菜脯炒飯飯包ê記智： Lahjih 20181126

菜脯炒飯飯包ê記智：            Lahjih 20181126

70冬前沉底ê往事，ná-ē雄雄一喙飯tō chhōa倒轉去hit當時ê記智，引起目箍tâm-tâm一陣鼻頭酸。

Hit-tang-chūn日本人離開台灣boeh三年，ī--ā mā是離開我boeh三年，m̄-bat世事ê囡仔庀戇戇食戇戇大，m̄知啥乜是無油無sian，m̄知啥乜是清米飯，大概是有thang食飽mài堵枵tō滿足歡喜，hit个散赤人tn̄g-tio̍h物資缺乏ê年代。

1948年8歲入學一年仔生放屎糊房間，戇戇àⁿ-àⁿ跟綴老師去街路第一國民學校參加田中鎮運動會，記得是戴chit-kâi篾仔辮kō͘紙糊ê阿不倒，走10外公尺換人走ê表演比賽，歡喜kah連阿兄阿嫂mā緊張歡喜。四兄Lô͘-á兄有來看kā阮喝i-o，中晝時，記得是二兄抑是三兄提一粒飯包hō͘我食晝。

Hit粒飯包無用飯包觳仔貯，是用刺竹ê甲箬仔包ê飯丸，甲箬仔boeh包飯，需要棕摖chhè清氣閣用燒水浸hō͘軟，chiah ē得包飯丸，he飯丸是清米飯lām菜脯幼仔落去炒豬油，已經是芳kòng-kòng kòng-kòng芳，hit頓好食ê飯包滋味到今記牢牢。

無ī--ā ê煮食，是大嫂kah二嫂ê疼心飯包，用心計較ê料理，雖罔簡單，其實是費心情，一粒飯包ê白米飯kah豬油落去炒，已經是一家人一頓ê作料，結果是我孤一人食了了，想著親情，想著兄嫂，giōng-boeh目屎流，感恩ê思念，一粒飯包，菜脯炒飯ê飯包。

今仔日去溪頭散步行山路，主辦小姐為逐家準備中晝飯包，想bē到中晝食hit粒飯包，kan-na食一喙有菜脯炒飯ê滋味，隨kā我chhōa轉去70冬前ê記智。