張聰敏是磺溪文學〈阿瑛！啊〉作者
故張聰敏先生過身留予台文界朋友無限e5 懷念kap m7 甘:
＜CHTBTS蕭平治編寫＞
彰化台文通訊聯誼會＜CHTBTS＞ti7
台語網路頂發佈不幸消息：
網路頂e5 兄弟姊妹：（先倒一碗清水予我 ！）
請逐家恬恬聽小弟報告一e5 心痛e5 消息！
彰化聯誼會e5 老大，台文e5 指導者，推sak 台文e5 鼓勵者、安慰者、
張聰敏大兄，ti7 今仔日早起時（1997.2.18）離開咱逐家--a！
親像好天時e5 一聲chhe3
雷，chiah-ni有向望e5 台文先覺，soah m7 -koh 繼續ka7 咱指導啟示，che m7 - na7 是彰化台文通訊聯誼會＜CHTBTS＞e5 phah
- sng3 ，koh khah 是咱台文界e5 損失。
聰敏兄本成是一e5 華文作家，幾年前伊chhan5-chhan5 liau5-loh8 來台文e5 研究kap創作，就無計較結果kap名利，除了鼓吹人去做以外，家己ma7 實實在在teh 創作，「阿瑛--啊！」著是伊e5 成績，十外萬字e5 小說作品，經過學白話字e5 訓練，為著beh hou7 台語文字化e5 可能性，會tang3 hou7 人肯定，伊！敬愛e5 聰敏兄！無惜家己e5 年歲已經五十外，身體閣m7 是外好，親像人講e5 「m7-siau3-hiauN
h」 ，koh
ah 敢chham 人學電腦，利用鄭良偉教授e5 ＜TW301＞台文文書處理來輸入伊e5 作品「阿瑛--啊！」目的嘛是beh hou7 人看講：用台語來寫文章嘛是有法度『我e5 手寫我e5 嘴，我e5 嘴有法度講出我e5 心！』Aih！無疑誤，冊猶未出版，伊！我敬愛e5 聰敏兄！soah自an2
- ni 無聲無soeh 來離開--lo3 ！
舊年，為著beh 閣卡進一步來推sak 台語，聰敏兄已經學會曉＜HOTSYS®＞台文系統e5 輸入法，嘛會曉入網路kap逐家研究開講，聰敏兄講ti7 網路頂kap逐家開講是一種誠爽e5 代誌，輕輕鬆鬆著會tang3 講咱e5 話，閣會tang3 kap逐家學一寡台文e5 知識。哪知伊chiah peh -chiuN7 網路，tu2 -beh
開始kap咱開講nia7 nia7
，伊著恬恬來離開咱--lo3 ！
請逐家目睭kheh-kheh，恬恬來懷念咱e5 聰敏兄！
聰敏兄！請你笑笑去--pah ！咱e5 台文是有向望--e5 ！咱e5 台灣嘛是有向望--e5 ！
＜CHTBTS＞Siau
Peng-ti （Lah-Jih.S ）1997.2.18
暗時（蕭平治老師：田中國小教師）
良光兄平安：
我e5 E -
Mail 住址改做：hoktong@changhua.ncue.edu.tw
請你幫我通知台語網，予網路e5 朋友知影。
另外報告一e5 不幸e5 消息，聰敏兄ti7 chang 早起因為肺炎離開世間，咱台文界痛失一位勇將，真是可惜。
福當上1997.2.19.（陳福當老師：彰化市大竹國小教師）
網路e5 朋友逐家平安：
彰化＜TBTS＞聯誼會e5 張聰敏先生ti7 chang 早起「蒙主調回」。
聰敏兄本底有糖尿病kap心臟病，過年以後染著重感冒，因為病院無床位，遷延到頂幾日才入院，病症一直惡化，後來併發症發作，引起肺炎，不幸ti7 chang
早起透早四點外來結束伊人生e5 路途。咱台文界痛失一位勇將，實在可惜。
有關聰敏兄出山e5 日期，我初步e5 了解是三月初五，確定e5 日期e7 閣ti7
網路通知各位。
彰化台文通訊聯誼會＜CHTBTS＞連絡人：陳福當上1997.2.19.暗時10點25分
平治兄：
聽著chit -e5
消息，我感覺真艱苦，因為聰敏兄是我e5 同年--e5
