【回想--一下，幾冬前你耍過tsit款tshit-thô-mi̍h[玩具]？】
【古物仔是老人ê記智，少年人ê歷史。有記智ê人生，活teh to̍h有意義；有古物ê歷史，少年人to̍h-ē感恩siàu念。】為著保留生活台語原音原味，所以寫較濟lô-má-jī。
▲kan-lo̍k(干樂)『陀螺』：
一个謎猜講「一跤會走，無喙會吼。」to̍h是ioh「kan-lo̍k」。
有一句俗語講「樟gâu吼，瓊gâu走，pa̍t-á柴摔死狗。」刣kan-lo̍k上贊ê柴箍to̍h是樟仔柴kap瓊仔柴，若是用菝仔柴刣干樂，定著phah bē-gô phah bē轉，因為菝仔柴箍扁siân扁siân，軸心(ti̍k-sim)無正。
下面紹介幾種bat 耍過ê干樂。
1、扁釘干樂：庄腳囡仔家己刣干樂，除了phah-hō͘ gô拍hō͘轉趣味好耍以外，大部份lóng是為著tìng干樂食肉ê比賽趣味，kā別人ê干樂tìng hō͘缺角，tìng hō͘ liah爿，有hit種戰鬥ê英雄豪氣。樟仔瓊仔oh揣，多數是去剁田園、後壁溝to̍h有苦苓仔椏，選he直閣圓ê部位，kō͘柴刀、小刀勻勻仔削勻勻仔thâi，刣hō͘親像古亭笨ê造型，然後tsām一節大箍鉛線，釘入干樂，tsiah-koh kā留tī外面hit節用摃槌仔摃hō͘扁扁ná斧頭，koh用刀石仔磨利利，to̍h ē使得準備出戰比賽「tìng干樂」。
Ī「tìng干樂」比賽無分大細粒，上驚he hiông-kài-kài紮大粒閣斧頭仔釘--e來參加，kan-nā想著hō͘伊tìng--落去to̍h趕緊提出khah-bē衰。參加「tìng干樂」ê囡仔伴大約是4-5年--ē到半大人囡仔。
2、圓釘干樂：圓釘干樂主要是leh phah tshit-thô phah心適--è，khah文khah-bē危險，免驚伊hō͘人tìng kah全全孔，tìng liah皮。查某囝仔mā leh耍，看啥人ê干樂khah gâu gô khah gâu轉，koh轉了ē徛心，家己thâi ê干樂khah-bē徛心，若是買he用車床車ê干樂，徛心to̍h真簡單，可惜無錢thang買。
3、無釘干樂：四兄bat刣一粒無釘ê細粒干樂hō͘我，kā我用楊麻絲縛ê蚊摔仔，tiàm塗跤sut hō͘一直轉一直gô，人著àⁿ-àⁿ，ná走ná sut，真thiám，所以bē時行。
4、日本干樂：kō͘ミシン(mishin/裁縫車、縫紉機)車仔線輪仔，鋸做2-kue̍h，削一節ná原子筆筆管ê麻竹管仔，穿入輪心，thíng一節tī平面tsit爿，攑1支箸修一支轉心，轉跤大大小可尖尖，穿過管仔thóng一節ē-tàng hō͘指頭仔tēⁿ。閣來提1條棉紗線纏 (tîⁿ)tiàm管仔頂，然後倒手tēⁿ輪心，正手giú索仔，kő͘--一下趕緊khǹg-tiàm塗跤兜抑是桌仔頂，一直轉一直gô，做了若有平棒(平衡)，ē tńg到徛心，家己做家己耍，我上kah意。
△大細粒干樂差tsiah濟，lóng是車床ê產品。大粒干樂有大粒干樂ê耍法，m̄-bat耍--過。
△19531000_Phah
kan-lo̍k 20111110_Lah-jih
「走、走！走、走！走去埕尾hia sńg！chia boeh曝粟！」阿伯淡薄仔受氣一直喝一直趕，1-tīn囡仔隨人kan-lo̍k
khioh--leh，親像趕鴨仔陣ê鴨bî-á徙對下埕去，阮兜頂埕真闊，下埕mā真闊，來到下埕，toà後壁厝ê阿祁àⁿ落去土腳用kan-lo̍k釘劃1-kâi kám-ô͘-á大ê圓箍仔：「Boeh
tèng-kan-lo̍k ê人倚--來！驚kan-lo̍k tèng破去--è to̍h走khah邊--a-leh！」阿祁加Lah-jih 3歲，無去學仔讀冊，phah kan-lo̍k伊kài-gâu，特別tèng-kan-lo̍k食肉--è，hiông-kài-kài kài粗殘，伊ê kan-lo̍k大粒koh是斧頭仔釘，磨kah利劍劍，若hō͘ hmh--tio̍h，無pit做爿mā-tio̍h liah
