第三工坐台鐵火車到台南大查某囝兜已經過晝，只好聽候羅翊展、羅于晴學校營隊結束做伙耍一下爽快，表親總--是較親，一下耍to̍h是滾無停。明仔載頂晡翊展、于晴猶原著去學校，阮是計畫欲去高雄坐捷運kap輕便火車，可惜風颱警報，驚做ē-tàng去bē-tàng轉--來，臨時改變去赤崁樓tshit-thô參觀。
▲赤崁樓無遠，天氣翕熱，叫1台計程車，無幾分鐘to̍h到位。入門了後趕緊拜托顧門小姐翕一張相，tsiah開始lōng-lōng-se̍h，城樓造型真súi，歷史悠久，重要--è是特別紹介真正留落來ê古蹟，破鬖ê紅磚仔壁堵，舊砲台房間，石牌，整修留落來ê樑柱，m̄是專家，只有簡單按呢kā孫紹介。
囡仔siāng-kài趣味，to̍h是peh上頂樓「文昌閣」，「文昌閣」祀一尊魁星，拜拜--leh ē保庇學生gâu讀冊，几桌頂hē一副siūⁿ-pue(象桮siūⁿ-pue。擲出一反一正的筊杯。)教囡仔雙手合十，用虔誠ê心，kā魁星講心內話，tsiah提起siūⁿ-pue掞落塗跤，有聖桮無聖桮，攏ē使得攑一支原子筆，因為lín ê誠心誠意有夠，囡仔耍了歡喜，隨人提銀角仔添油香。
▲隨機解說跋杯ê機率：一副siūⁿ-pue兩个月眉型，平底向上天叫「笑桮」，意思是滾sńg笑，誠意無夠，ē使得重來；平底落地號做「khap桮」，意思是m̄免問，無答案；若是1-kâi翹上天1-kâi khap落地，to̍h是聖桮，恭喜你『心想事成』ē完成你ê心願。
「阿公問--恁，pua̍h-pue跋著聖桮ê機會有偌儕？」
『3分之1』。
「m̄著！」阿公to̍h用雙手比，手蹄+手蹄是笑桮；手盤+手盤是khap桮；右手蹄+左手盤是聖桮；左手蹄+右手盤mā是聖桮，「恁閣ioh一擺」。
『2分之1』，著！是2分之1 m̄是3分之1，所以來問神明，神明ē答應hō͘人滿意ê機會超過2分之1，而且無滿意ē使得koh要求pua̍h-pue。
▲行過1-kâi門to̍h是孔廟，老歲仔人m̄免買票，看人mā知影是老大人，顧門小姐問阮幾年次？
我應「1941」。
伊koh問：「民國幾年？」
我應：「ah tō 公元1941年，敢bē-thong？」
顧門小姐：「ah tō講民國幾年敢有問題？」
我應：「Che to̍h奇--lò͘？敢講西元紀年bē使得用？」淡薄仔無歡喜。
顧門小姐：「阿伯！m̄是--lah，he 阿六仔攏講西元幾年，是為著分別--lah！」⋯⋯猶是m̄知影按呢分別有啥乜無仝？
▲進入廟內1間1間看，教囡仔著輕聲細說，m̄-thang烏白摸烏白蹤，囡仔算是真乖巧，看hiah-ê古早物ná像無啥趣味，我to̍hkā in講，tsia-ê寶貝lóng是中國物件，人名、古物仔並無咱台灣ê。súi 都真súi，可惜m̄是咱ê。
△赤崁樓做背景，顧門小姐翕相技術讚。
▲tse是葫蘆竹，竹管sîng葫蘆形。
▲有好景緻，按怎翕按怎súi。
▲落崎排疊石頭較歹行，翕了欠驚險ê感覺。
▲文昌閣服祀「魁星」，讀冊囡仔、考試先上愛來tsia求考試順序「中狀元」。
▲教囡仔pua̍h-pue。「khioh--起來to̍h 擲掉----pua̍h-pue」
▲pua̍h-pue需要虔誠ê心，端正ê姿態。
▲赤崁樓顯示古早建築ê媠。
▲赤崁樓內面參觀。
▲阿公tī邊--a紹介古物仔。
▲阿公特別解說讀冊人需要認bat tsit六句話。
沒有留言:
張貼留言