古物仔_嫁娶篇_新娘轎(竹轎)：陳慶芳收藏/蕭平治翕相

古物仔_嫁娶篇_新娘轎(竹轎)：陳慶芳收藏/蕭平治翕相

「男大當婚，女大當嫁」人生一大事，做人父母，「疼囝像黃金，晟囝消責任，養到恁嫁娶，我才會放心。」娶新娘，嫁查某囝tsiâⁿ做傳宗接代生湠上重要ê民俗課題。嫁娶兩方一般lóng是男方「人財liáng得」----趁--著，女方是「有--ē嫁餅，無--ē賣囝」抑是「用伊ê塗，糊伊ê壁。」 隨人運命無相仝，自然嫁妝to̍h『不一樣』。

下面將ùi嫁娶工具「轎」開始紹介，古物仔相片大多數是陳慶芳先生收藏，非常感謝慶芳兄ê無私，允准Lah-jih翕相做紹介，紹介內容若有tāⁿ誤，向望逐家ē-tàng提出訂正，提供校正以台灣在地語言、名稱、用途為主。

▲竹轎：主要製造枝骨是刺竹、桂竹，轎篙mā是竹材，是竹絲較韌、頭尾生做較pêⁿ-pāng ê石篙竹，用來扛轎堅固koh ē sìm，mā號做轎篙竹。平常時用來hō͘先--e坐，抑是送葬時做大孫轎。若是kā八仙彩nê--起來，to̍h是娶新娘ê新娘轎，新娘轎除了nê八仙彩以外，轎頂著縛有頭有尾ê紅甘蔗，表示大葩尾，後壁掛八卦米篩辟邪。因為是竹造，較輕，所以只用兩人扛，1前1後，聽講古早彰化和仔先賴和醫生往診，to̍h是坐這款竹轎，轎夫扛轎轉彎踅角、peh崎落崎，lóng是講一款僻話(內行話)tsiah ē-tit扛hō͘轎內ê人，感覺sù-sī爽快。轎，tī 5-60年前是上等ê交通工具，先生(醫生)往診需要tshiàⁿ轎hō͘伊坐；先--e(地理師/算命師)bueh出門tio̍h坐轎；老歲仔人bueh去hō͘先生看，有錢人tshiàⁿ轎kā伊扛，散赤人只好用āiⁿ(偝)--ē去hō͘先生看；娶某tio̍h用新娘轎娶入門；送亡者tsiūⁿ山頭，大孫一定tio̍h坐大孫轎。扛轎需要2个人，遠路需要1-2个人做よび/yobi/預備，所以扛轎有轎班，我二伯人kuân大，漢草好，是轎班中1个。庄內清水--è hit頂轎是tshíⁿ色--è(藏青色)，素素--à，m̄-koh若tn̄g-tio̍h娶新娘，to̍h-ē nê八仙彩妝súi-súi，頭前面koh有he八音tshuā路：「2个扛hō͘ 1个thiòng，2个扛hō͘ 1个thiòng…(51 65 61 5/51 65 62 1/…)」jăo鬧熱joă趣味--leh-neh！

頭前面轎門，有門籬仔thang tsa̍h。兩爿邊phok--出來是穿轎篙ê轎篙孔。外觀色水tshíⁿ色kap紅絳色，看起來樸素koh影目，tsiâⁿ有台灣味 。

轎ê兩爿邊有轎窗掛門籬仔，thang-hō͘族親、姊妹仔伴探轎kap新娘放性地tàn葵扇。後壁有通風窗，內面tsiah-bē翕熱，mā方便kap外口面ê人講話。

轎內ê空間，kan-nā有固定ê座位。(下跤ê轎索是柴轎用--ē，kap竹轎無關連。)

轎內座位椅坐仔是籐pīⁿ--ē，椅撐斜斜ē-tàng theⁿ。

古錐ê轎模型。

轎夫叫做 扛轎--ē。

俗語：扛轎m̄扛轎，管新娘放尿。

俗語：坐轎--ē m̄知扛轎--ē ê艱苦。

俗語：扛轎--ē喝艱苦，坐轎--ē mā喝艱苦。