1-liah，有人kan-nā看to̍h驚，有人ài刺激，無leh sìn-táu--伊，偏偏boeh kap伊輸贏，to̍h是kan-lo̍k liah做2爿mā甘願，Lah-jih khah無kah意chit種sńg法，to̍h徛tiàm邊--a看心適。
開始進前tio̍h排tèng kan-lo̍k
ê順序kap啥人ê kan-lo̍k ài
hông tèng，無用じゃんけん〔猜拳〕，mā無用抽鬮，是用phah kan-lo̍k 落去圓箍仔內做決定，啥人ê kan-lo̍k上倚中心點，to̍h啥人代先tèng；若是kan-lo̍k拍無入去圓箍仔內，抑是kan-lo̍k拍無轉，抑是轉了bē赴khioh起來，攏算死kan-lo̍k，to̍h ài khǹg
tī圓箍仔內hō͘人tèng、hō͘人救…
A-pêⁿ、A-chiàng、Má-sah、A-ba̍k ê
kan-lo̍k 攏是死kan-lo̍k，hông排tī箍仔內，in to̍h相爭拜託人kā救活，「阿兄！ài先救我ê！」
「Khah-chuh--è順紲救--我，好--bò͘！？」
Khah-chuh--è排第一个，伊kan-lo̍k索仔纏纏--leh，準備boeh救小弟A-pêⁿ ê
kan-lo̍k，「kn̆g」一聲，kan-lo̍k落地，準準siòng-tio̍h
A-pêⁿ kan-lo̍k尖尖hit爿後斗，「khŏk」一下A-pêⁿ ê kan-lo̍k彈出圓箍仔外，liân-soà Má-sah ê kan-lo̍k mā救活：「Khah-chuh--è，多謝！」
第二个斧頭仔釘阿祁boeh出手，看著kan-lo̍k chiah大粒，斧頭仔釘chiah大pe chiah-ní利，A-chiàng、A-ba̍k開始phi̍h-phi̍h-chhoah…
「Hō͘你去--à！」斧頭仔釘kan-lo̍k落地，箍仔內2粒kan-lo̍k攏phùn出2,3步遠，「死--à、死--à！」A-ba̍k ê
kan-lo̍k phùn較近，從án-ni hông khioh入去箍仔內，kan-lo̍k釘插入土肉，chhāi ân-ân準備據在人tèng，好ka-chài斧頭仔釘阿祁tăⁿ phah --過，koh來Ka-hiông--ē、Ka-tēng--ē、No͘h-lí-á、Kok-ke-á 攏m̄是hiông-kài-kài ê人，Ka-hiông--ē講保平安to̍h好，m̄敢想boeh食肉，No͘h-lí-á技術無好，講若拍ē轉ē入去箍仔內to̍h 阿彌陀佛--à，Ka-tēng--ē ê kan-lo̍k釘雖罔扁扁，m̄-koh無磨利，tèng bē liah爿，所以A-ba̍k有較放心，紲落輪著Kok-ke-á，Kok-ke-á運氣無好，phah一下kan-lo̍k soah吊釘，phah無出去，A-ba̍k歡喜一下，「有人做伴，有救--à！」
Koh來輪著A-pêⁿ，A-pêⁿ kā 2粒kan-lo̍k掠相排khǹg做伙，索仔纏好，索仔頭挾tī指頭仔縫，跤馬soah在，正手gia̍h-koân，相準準phah對箍仔內2粒kan-lo̍k所在，可惜姿勢súi技術bái，soah無入箍仔內，又閣死1擺。紲落輪著Má-sah，Má-sah救出A-ba̍k kap
Kok-ke-á，taⁿ箍仔內kan-nā chhun
A-pêⁿ leh hông tèng，連紲Ka-hiông--ē、Ka-tēng--ē、No͘h-lí-á 3个攏安全過關，mā無食著肉。
「阿兄kâ救！」A-pêⁿ kā
Khah-chuh--è 討救兵。
「Boeh按怎救？kan-nā 1粒boeh按怎救？hông tèng hō͘
liah爿好--lah，有夠pēⁿ！」Khah-chuh--è只好安全過關。
Khah-chuh--è
