崁頂集興軒子弟(團)[五]_文場樂器_吹 20141101_Lah-jih

崁頂集興軒子弟(團)[五]_文場樂器_吹        20141101_Lah-jih
※集興軒子弟(團)樂器分做武場kap文場，武場有鼓介、鑼鈔；文場有吹kap絃。以合奏為主，排場、對曲，子弟陣、八音、三筆鑼仔是鬧熱陣頭。年節歕春，做生日排場，ngiâ-tsih神明，娶新娘，送亡者上山頭(tsiūⁿ-suaⁿ-thâu)攏需要集興軒子弟(團)tàu跤手。
▲吹(tshue)：吹(tshue)華語講『嗩吶』，按大細支分做大吹、小吹，大吹一般講做鼓吹(kó͘-tshue)，小吹有ài-á(噯仔)kap ta̍t-á(笛仔)，是北管子弟(團)陣頭用歕--è ê主要樂器。
構造：木造尺外長tuā-thâu-su̍t管身，頭細尾大，頭 hit爿套銅質歕喙，歕喙ē-tàng tàu ìn-á(引仔)，尾 hit爿套銅質喇叭形，喙hiàn-hiàn ê碗，管身頂面有7孔，下面有1孔。
歕吹時，喙 kâm引仔(pi-pi-á)[哨子]，雙手按音孔，需要用吞氣(thun-khùi)ê機巧連續發聲，歕出飽滇響亮大聲ê「鼓吹聲」。

△鼓吹(kó͘-tshue)：吹有大吹、小吹。大吹to̍h是鼓吹，鼓吹按管ê大細、長短，閣有大中小ê無仝，大型--è聲低、沈、悲，適合司公、道士；小型--ē聲結、輕鬆、活跳，適合布袋戲尪仔活kioh節奏；子弟(團)歕--ē是中型鼓吹。
下面正爿tsit 4支攏是中型鼓吹。

△細支是ta̍t-á(笛仔)：上蓋細支ê吹，音色súi，聲音懸koh結，真好聽。
△大支是ài-á(噯仔)：比ta̍t-á(笛仔)較大，比鼓吹較細，聲音懸、結koh大聲，感覺小可吵。

△ìn-á(引仔)：套tī銅質歕喙ê pi-pi-á叫做ìn-á(引仔)，是用蘆竹(lô͘-tik)ê莖管做--è，tsit-má mā有塑膠材料ê製品。

△ìn-á(引仔)家己做：溪溝仔岸邊、濕地所在走揣蘆竹(lô͘-tik)[蘆葦lô͘-úi]，選he較sik頭較合鼓吹吹喙大細ê莖管，tsûi做1節1節約2公分ê長度，準備一支kap吹喙平大ê竹箸，kā竹箸插入蘆竹管內，用細條銅線pa̍k-ân(縛絚)，tsiah-kā另外hit爿ûn-ûn-á tshi̍h扁展開像掃帚形，試歕聽聲看覓，若有kah意tsiah-koh tàu-tiām鼓吹歕看覓。tsit種家己做--è ê引仔，需要經驗，siuⁿ茈蘆竹真緊爛掉，而且每1-kâi引仔ê調性攏會無仝，所以需要1个1个試，揀適合--è留leh備用。

△倒爿6-kâi是蘆竹做ê引仔；正爿是塑膠製引仔。

※老師傅蕭順良今年85歲，伊講較早鼓吹引仔攏是家己做，tsit-má雖罔有塑膠引仔thang買，1-kâi 300箍，而且較耐用，不過歕--起來ê感覺，猶是蘆竹引仔較好聽(音質較好)。

老師傅蕭順良除了紹介鼓吹引仔ê製作方法以外，閣開破兩除了紹介鼓吹引仔ê製作方法以外，伊閣開破兩項秘訣hō͘我知：

△歕鼓吹ê撇步----吞氣(thun-khùi)：

歕鼓吹kap歕喇叭(lat-pah)無仝，歕鼓吹，聲音bē使得斷tsām，需要連紲發聲，所以需要ná歕ná吸氣(suh-khùi)，歕是吐氣，吸to̍h是吸氣吸空氣，吸空氣時koh-tio̍h繼續歕氣，鼓吹tsiah會繼續響，tsit種「ná歕ná吸氣」ê技巧to̍h是「吞氣」。

按怎吞氣？師傅蕭順良按呢教：「喙含鼓吹引仔，歕ê時陣m̄-thang像歕風、歕蠟燭火按呢歕，按呢喙內ê空氣隨消失，需要隨時吸氣tsiah-bē絕氣，按呢to̍h bē-tàng繼續歕；」

「歕吹sak氣[送氣]bē使得用歕風，需要kā空氣儉tiàm喙內，儉ê時陣，兩爿喙䫌kuai-á需要激hō͘ phòng-sai-sai，喙含鼓吹引仔，利用喙內空氣ê壓力慢慢仔kā氣(khùi)pu--出去，tsiah-koh利用喙䫌phòng--一下 naih--一下輕輕仔kā空氣ùi鼻腔吸--入來。」「ó͘！這真困難，需要勻勻仔練習，ài有耐性tsiah學ē-hiáu。」

莫怪！少年時代順良--ē認真kap阿鑑學歕吹，ta̋ⁿ學ē-hiáu吞氣ê歡喜，kan-nā聽in Ī--ā kā人講：「阮順良--ē已經kuè-khùi--à！」to̍h知影。

△絃、吹、品按怎合奏：

絃ê音是活--è，ē使得調整音調，吹ê音孔是固定--ē，引仔ê音調閣無固定，品仔ê音是固定，tsit三種樂器bueh按怎合奏？

絃kap吹合奏較好配，絃綴吹調音to̍h ē使得，吹若換引仔，絃to̍h tuè-leh調音。

絃kap品合奏，mā是絃綴品調音，品若換支，絃to̍h tuè-leh調音。

絃、吹、品做伙合奏，絃調音無問題，吹、品to̍h真pháiⁿ調音，tse 著愛看歕吹--ē ê功夫kap歕品仔ê功夫。

△八音組合樂器：ta̍t-á(笛仔)、tháiⁿ鑼仔、tshîm-á、2支殼仔絃、銅鑼、2支phín-á(品仔)。△三筆鑼仔：小鼓(通鼓)、tshîm-á、tshê-á、銅鑼。