，請你轉達我e5 哀思予伊厝裡內底e5 親人，雖然我kap In 無熟似。
Ti7 1993年熱天，阮台中市台語社beh 創立e5 時，伊嘛有來台中tau3- saN -kang7 ，嘛是阮社e5 創始會員之一。聰敏兄是一e5 真熱心、真扑拼、真pho3-sit8
、閣卡有真強台灣意識e5 同志。
請你將有關聰敏兄e5 後事ti7
網路面頂繼續講予咱chia e5 台語伴知影、若是t¢ - hap8 會抵好、相信有真濟人會去到彰化來kap聰敏兄見最後一面。多謝！
Lim Chheng-Siang 敬上
（林清祥教授：東海大學資訊系主任[40703]台中市東海路11-3號TEL[04-359-0456]
平治兄、彰化e5 台文朋友：
聰敏兄對台文完全奉獻e5 精神，kap伊e5 寫作，就是伊留予台灣語文e5 永遠e5 禮物。咱做夥來紀念伊，學伊e5 樣。
陳雷敬拜（加拿大醫師台文作家）
平治兄：
透早入來網路，收著你e5 批，知影聰敏兄過身e5 消息，心肝誠艱苦，即呢有向望e5 台文作家，頂日仔才去In 兜，chiah-leh kap伊討論beh 按怎掠網路頂e5 好資料……真正想be7 到，真正嚨喉會tiN7 ……che 是台語文學史上e5 大損失，是咱chia e5 朋友e5 大悲痛。
我才想講theng3 -
hau7 手邊e5 「吳新榮選集」編好勢，就beh 好好a 寫chit
篇「阿瑛啊！」e5 評論，che 嘛是伊在生我就ka7 伊答應--e5 ，如今……伊煞be7 赴看著--a！
平治兄，伊是按怎來過身--e5 ？好好a 人，身體看起來嘛真勇壯e5 款？
伊e5 殯葬儀式是叨一工？請你ka7 逐家講一下。
興昌1997.02.19（呂興昌：和美人清華大學教授）
平治兄、彰化聯誼會e5 朋友：
聽著聰敏兄過身e5 消息，實在予阮真痛心，我kap聰敏兄嫂見面熟似是ti7 LA
e5 台文夏令營，因為我嘛是彰化人，所以有特別kap 聰敏兄嫂「認親」過，講誠濟話。 Ti7 我e5 印象內底，伊是一位親切、好做夥、真有理想e5 人、伊對台文e5 熱心kap無條件e5 奉獻、攏會tang3 做阮逐家e5 模範kap鼓勵、阮永遠siau3 念伊，願主引 chhoa7 賜福伊。
Loa Pek-Ni Toronto TBTS
LGH（賴柏年牧師：加拿大Toronto TBTS 聯誼會）（大村人）
福當兄、平治兄、kap 彰化聯誼會e5 朋友：
聽著聰敏兄過身e5 消息，心情kui-kang攏真鬱卒！
我愛講幾項我所bat e5 聰敏兄，用按呢來紀念伊！
聰敏兄是一e5 對朋友熱心e5 人：逐擺我轉去台灣，伊攏真熱情邀請我，著愛去拜訪恁彰化聯誼會。逐遍伊攏事先替我訂彰化hit 間上大間e5 旅社，kian3-paI2 我千交代萬交代，請伊Á-thang 先替我付旅社錢，但是kian3-paI2
我beh 去旅社納錢e5 時，錢攏已經納了--a。
聰敏兄是一e5 無求出名腳踏實地e5 人：台文通訊ti7 台灣各所在bat 有十五e5 聯誼會，Á-koh 到chit-mai2 kan - na7 恁彰化聯誼會有繼續按時teh 聚會，每擺我若想著台灣e5草根運動，我著想著彰化聯誼會。
聰敏兄是一e5 婦女運動e5 實踐者：我kap聰敏嫂kan - na7 ti7 北美台語文夏令營見過一面，單面我對聰敏嫂teh 做e5 環保運動kap政治運動，加減攏有了解，因為聰敏兄不時ka7 我提起「盧小姐」所teh 做e5 代誌，（伊用按呢來稱呼伊e5 牽手）In翁某二人ti7 無仝e5 戰場互相支援，為台灣e5 前途teh 扑拼。伊所寫e5 「阿瑛啊！」（十萬字小說）是用台灣婦女e5 一生來寫--e5 ，我一直想beh 問伊創作e5 動機，m7 - ku2 chit-maI2 無機會--a。
