「lak-tak tshi̍h-taiⁿ tshi̍h-taiⁿ khuaⁿh」，to̍h是tak鼓+tshê-á+tháiⁿ鑼仔+小鑼ê演奏。
tak鼓材料採用tīng柴挖孔，外面繃牛皮，tak鼓箸著用竹箸，phah--起來tsiah-ē響koh結，聲結to̍h-ē充滿力度精神，是子弟(團)演奏對曲ê總指揮，ē-hiáu phah tak鼓是鼓介頭手師傅。

△拍板(phik-pán)：唱曲拍節奏ê拍板，有khiauh板、kho̍k板兩種，khiauh板是用兩塊抑是三塊柴枋貫做伙，用一手提leh幌振動to̍h-ē發出「khiáu khiáu khiáu khiáu」ê聲；kho̍k板是用長方體ê tīng柴，內面挖孔，掛tī鼓架tak鼓邊--a，著用tak鼓箸拍出「kho̍k kho̍k kho̍k kho̍k 」ê板嘹節奏。ē-hiáu使用khiauh板ê tak鼓師，伊ē用khiauh板伸出ê動作來提示歌者落歌唱曲ê鑼鼓點。

△小鼓：mā叫做通鼓，柴刻(用箍--e)空殼鼓身，頂下面繃皮仔， 音質輕快響亮「long tong long tong」真有活力，活跳ê節奏增加鬧熱氣氛，是吸引觀眾上重要ê樂器，ē-hiáu tak鼓師傅定著ē-hiáu phah鼓，ē-hiáu phah鼓ê師傅，無一定ē-hiáu phah tak鼓。鼓箸是圓棍型ê細支柴棍仔。

△拍板(phik-pán)：khiauh板/khiauh-khiauh-á。

△鼓架：倒爿tak鼓(lak-tak-á)，正爿小鼓(通鼓)。陣頭進行中，ē使得兩人用棍仔扛，tak鼓手、通鼓手沿路行沿路phah。輕力方便。(蕭順良設計)

△大鼓kap鼓箸：子弟(團)無用著大鼓。大鼓是大鼓陣leh用--ē。大鼓聲音低koh沈，「thòng thòng thòng thòng」真大聲ē-tàng傳真遠。