古物仔_囡仔時代記智篇_小鬼仔殼布袋戲尪仔：陳慶芳收藏/蕭平治翕相

古物仔_囡仔時代記智篇_小鬼仔殼布袋戲尪仔：陳慶芳收藏/蕭平治翕相
【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】為著保留生活台語原音原味，所以寫較濟lô-má-jī。
▲小鬼仔殼(sáu-kúi-á-khak)：往過庄腳鬧熱攏會搬戲敬神明娛樂家己，特別冬尾戲，除了布袋戲，一定愛倩大戲(歌仔戲)，戲齣進前需要扮仙hō͘神明看kap跳加冠。演員身穿紅袍，手提「天官賜福」繡花布條，面戴喜神抑是財神面具，hit个面具to̍h是「小鬼仔殼」。
囡仔人tsiok愛戴小鬼仔殼，kā家己ê真面目藏tī內面，hō͘人感覺神祕笑詼好耍。囡仔時代因為無錢買小鬼仔殼，to̍h用紙枋家己鉸，家己畫烏漆白，tsiah-koh縛樹奶箍仔，雖罔無媠，m̄-koh kap別人無仝，mā是感覺足滿足koh-ū淡薄仔hiau-pai，感覺伊是獨一無二，是「台灣無人有--ē。」
△che是規頂ê頭具，戴--起來kài-sîng大仙尪仔，頭大大，大頭--ē 大頭--ē，本成to̍h真好耍ê造型，囡仔足kah意。

 ▲布袋戲尪仔：
「千里路途三五步，百萬軍兵六七人。」布袋戲人人ài看，囡仔時代，庄腳所在，除了年節謝神拜平安ē-tàng看著布袋戲以外，mā有he tshin-tshái搭棚仔做布袋戲賣藥仔ê王祿仔thang看，𥍉目仔清河ê布袋戲到今心內猶有形影。
看布袋戲siāng-kài歡喜，to̍h是大兄阿里山轉--來，綴大兄戲園看戲，連紲幾若暝。斯當時阮tsia siāng-kài時行南投新世界陳俊然演ê「怪俠紅毛鷹」，永樂戲園逐暝爆滿，暗時補習學生囡仔mā tiông-tio̍h看戲尾仔。有ê學生囡仔ná著猴，心適興若giâ--起來，雙手to̍h攑起來撐布袋戲，有手巾仔kō͘手巾仔做戲服，抑是簡單伸出kí-tsáiⁿ to̍h開始lāng，暗念冊文無半步，布袋戲對話口白ē-tàng講規套，實在厲害。

 △冬尾戲、廟會、做醮、謝土，鬧熱時陣，棚腳有真濟攤販賣物，布袋戲尪仔mā是kài siâⁿ囡仔目睭，有錢現買現lāng，無錢thang買，kan-nā看mā teh癮頭(giàn-thâu)。

 △tsit種布袋戲尪仔戲服簡單，phiàn細漢囡仔好，若較大漢學生囡仔，看m̄上目。

 △tsit兩仙造型逼真親像戲棚頂布袋戲尪仔，有跤有手，戲服做工真súi，5-6年大漢學生上kah意，m̄-koh價數較貴。