土水工課「抿石仔」kap 洗石仔磨石仔：

土水工課「抿石仔」kap 洗石仔磨石仔：

抿石仔（bín-chio̍h-á）：細粒石頭仔lām紅毛塗kiáu hō͘齊勻，chiah用抹刀抹平，等待堅面，過一段時間tō用抹刀抹抹--leh，經過幾擺抹面，差不多3-4點鐘後，經驗了解ē-tit kā堅面紅毛塗抿掉，tō用海綿浸水，輕輕拭掉浮面紅毛塗，露出細粒石頭仔表面，完成抿石仔工課，等待紅毛塗膏堅𠕇。

洗石仔（sé-chio̍h-á）：磨碎幼石仔lām紅毛塗kiáu齊勻，用抹刀抹平壁堵，聽候堅面，chiah用水濺chōaⁿ清浮面紅毛塗。

磨石仔（bôa-chio̍h-á）：選破碎大理石lām紅毛塗kiáu齊勻糊tiàm地面，等待堅𠕇chiah用磨石機磨平。

無仝材料無仝施工方法，需要靠經驗，等待堅面需要時間，時間長短kap日光溫度真有關係。室外施工ê抿石仔、洗石仔，tn̄g-tio̍h有可能會落雨tō m̄-thang施工。