聰敏兄是一位台灣主體意識真清楚e5 人：伊hit 篇猶未完成e5 史材劇「百年志業」是用彰化平埔族做中心e5 歷史劇。伊有用心企劃查考平埔族分佈e5 地頭。我一直有teh 想beh chhoa7 伊去參觀賴貫一e5 用平埔族做史觀e5 「台灣文物館」，m7 過chit-mai2無機會--a。
聰敏兄是一位熱心推廣台文e5 人：聰敏兄中文寫作kap漢文背景，應該是無贊成羅馬字e5 人，聽講伊去清華聽良偉（良光e5 阿兄鄭良偉教授）e5 課時，本來是beh 去反對羅馬字--e5 ，（伊過去有學過十五音）想be7 到聽幾遍課了後，煞成做羅馬字上堅強e5 支持者。伊bat 對台語網內面無標聲調e5 寫法真煩惱。
聰敏兄是一位主動實踐e5 人：真濟人攏講向少年人教台文真要緊，但是真少人向家己e5 囡仔推銷台文，聰敏兄bat ka7 我講伊e5 囡仔有一e5 有寫作e5 天分，伊不時teh 想辦法來ka7 介紹台文。
聰敏兄是一e5 肯學習不時teh 充實家己e5 人：伊ui3 三冬前心臟開刀，身體m7 是真勇，但是伊beh 六十歲a ，可能本來連keyboard（鍵盤）嘛be7 曉拍，chit幾冬ka7 台文電腦學kah 真好勢，真少人會tang3 像伊按呢。
雖然kap聰敏兄見面e5 機會m7 是真濟，Á-koh 心內感覺伊是一位真親e5 朋友，伊大我十二歲，但是伊無用長輩e5 派頭kap我講話，che予我無形中an3 伊hia
學真濟寶貴e5 人生經驗。
Ti7人生e5 路途中間，我感謝上帝予我有機會熟似著聰敏兄chit 款e5 朋友！
良光上19. Feb .1997.
01:36 （鄭良光：台文通訊主編）（台南人）
福當先生kap平治兄：
多謝恁報阮知聰敏先生「榮歸主懷」。做伊網路e5 朋友e5 一e5 ，對心底表示我e5 m7 是痛苦kap追念。
Chit位台文kap台灣文化e5 chu-chhiong者，hiah少年就來離開世間，予阮滿心e5 m7 甘kap追悼。ti7 chit-e5痛苦中，我愛恁知阮kap彰化TBTS每一e5 會員、張先生e5 遺族、親成、朋友kang7 一e5 心悲哀一慟chit-e5損失，向望伊一生行過e5 好腳跡，會tang3 留teh 予阮做指標阮e5 模範，予阮chit群後代e5 人thang 學習閣用實行來紀念伊。
Ng Chin-Kiu, Ottawa,Canada（黃真救）
平治兄以及彰化e5 朋友：
請逐家節哀，聰敏兄台文小說e5 成就絕對會予伊閣活落來！
請保重！
--KhinhoaN（李勤岸）
興昌兄：
請你ka7 鄭邦鎮（教授）提醒一下！我有ka7 推薦聰敏兄e5 「阿瑛啊！」伊有答應beh ti7 台灣文藝刊登。
--KhinhoaN（Hawaii
大學語言博士）（新化人）
福當先生kap平治先生：平安！
小弟拄仔對美國轉來New York。已經有十日無看E-mail--lah，今日開機才收著聰敏兄過身e5 消息，予我心內非常悲傷。
我舊年ti7 LA 第一次看著伊kap伊e5 婦人人，有講真濟話，會後閣ti7 去Grand Canyon e5 路中，嘛有幾日做夥，chit-ma2猶ti7 目睭前看著伊誠懇e5 笑容。
我相信伊留咱台文運動者真大e5 遺產，咱beh 紀念伊e5 生，也對伊e5 死來得著閣卡大e5 力量，繼續晉前。
阮真愛用聰美紀念基金會e5 名義，寄一份弔禮予伊e5 家族，m7 知著寄去甚麼所在？阮若是beh 做花環（wreath），m7 知美金支票會通無？