phah了又閣換斧頭仔釘阿祁：「Chit擺一定boeh hō͘伊liah做2爿。」「kŏ͘ⁿ一聲」A-pêⁿ ê
kan-lo̍k 已經liah 1片，而且phùn出箍仔外，chit聲真正害--ā，A-pêⁿ ê kan-lo̍k 無koh khioh轉來khǹg-tiàm箍仔內，kan-lo̍k ē hông趕入埕尾另外1-kâi圓箍仔內，逐个開始相爭tèng相爭趕，路尾真正kā kan-lo̍k趕入圓箍仔內，chit聲A-pêⁿ有影真正boeh哭無目屎：「拜託拜託！khah輕手--leh，kho̍k--leh
kho̍k--leh to̍h好！」1-tīn囡仔從án-ni圍倚來圓箍仔邊，kan-lo̍k索仔暫時收起來tē-tiàm褲袋仔，輪流boeh破A-pêⁿ ê kan-lo̍k，看A-pêⁿ kan-lo̍k已經liah 1爿仔，逐个歹勢koh-kā鑿liah爿，攏輕輕仔kho̍k 3下to̍h準tú-soah，輪到斧頭仔釘阿祁，A-pêⁿ一直拜託「kho̍k 3下to̍h好！好--bò͘！kho̍k 3下to̍h好！好--bò͘！」
「A-pêⁿ！mài戇--ā-lah！tèng-kan-lo̍k上趣味to̍h是破kan-lo̍k，無,我斧頭仔釘磨chiah-lāi boeh創啥？」斧頭仔釘阿祁khû--落去，倒手hoāⁿ A-pêⁿ ê
kan-lo̍k，正手kā家己ê kan-lo̍k
tēⁿ-ân-ân，kan-lo̍k釘鑿對A-pêⁿ ê kan-lo̍k，鑿1下liah 1大liah，chím 3下to̍h liah 3大liah，連kan-lo̍k釘都看現現，taⁿ, A-pêⁿ ê kan-lo̍k已經報銷，連kan-lo̍k釘都hō͘阿祁贏--去，A-pêⁿ目箍紅紅khiú Khah-chuh
ê手：「阿兄！Koh thâi 1粒kan-lo̍k hō͘--我lah heh！」……
Phah kan-lo̍k，方式幾若種，kan-lo̍k釘捶扁扁食肉hit種「tèng-kan-lo̍k」有較野有較危險，Lah-jih 較愛sńg he圓釘--ē，phah hō͘轉phah hō͘ gô，比看chiâ ê
kan-lo̍k轉上gîn轉上久，二兄、四兄thâi ê
kan-lo̍k雖罔真súi真好phah，可惜Lah-jih技術無夠，攏bē徛心，每擺看著街路囡仔sńg ê kan-lo̍k攏ē徛心，koh thâi kah
chiâⁿ圓chiâⁿ-súi，剾kah金滑金滑，to̍h足欣羨，in講he是用車--e，用車床車--e，m̄是用刀仔削--è，1粒5角銀，講著錢to̍h m̄敢siàu想boeh愛，有二兄、四兄thâi hoā ê
kan-lo̍k to̍h bē-bái--à。街路囡仔sńg kan-lo̍k傷過文，變化無濟，若阮庄腳囡仔sńg kan-lo̍k，heh to̍h加真好sńg--lò͘，phah hō͘轉無稀奇，phah hō͘
ho͘ⁿ-ho͘ⁿ叫、phah hō͘走phīng遠、抑是phah hō͘ tèng-tī土腳bē振動，chiah是真正技術功夫。俗語講「樟gâu吼，瓊gâu走，pa̍t-á柴摔死狗。」是有伊ê道理tī--leh，不過阮罕得看著樟仔柴、瓊仔柴thâi ê
kan-lo̍k，較濟是chām苦楝仔椏來thâi ê
kan-lo̍k，若有人用八卦山phiâⁿ ê樟仔柴、瓊仔柴thâi--è，in一定展poah-poah表演hō͘阮看，上蓋厲害上蓋khiàng--è，to̍h是木蒼--e，伊ê kan-lo̍k釘較長，伊gīm kan-lo̍k ê方式是kan-lo̍k釘ǹg-chiūⁿ天，kan-lo̍k hō͘伊phah落地，bē-gô bē走，tèng-tiàm土--裏bē振bē動，有夠怪奇？sian想都想無原因，聽伊講，kan-lo̍k釘ǹg-chiūⁿ天phah 較有力，m̄-koh chit步Lah-jih sian學都學bē-hiáu，kan-lo̍k釘ǹg-chiūⁿ天，phah--落去仝款kan-lo̍k釘ǹg-chiūⁿ天顛倒頭gô！@#？
