083âng-tshùi-pit-á（紅喙畢仔）＞紅喙黑鵯＞Black Bulbul.

083âng-tshùi-pit-á（紅喙畢仔）＞紅喙黑鵯＞Black Bulbul.

âng-tshùi-pit-á（紅喙畢仔），全身是烏色羽毛，金sih-sih，kan-na喙pe kap兩支跤是紅色--ê，看起來ná烏鶖--leh，嘛號做紅喙烏鶖。

勇敢ê『海皮斯』：布農族âng-tshùi-pit-á ê故事。

傳說太古時代，布農族ê鄉野山區出現1尾足大尾ê蟒蛇，危害精牲動物，sńg-tn̄g山園果子食物，而且閣向人類挑戰，伊用伊ê法力kā山坑仔出口nâ閘，hōo山坑仔水無teh消tháu，煞逐四界淹水，hōo布農族ê族人無厝thangtuà，無家可歸，有夠落魄苦憐，不得已只好逃難到玉山頂，tsit時火種已經hōo水淋hua去，無法度煮食，玉山頂閣寒sih-sih，無火thang烘，也枵也寒，實在無法度閣生存落去。

姑不將，經過布農族ê酋長kap長老參詳會議，決定beh拜託動物來鬥跤手，其中上蓋重要ê工課就是引火種轉來部落，tsiah有才調hōo族人繼續活命落去。頭起先拜託螿蜍大--ē泅水到對岸ê卓社大山beh取火種，螿蜍大--ē提著火種就趕緊跳落去山坑仔水裡，火種隨時hua去，螿蜍大--ē無達成任務，感覺tsiânn厭氣，煞覕tiàm水內m̄敢見人；閣來有niáu鼠、羌仔、鹿仔、山豬…攏beh來tàu幫忙試看覓，可是攏無才調蹽過hit條有水ê坑溝仔，逐ê人攏非常失望，m̄知影beh按怎才好？

突然間，半空中飛來1隻鳥仔：「hōo我來試看覓咧敢會使tsit？」

「你--ōo？tsiah-ni̍h細隻，tsiah-ni̍h幼秀，敢有法度擔當tsit-ê任務？hiah呢濟ê朋友兄弟攏來tàu跤手，攏無伊法，你是beh用啥物步數來完成tsit-ê工課--neh？」

「hōo我試看覓--leh-lah！憑我ê熱誠kap勇氣，hōo我來試看覓--leh-lah！」

「好！既然逐家攏無法度，就拜託你試看覓--leh？」：酋長按呢回答，逐家攏知影tse是不得已--ê。

Tsit隻鳥仔叫做海波斯，伊是1隻真特別ê鳥仔，生做tsiânn súi，tsiânn幼秀，伊既然答應人beh提火種轉來hōo逐家煮食、烘火，伊就tsiânn勇敢飛過坑溝仔到卓社大山，用伊ê喙pe咬1支燒晃晃ê火種，無khà欣賞山裡ê súi光景，kan-na一直拚命飛，看會當較緊飛轉去布農族ê部落，解救hiah呢濟ê性命--無？ná飛風ná透，愈透火愈猛，煞燒著伊khi̍p火種ê hit支正跤，姑不而將趕緊kā火種換到倒跤，ân-ân kā挾tiâu--leh，千萬m̄-thang拍ka-la̍uh去，飛愈緊，火愈猛，倒跤已經擋bē-tiâu--ā，無用喙pe來咬bē使tsit，尾仔伊用喙pe kā hit支火種，規尾總是kā咬轉來部落，kui-ê部落ê性命自按呢得著解救，逐家歡喜kah目屎流目屎滴，攏來感謝海波斯ê勇敢kap恩情，啥知海波斯看著布農族ê族人得著解救了後，煞死死暈暈去，逐家趕緊倚來關心慰問，tsiah知影tang時仔海波斯ê兩支跤骨kap hit支喙pe，已經去hōo火燒kah紅kì-kì，規身軀ê羽毛嘛hōo火燻燻kah烏sô-sô，尾仔倩醫生來kā醫治，tsiah回復海波斯ê健康，m̄-koh伊hit兩支跤骨kap hit支喙pe kap身軀邊ê羽毛，煞從按呢無閣回復伊原來ê模樣，看khit來煞kài sîng烏鶖--leh，所以tsit-má有人叫伊紅喙烏鶖，嘛有人稱呼伊紅喙畢仔。