阮ti7 Ui-Hiong教會聰美基金會，深深懷念敬愛e5 聰敏兄。伊是一位榮光上帝e5 真理，行ti7 戰場e5 頭前e5 戰士。chit-e5禮拜，阮ti7 禮拜中beh 全部為伊來做紀念禮拜。
請代替阮ka7 遺族致哀。
Tan PhekSiu牧師敬上。（陳柏壽：衛鄉台灣教會牧師，NewYork聰美紀念基金會）（斗六人）
彰化台文聯誼會kah聰敏兄永別e5 祭文：
<CHTBTS蕭平治寫>
聰敏兄：
今仔日是1997年，咱人正月廿七，是聰敏兄你beh kap 阮告辭永別e5 日子。
Chit-ku2
咱彰化台文聯誼會e5 兄弟姊妹，做夥徛ti7 聰敏兄你e5 靈前beh kap你相辭，講幾句心內話，請你聰敏兄聽了會歡喜，安心做你去，ti7 另外e5 hit-e5 世界保庇咱e5 台文推sak ，會得順利，開花結子。
聰敏兄，你是咱彰化台文聯誼會e5 老大兄：咱做夥嘛已經有四、五年囉！每一擺鬥陣開講，講著台語文，攏是hiah-nih趣味，充滿著理想kap希望，kian3-na7 tng7 著腔口無仝，抑是台文用字有爭執e5 時，你攏是誠客氣來ka7 阮提出真好e5 意見，予阮對台文e5 了解一日一日精進，予咱e5 聯誼會會凍一kou2 月一kou2 月續落去開，無去斷cham7 去。如今，聰敏兄！你喝走就走，喝行就行，留落來予阮e5 是無限e5 懷念kap m7 甘！
聰敏兄，你是一e5 有向望e5 台文先覺：平常時做夥交談，阮kio3-si7 你kan-taN 趣味台語，有心teh 研究nia5-nia5 ，theng3 - hau7 到看著你e5 台文小說「阿瑛啊！」了後，才知影你e5 才情不得了。十萬字e5 工程，前後五十冬e5 歷史背景kap語言，閣beh 應用純正e5 台語音來表達，對一e5 pun2-chiaN5 慣習用華語創作e5 人來 講，是一項偌呢艱苦e5 挑戰，m7 - ku2 聰敏兄你做到--a ，閣是做kah hiah 呢sui2 - khui3 lau2 - tau5 。勤岸兄講：「聰敏兄台文小說e5 成就，絕對會hou7 伊閣活落來！」有影，聰敏兄，阮永遠都會懷念著你！
聰敏兄，你是一e5 無求出名，腳踏實地e5 人：良光兄嘛按呢講，有影，你為著beh 推sak 台文，促進台語文字化，你無惜艱苦，南北二路四界奔波，走揣名師學台語、學聲韻、學羅馬白話字，所向望--e5 著是beh 達成：『我e5 手寫我e5 嘴』e5 台語文字化。你m7 - na7 用嘴講，用手寫，閣為著台語文推sak e5 效率kap普遍化，無驚麻煩困難，開始學電腦，拍台文 ，ui3 TW301學到HOTSYS®，最近閣抑kah人流行上網路，交朋友，討論台語文，你chit種熱情kut - lat8 e5 精神永遠都是阮e5 好模樣。
聰敏兄，你是一e5 勤快有包容心e5 人：為著推sak 台語文，你無條件提供資料，閣時常參加捧場有關台語文e5 研討抑是教學；若tng7 著反對e5 聲音，你攏是chiaN5 誠懇kap人討論，從來都Á-bat 堅持家己e5 看法才是著--e5 。你時常講，逐家攏是愛台灣，攏是teh
推動台語文，哪著cheN3 來cheN3 去傷感情--neh？因為聰敏兄chit 款好模範，阮嘛攏學kah chiaN 細膩chiaN
客氣。
聰敏兄，舊年你taN -a2 ui3 彰客退休落來，才想beh an3 台文路途來大大扑拼一下，siaN2 知蒼天無愛你hiah -nih 勞苦，煞來中途pang3-sak ，實在是咱台文界e5 大損失。阮只是m7 甘，人生路有出發就有結束，m7 甘嘛著送你行，聰敏兄！你著寬寬仔行…。
彰化台文聯誼會全體會員敬拜
<HOTSYS®><HOTSYS®>
沒有留言:
張貼留言