古物仔_嫁娶篇_新娘轎(柴轎)：陳慶芳收藏/蕭平治翕相

古物仔_嫁娶篇_新娘轎(柴轎)：陳慶芳收藏/蕭平治翕相
▲柴轎：選hit-lō tīng koh韌bē蛀ê木材，需要真幼路ê kap-tsoh(木匠)師傅、雕刻師製作。無論浮雕、鋸雕，貼金箔、畫花鳥，lóng是吉祥花紋，轎門、轎窗nê門籬仔，後壁面有通風空，減少翕熱koh ē-tàng佮外口講話。kui頂轎漆紅漆，紅絳絳充滿喜氣，紅色雙喜「 囍」貼兩爿轎窗，紅頂四轎to̍h是tsit種『花轎』。
Tsiah-nī貴氣ê新娘轎，當然需要大排場陣頭kap排列成隊ê大siāⁿ(內面貯嫁妝)綴後，tsiah配會得過，官家人子弟抑是有錢好額人查某囝tsiah ē堪得有tsit款排場，一般人家若有竹轎thang坐to̍h歡喜佇心內。

轎蓋ê雕刻、花紋、色水。轎窗貼 囍 字。

後壁通風空，活動--ē，風口佇下面，有隱密作用，古早人較pì-sù。頂面貼 囍 字。

轎篙孔四角形，轎篙需要選tīng、韌、勇koh直絲ê木材製造。

轎座仝款粧kah súi-tang-tang。

轎內kan-nā囥1張細隻柴椅，未免siuⁿ簡單，坐久敢bē跤酸 尻川䫌疼。莫怪俗語按呢講：扛轎--ē喝艱苦，坐轎--ē mā喝艱苦。

柴轎(紅頂四轎)需要4个轎夫扛，所以需要轎索，轎索是用棕簑毛抑是樹絲(龍舌蘭ê一種)pīⁿ，m̄驚雨淋，堅固耐用。

花轎ê模型，真súi。

俗語：紅頂四轎扛m̄行，包袱仔款款--leh綴人走。
俗語：扛轎--ē喝艱苦，坐轎--ē mā喝艱苦。