 Tsit-mái ê布農族人為著感念紅喙畢仔海波斯勇敢救in-ê族人，就世傳世，教in-ê後代囝孫，m̄-thang拍紅喙畢仔，閣較bē使tsit用手kí-kí指指，tsiah bē發生火災。

拍火鳥----泰雅族紅喙畢仔ê故事。

古早古早，泰雅族tuà ê地區，有一工發生森林大火災，連燒幾若暝日，狀況非常危急，森林是鳥隻、野獸ê故鄉，內底成長tsiânn濟in生存需要ê食物，樹林、野草若是燒了了，m̄-nā無thang歇岫，嘛無thang tshuē食，嚴重威脅著in-ê活命。顧山頭安全ê山神，趕緊調集所有ê飛鳥野獸，開會決定搶救森林火災ê辦法，呼籲逐家著同心協力，為著逐家ê安全活命，逐家一定愛認真來救火，m̄-thang自私驚死，kan-na會曉保護家己，存有「日頭赤iānn-iānn，隨人顧性命」ê自私心理，按呢咱ê家鄉tsiah-bē會hōo無情ê大火，燒kah孤khu̍t變成無性命力ê火燒埔。

雖然山神緊急調集，總是自私本成就是生物（人）ê本性，閣再講，大部分ê動物生成就是驚火，看著tsiah-ni̍h炎ê大火災，逐家攏嘛驚kah gī-gī-tsùn，啥物是同心協力，啥物是坐仝船載--ê，隨時bē記得了了，隨ê四散逃命，煞真正有影「日頭赤iānn-iānn，隨人顧性命」，為著家己ê安全，無人願意冒險去救火，平時上gâu展伊gâu走ê兔仔，tsit-pái真正走第一，m̄認輸ê hit隻龜嘛tuè後壁kho̍k-kho̍k-tsông，飛鼠是ná飛ná走，m̄敢越頭看，恐驚會去hōo火舌nah--tio̍h，會變niáu鼠仔巴，烏鴉仔是驚kah險仔滲尿，kan-na會曉ah~ah~ah~ah.一直吼無歇，hit種恐怖，連溪谷水內ê魚蝦水族，攏m̄敢giâ頭，覕覕tueh水底去。

 Tsit-ê時陣，只賰紅喙畢仔留落來，in無驚惶，心情鎮靜，有計畫有秩序開始動員賰落來ê族群，按照山神ê指揮來進行滅火ê工課，有ê開防火巷，tsiah-bē hōo火災繼續湠開；有ê利用in-ê雙跤kap喙pe，kā著火ê樹枝遏斷，mài hōo閣再to̍h落去，因為in逐家m̄驚艱苦，無惜性命拍拚救火，最後tsiah kā火拍hua去。

Tī拍火救災ê過程中間，紅喙畢仔ê族群出上濟力，上蓋拍拚m̄驚死，死命拍火，煞hōo火舌nā kah規身軀全是傷痕，喙pe kap兩支跤骨燒kah紅kì-kì，其他ê羽衣嘛hōo火燻燻kah烏sô-sô，就是親像咱tsit-má看著--ê tsit款模樣，tse就是紅喙畢仔號名ê因由。

因為紅喙畢仔in-ê出生入死，勇敢拚命救火，tsiah將一場可怕ê森林大火消滅，保全逐家倚靠活命ê家園。山神為著紀念紅喙畢仔冒險救火ê精神，tī慶功賞賜ê同時，嘛賞賜in「拍火鳥」ê美名，閣hōo in-ê囝孫，世世代代攏kap in-ê祖先仝款，喙pe紅紅，雙跤嘛紅紅，配合規身軀ê羽衣烏金烏金，美麗非常。紅喙畢仔「拍火鳥」ê美名自按呢流傳到tsit-kú。