有一擺，四兄削1粒細粒kan-lo̍k hō͘--我，細細粒仔，一粒ná南洋橄仔，tèng釘hit爿削了較尖，m̄-koh無tèng釘，問四兄「按怎sńg？」，四兄koh gia̍h 1支楊麻絲縛--ē ê蚊摔仔出--來，kā kan-lo̍k
tàn-tiàm土腳，chiah用蚊摔仔sut，sut幾下仔，kan-lo̍k to̍h開始gô，lú sut lú轉，「bē-bái sńg
to-tio̍h！」
「Lah-jih！換你！」
Ná sut ná jiok，bē轉to̍h是bē轉：「ná-ē sut bē轉？」
「Lah-jih！你看，ài sut
kan-lo̍k下面，tio̍h連紲一直sut chiah-ē轉--起來！」四兄示範講mê-kak。
Ná sut ná jiok，ná sut ná jiok：「轉--起來à！轉--起來à！」
「繼續！繼續！m̄-thang歇睏。」：看kan-lo̍k已經gô--起來：「hō͘你家己sńg，四兄boeh來去做khang-khoè--à！」
好sńg to-tio̍h，m̄-koh已經汗流sám滴。
Iáu有一種kan-lo̍k，人講叫做日本kan-lo̍k，chi̍t種日本kan-lo̍k
Lah-jih較趣味家己做來sńg。早當時庄腳查某人做針黹，boeh做、boeh補、boeh thīⁿ，攏是1針1線雙手ûn-ûn-á來，he棉紗線若用了，纏棉紗線ê車輪仔，to̍h ē-tàng提來做日本kan-lo̍k，車輪仔形kài-sêng鐵枝路頂leh走ê火車輪，是柴--ē，心大大有孔，大約鉛筆大。
做日本kan-lo̍k需要1粒纏棉紗線ê車輪仔、1腳箸抑是箸大ê桂竹仔爿、1支刀仔、1條棉紗索仔、1 chat仔鉛筆大ê麻竹管，代先kā車輪仔用刀仔削做2-koe̍h，揀較súi款hit爿，kā修hō͘像酒漏形〔漏斗狀〕，chiah kā麻竹管仔ân-ân chhng入孔內，尖梭hit爿修hō͘ súi，另外hit爿thóng 2公分長thang纏索仔，koh來kā箸修削1支oa̍h-tōng ê
kan-lo̍k心，chit支心ná大頭釘，大頭hit爿著削像豬心鈍鈍ê尖形做kan-lo̍k腳，chhun--e修hō͘圓圓比竹管仔孔較細一屑仔to̍h好，長度需要thóng出竹管仔1公分，做好著會使得提來sńg。
棉紗質ê kan-lo̍k索仔纏tiàm竹管仔部位，纏好，倒手大-pû-ong kap第二指kā thóng出竹管仔ê kan-lo̍k心tēⁿ hō͘ ân，然後索仔順力giú--一下，kan-lo̍k開始gô，紲手hē-tiàm土腳，kan-lo̍k繼續轉、一直gô，若是gô bē--起來抑是gô無5秒鐘to̍h跋倒，to̍h需要kohしあげ(修飾)抑是重做kan-lo̍k心，kan-lo̍k心ê中心點掠無準，kan-lo̍k to̍h轉bē-gîn轉bē久，Lah-jih
chiok-ài sńg chit種kek頭腦ê chhit-thô͘物，每擺若是做著ē徛心ê kan-lo̍k一定展hō͘人看，若tī木造桌仔頂phah，m̄-nā徛心足久足久koh-ē kô͘ⁿ-kô͘ⁿ叫，徛心轉起來kài神奇，kan-lo̍k ká-ná chhāi-tiāⁿ-tiāⁿ無leh轉，每擺lóng-ē siâⁿ人注心無nih目。
一nih目，都也經過1甲子，chit-má看人表演phah-kan-lo̍k，ē使得講是「出神入化」，技藝絕等，雖罔心適好看，總是較懷念--ē猶是早前囡仔伴絞群chhit-thô tèng
kan-lo̍k ê趣味。20111223_Lah-jih
▲干樂輪仔：塑膠ê干樂輪仔，kō͘大垺翁kap指指(kí-tsáiⁿ)1支指頭仔lián，細漢囡仔上kah意。
沒有留言:
張貼留言